കരൂര്: നടനും ടി വി കെ നേതാവുമായ വിജയ്യുടെ റാലിയിലുണ്ടായ തിക്കിലും തിരക്കിലും പെട്ട്41 പേര് മരിച്ച സംഭവത്തില് ആദ്യ അറസ്റ്റ്. ടിവികെ കരൂര് വെസ്റ്റ് ജില്ലാ സെക്രട്ടറി മതിയഴകനാണ് അറസ്റ്റിലായത്. ഒളിവില് കഴിയുകയായിരുന്നു മതിയഴകന്.
മനഃപൂര്വമല്ലാത്ത നരഹത്യ ഉള്പ്പെടെ വകുപ്പുകള് ചുമത്തിയാണ് അന്വേഷണ സംഘം മതിയഴകനെ അസ്റ്റു ചെയ്തത്. ടിവികെ അധ്യക്ഷന് വിജയ്ക്കെതിരെഗുരുതര ആരോപണങ്ങളാണ് പൊലീസ് എഫ്ഐആറിലുള്ളത്.
വിജയ് റാലിക്കെത്താന് മനഃപൂര്വം നാലുമണിക്കൂര് വൈകി.കരൂരില് അനുമതിയില്ലാതെയാണ് റോഡ് ഷോ നടത്തിയതെന്നും എഫ്ഐആറിലുണ്ട്. അനുമതി ഇല്ലാതെ റോഡില് വാഹനം നിര്ത്തി സ്വീകരണം ഏറ്റുവാങ്ങിയെന്നും ടിവികെ നേതാക്കള്ക്ക് മുന്നറിയിപ്പ് നല്കിയിട്ടും അനുസരിച്ചില്ല എന്നും എഫ്ഐആറില് പറയുന്നു.
പരിപാടിക്കിടെ ബോധരഹിതരായി 11 പേര് സംഭവസ്ഥലത്ത് തന്നെ മരിച്ചു. ജനങ്ങള്ക്ക് ബോധക്ഷയവും ശ്വാസതടസവുമുണ്ടായി. മണിക്കൂറുകള് കാത്തിരുന്ന ആളുകള് തളര്ന്ന് വീണു. ആവശ്യത്തിന് വെള്ളമോ മെഡിക്കല് സൗകര്യങ്ങളോ ഇല്ലായിരുന്നു.പൊലീസ് പലതവണ മുന്നറിയിപ്പ് നല്കിയിട്ടും സംഘാടകര് ഒന്നും ചെയ്തില്ലെന്നും എഫ്ഐആറില് പറയുന്നു.
