ന്യൂയോര്ക്ക്: ഹമാസിനെ ഇല്ലാതാക്കും വരെ ഇസ്രയേലിന്റെ യുദ്ധം തുടരുമെന്ന് ഇസ്രയേല് പ്രധാനമന്ത്രി ബെഞ്ചമിന് നെതന്യാഹു. ഐക്യരാഷ്ട്രസഭയില് പൊതുയോഗത്തെ അഭിസംബോധന ചെയ്ത് സംസാരിക്കുകയായിരുന്നു നെതന്യാഹു. യുദ്ധം അവസാനിപ്പിക്കണമെന്നും പലസ്തീന് എന്ന രാജ്യത്തെ അംഗീകരിക്കണമെന്നും ഉള്ള യൂറോപ്യന് രാജ്യങ്ങളുടേതുള്പ്പെടെയുള്ള അതിശക്തമായ സമ്മര്ദ്ദം തുടരുന്നതിനിടയിലാണ് ബെഞ്ചമിന് നെതന്യാഹുവിന്റെ ഹമാസിനെതിരെ യുദ്ധം തുടരുമെന്നുള്ള പ്രഖ്യാപനം പുറത്തുവന്നത്.
നെതന്യാഹു പ്രസംഗിക്കാനെഴുന്നേറ്റപ്പോള് നിരവധി രാജ്യങ്ങളുടെ പ്രതിനിധികള് പ്രതിഷേധാര്ത്ഥം യുഎന് പൊതുസഭയില് നിന്നും ഇറങ്ങിപ്പോയെങ്കിലും, നെതന്യാഹു തന്റെ പ്രസംഗം തുടര്ന്നു. ഹമാസ് ഭീകരര് ബന്ദികളാക്കിപ്പിടിച്ച, ഇനിയും വിട്ടുകിട്ടാത്തവരെ താന് ഇപ്പോഴും ഓര്മ്മിക്കുന്നുണ്ടെന്നും നെതന്യാഹു പറഞ്ഞു. ഇസ്രയേല് ഹൂതികള്ക്ക് മേല് ആഘാതം ഏല്പിച്ചു, ഹമാസിന്റെ ഭൂരിഭാഗം ശക്തിയെയും അടിച്ചമര്ത്തി, ഹെസ്ബുള്ളയെ അംഗഭംഗം വരുത്തി… നെതന്യാഹു പറഞ്ഞുനിര്ത്തിയപ്പോള് ചില രാജ്യങ്ങളുടെ പ്രതിനിധികള് ബഹളം വെച്ചെങ്കിലും മറ്റ് ചില രാജ്യങ്ങളുടെ പ്രതിനിധികള് കയ്യടിക്കുന്നത് കാണാമായിരുന്നു. ഇറാന്റെ ആണവായുധങ്ങളും ബലിസ്റ്റിക് മിസൈല് ശേഖരവും നശിപ്പിക്കാന് ഇസ്രയേലിന് സാധിച്ചെന്നും ബെഞ്ചമിന് നെതന്യാഹു അവകാശപ്പെട്ടു.
2023 ഒക്ടോബര് ഏഴിന് ഹമാസ് ഭീകരര് ഇസ്രയേലിനെ ആക്രമിക്കുകയും 1200 പേരെ വധിക്കുകയും 48 ഇസ്രയേലികളെ ബന്ദികളാക്കുകയും ചെയ്തു. അതിനെതിരെയായിരുന്നു ഇസ്രയേലിന്റെ യുദ്ധമെന്നും ഹമാസിനെതിരെ മാത്രമല്ല, ഇറാന് പിന്തുണ നല്കുന്ന മറ്റ് ഭീകരവാദസംഘടനകള്ക്കെതിരായ യുദ്ധത്തിലും ഇസ്രയേല് വിജയിച്ചെന്നും നെതന്യാഹു പറഞ്ഞു. ലോകത്ത് പലരും ഒക്ടോബര് എഴിനെ ഇപ്പോള് മറന്നുകാണും. പക്ഷെ ഇസ്രയേല് ഈ ദിവസം ഓര്മ്മിക്കുന്നു- വികാരാധീനനായി നെതന്യാഹു പറഞ്ഞു.
ഗാസയില് വംശഹത്യ നടത്തിയില്ലെന്ന് നെതന്യാഹു
ഗാസയില് ബോംബാക്രമണത്തിന് മുന്പ് ലക്ഷക്കണക്കിന് ലഘുലേഖകള് ജനങ്ങള്ക്കിടയില് വിതറാറുണ്ടെന്ന് നെതന്യാഹു പറഞ്ഞു. ബോംബിങ്ങ് നടക്കുന്നതിന് മുന്പ് ജനങ്ങളോട് ഒഴിഞ്ഞുപോകാന് അഭ്യര്ത്ഥിക്കുന്നതാണ് ഈ ലഘുലേഖകള്. അതിനാല് ഇസ്രയേല് ഒരിയ്ക്കലും വംശഹത്യ നടത്തിയെന്ന് പറയാന് കഴിയില്ല. ഗാസയില് ഇസ്രയേല് സേന പലസ്തീനികളെ വംശഹത്യ ചെയ്തു എന്ന രീതിയിലുള്ള ഐക്യരാഷ്ട്രസഭയുടെ റിപ്പോര്ട്ട് തെറ്റാണെന്നും നെതന്യാഹു പറഞ്ഞു.
ഗാസ മുനമ്പില് ഇസ്രയേലികള്ക്ക് കേള്ക്കാന് നെതന്യാഹുവിന്റെ പ്രസംഗം ലൗഡ് സ്പീക്കറുകളില്
ഗാസ മുനമ്പില് താമസിക്കുന്ന ഇസ്രയേലികള്ക്ക് കേള്ക്കാനായി വാഹനങ്ങളില് ലൗഡ് സ്പീക്കറില് താന് യുഎന്നില് നടത്തുന്ന പ്രസംഗം കേള്പ്പിക്കണമെന്ന് ഇസ്രയേല് പ്രതിരോധസേനയോട് നേരത്തെ തന്നെ ബെഞ്ചമിന് നെതന്യാഹു അഭ്യര്ത്ഥിച്ചിരുന്നു. ഇതിനുസരിച്ച് റോന്ത് ചുറ്റുന്ന വാഹനങ്ങളിലെല്ലാം ഇസ്രയേല് സേന ലൗഡ് സ്പീക്കര് ഘടിപ്പിച്ചിരുന്നു. ഇതിലൂടെ വരുന്ന നേതാവിന്റെ പ്രസംഗം കേള്ക്കാന് നിറയെ ഇസ്രയേലികള് വാഹനങ്ങള്ക്ക് ചുറ്റും തടിച്ചുകൂടിയിരുന്നു.
