ന്യൂദല്ഹി : പ്രധാനമന്ത്രിയുടെ പ്രതിമാസ റേഡിയോ പ്രഭാഷണ പരിപാടി മന് കി ബാത്തില് ശതാബ്ദി ആഘോഷിക്കുന്ന രാഷ്ട്രീയ സ്വയംസേവക സംഘത്തെ (ആര് എസ് എസ്) പരാമര്ശിച്ച് നരേന്ദ്രമോദി. ഇപ്രാവശ്യത്തെ വിജയദശമി സവിശേഷമാണെന്നും ആര് എസ് എസ് സ്ഥാപിതമായതിന്റെ 100-ാം വാര്ഷികമാണ് ഈ ദിവസമെന്നും അദ്ദേഹം ചൂണ്ടിക്കാട്ടി.
ഒരു നൂറ്റാണ്ടിന്റെ ഈ യാത്ര അത്ഭുതകരവും അഭൂതപൂര്വവും പ്രചോദനാത്മകവുമാണ്. 100 വര്ഷങ്ങള്ക്ക് മുമ്പ് ആര് എസ് എസ് സ്ഥാപിതമായപ്പോള്, നൂറ്റാണ്ടുകളായി രാജ്യം അടിമത്തത്തിന്റെ ചങ്ങലകളില് ബന്ധിക്കപ്പെട്ടിരുന്നുവെന്ന് നരേന്ദ്രമോദി ഓര്മ്മിപ്പിച്ചു.രാജ്യത്തിന്റെ സ്വാതന്ത്ര്യത്തോടൊപ്പം രാജ്യം പ്രത്യയശാസ്ത്രപരമായ അടിമത്തത്തില് നിന്ന് മുക്തമാകേണ്ടതും പ്രധാനമായിരുന്നു. ഈ സാഹചര്യത്തിലാണ് ഡോ ഹെഡ്ഗേവാര് 1925-ല് വിജയദശമി ദിനത്തില് രാഷ്ട്രീയ സ്വയംസേവക സംഘം സ്ഥാപിച്ചത്.
ഡോ. സാഹിബിന്റെ വിയോഗ ശേഷം, ഗുരുജി ദേശസേവനത്തിന്റെ ഈ മഹത്തായ യജ്ഞം മുന്നോട്ട് കൊണ്ടുപോയി. ഗുരുജി പറയാറുണ്ടായിരുന്നു, ‘രാഷ്ട്രായ സ്വാഹാ, ഇദം രാഷ്ട്രായ ഇദം ന മമ’, അതായത് ‘ഇത് എന്റേതല്ല, ഇത് രാഷ്ട്രത്തിന്റേതാണ്’. ഈ പ്രസ്താവന സ്വാര്ത്ഥതാല്പ്പര്യത്തിന് അതീതമായി രാഷ്ട്രത്തോടുള്ള സമര്പ്പണം സ്വീകരിക്കാന് നമ്മെ പ്രചോദിപ്പിക്കുന്നതായി പ്രധാനമന്ത്രി പറഞ്ഞു.
ത്യാഗത്തിന്റെയും സേവനത്തിന്റെയും ആത്മാവും അത് പഠിപ്പിക്കുന്ന അച്ചടക്കവുമാണ് സംഘത്തിന്റെ യഥാര്ത്ഥ ശക്തി. നൂറു വര്ഷത്തിലേറെയായി ആര്എസ്എസ് അക്ഷീണം, നിരന്തരം ദേശസേവനത്തില് ഏര്പ്പെട്ടിരിക്കുന്നു. അതിനാലാണ് രാജ്യത്ത് എവിടെ പ്രകൃതിദുരന്തം സംഭവിച്ചാലും ആദ്യം എത്തിച്ചേരുന്നത് ആര്.എസ്.എസ്. സന്നദ്ധസേവകരാണ് എന്ന് നാം കാണുന്നത്. ലക്ഷോപലക്ഷം സന്നദ്ധസേവകരുടെ ഓരോ പ്രവൃത്തിയിലും പരിശ്രമത്തിലും ‘രാഷ്ട്രം ആദ്യം’, ‘എന്ന മനോഭാവം എപ്പോഴും പരമപ്രധാനമാണ്. ദേശസേവനത്തിന്റെ മഹത്തായ യജ്ഞത്തിനായി സ്വയം സമര്പ്പിക്കുന്ന ഓരോ സന്നദ്ധസേവകനും ആശംസകള് നേരുന്നതായി പ്രധാനമന്ത്രി പറഞ്ഞു.
