തൃശൂര്: അഖിലഭാരത നാരായണീയ മഹോത്സവ സമിതിയുടെ നേതൃത്വത്തില് നാരായണീയ മഹോത്സവം വൈകുണ്ഠാമ്യതം, ഒക്ടോ. 5 മുതല് 10 വരെ ഗുരുവായൂര് മുനിസിപ്പല് ടൗണ്ഹാളില് നടക്കുമെന്ന് ഭാരവാഹികള് വാര്ത്താസമ്മേളനത്തില് അറിയിച്ചു. ഞായറാഴ്ച രാവിലെ 10ന് ഗവര്ണര് രാജേന്ദ്ര വിശ്വനാഥ് ആര്ലേക്കര് ഉദ്ഘാടനം ചെയ്യും. കുമ്മനം രാജശേഖരന് മുഖ്യപ്രഭാഷണം നടത്തും. മാങ്കോട് രാമകൃഷ്ണന് അധ്യഷനാകും.
വിവിധ ദിവസങ്ങളില് കേന്ദ്രമന്ത്രി ശിവരാജ് സിങ് ചൗഹാന്, ബംഗാള് ഗവര്ണര് ഡോ. സി.വി. ആനന്ദബോസ്, കേന്ദ്രമന്ത്രിമാരായ സുരേഷ് ഗോപി, എല്. മുരുകന്, പോണ്ടിച്ചേരി പിഡബ്ല്യൂഡി വകുപ്പ് മന്ത്രി കെ. ലക്ഷ്മീനാരായണന്, ജെ. നന്ദകുമാര് തുടങ്ങിയവര് സമ്മേളനങ്ങളില് പങ്കെടുക്കും.
10-ാം തീയതി കേശാദിപാദ വിശ്വദര്ശനം എന്ന കാഴ്ചപ്പാടില് ലോകമെമ്പാടുമുള്ള നാരായണീയ ഭക്തരെ കോര്ത്തിണക്കി രാവിലെ 10 മണി 10 മിനിറ്റ് 10 സെക്കന്റ് സമയത്ത് നാരായണീയത്തിന്റെ കേശാദിപാദ വര്ണന 100-ാം ദശകം പാരായണം ഒരേസമയം പ്രത്യേകം തയാറാക്കിയ ലിങ്കിലൂടെ മുഴുവന് രാഷ്ട്രങ്ങളിലും പാരായണം ചെയ്യാന് സൗകര്യം എര്പ്പെടുത്തും.
വാര്ത്താസമ്മേളനത്തില് ദേശീയ വൈസ് പ്രസിഡന്റ് സി. മോഹന്ദാസ്, ദേശീയ ജനറല് സെക്രട്ടറി ഹരി മേനോന്, ദേശീയ സംഘടനാ സെക്രട്ടറി ഐ.ബി. ശശിധരന്, സംസ്ഥാന ജനറല് സെക്രട്ടറി എ.സി. ചെന്താമരാക്ഷന്, ജനറല് കണ്വീനര് ബാബുരാജ് കേച്ചേരി എന്നിവര് പങ്കെടുത്തു.
