കൊച്ചി: ഓപ്പറേഷന് നുംഖോറിന്റെ ഭാഗമായി തന്റെ ലാന്ഡ് റോവര് പിടിച്ചെടുത്തതിനെതിരെ നടന് ദുല്ഖര് സല്മാന് സമര്പ്പിച്ച ഹര്ജിയില് കസ്റ്റംസിന്റെ വിദശീകരണം തേടി ഹൈക്കോടതി. വാഹനം പിടിച്ചെടുത്ത കസ്റ്റംസിന്റെ നടപടി നിയമവിരുദ്ധമാണെന്നും ദുല്ഖര് സല്മാന് ഹര്ജിയില് വാദിക്കുന്നു.
ദുല്ഖറിന്റെ ഹര്ജി ഹൈക്കോടതി ചൊവ്വാഴ്ച്ച പരിഗണിക്കും. ലാന്ഡ് റോവര് വാഹനം പിടിച്ചെടുത്തത് ചോദ്യം ചെയ്താണ് ദുല്ഖര് കോടതിയെ സമീപിച്ചത്. വാഹനം വിട്ടുകിട്ടണമെന്നും ദുല്ഖര് ഹര്ജിയില് ആവശ്യപ്പെട്ടിട്ടുണ്ട്.
ദുല്ഖര് സല്മാന്റെ നാല് വാഹനങ്ങളാണ് കസ്റ്റംസിന്റെ അന്വേഷണ പരിധിയിലുളളത്. ഇതില് രണ്ട് വാഹനങ്ങളാണ് പിടിച്ചെടുത്തിരിക്കുന്നത്. അതിൽ ഒരു വാഹനം മറ്റൊരാളുടെ പേരിലാണ് രജിസ്റ്റര് ചെയ്തിരിക്കുന്നത്. എല്ലാ നിയമ നടപടികളും പൂര്ത്തിയാക്കിയാണ് വാഹനം വാങ്ങിയതെന്നാണ് ദുല്ഖറിന്റെ വാദം.
