ആലപ്പുഴ: നെല്ക്കര്ഷകരുടെ പ്രശ്നങ്ങള് പഠിച്ചു പരിഹരിക്കുന്നതിനായി കേന്ദ്രസംഘം ഇന്നലെ കുട്ടനാട്ടില് പര്യടനം നടത്തി. കേന്ദ്ര കാര്ഷിക മന്ത്രാലയത്തിലെ ജോയിന്റ് സെക്രട്ടറി എസ്. രുഗ്മിണിയുടെ നേതൃത്വത്തിലുള്ള സംഘമാണ് കുട്ടനാടും അപ്പര് കുട്ടനാട് മേഖലകളും സന്ദര്ശിച്ചു കര്ഷകരുമായി ചര്ച്ച നടത്തിയത്.
മങ്കൊമ്പ് നെല്ല് ഗവേഷണ കേന്ദ്രത്തില് നടന്ന ചര്ച്ചയില് ഉയര്ന്ന വിളവ് നല്കുന്ന നെല്ലിനങ്ങളുടെ വികസനം, യന്ത്രവത്കരണം, കുട്ടനാട് നെല്ലിന്റെ ജിഐ ടാഗിങ്, കൃഷിയില് ഡ്രോണുകളുടെ വ്യാപകമായ ഉപയോഗം, ഇക്കോ-ടൂറിസം തുടങ്ങിയവ നെല്ക്കൃഷിയെ രക്ഷിക്കാന് ആവശ്യമാണെന്ന നിര്ദേശമാണ് ഉയര്ന്നത്.
കേന്ദ്രസംഘം 26 വരെ കുട്ടനാട്, തൃശൂര്, പാലക്കാട് എന്നിവിടങ്ങളില് സന്ദര്ശനം നടത്തും. ഹൈദരാബാദ് ആസ്ഥാനമായുള്ള ഐസിഎആര്-ഇന്ത്യന് ഇന്സ്റ്റിറ്റിയൂട്ട് ഓഫ് റൈസ് റിസര്ച്ചിലെ (ഐഐആര്ആര്) ശാസ്ത്രജ്ഞരും സംഘത്തിലുണ്ട്.
പ്രശ്നങ്ങള് മനസ്സിലാക്കി അടുത്ത മാസം റിപ്പോര്ട്ട് സമര്പ്പിക്കാനാകുമെന്നാണ് കരുതുന്നതെന്ന് കേന്ദ്ര കാര്ഷിക ജോയിന്റ് സെക്രട്ടറി പറഞ്ഞു. കേന്ദ്ര കാര്ഷിക കൃഷി ഡെപ്യൂട്ടി കമ്മിഷണര് എ.എന്. മേശ്രാം, കാര്ഷിക എന്ജിനീയര് ശശികാന്ത് പവാര്, ഐഐആര്ആര് സീനിയര് സയന്റിസ്റ്റ് ഡോ. ദിവ്യ ബാലകൃഷ്ണന്, സയന്റിസ്റ്റുമാരായ ഡോ. വി. മാനസന്, ഡോ. എസ്. വിജയകുമാര്, ഡോ. ആര്. ഗോപിനാഥ് എന്നിവരും സംഘത്തിലുണ്ട്.
ബിജെപി കേന്ദ്ര നിര്വാഹക സമിതി അംഗം കുമ്മനം രാജശേഖരന്, സംസ്ഥാന വൈസ് പ്രസിഡന്റ് സി. കൃഷ്ണകുമാര്, കര്ഷക മോര്ച്ച സംസ്ഥാന പ്രസിഡന്റ് ഷാജി രാഘവന്, സംസ്ഥാന ജനറല് സെക്രട്ടറി എം.വി. രാമചന്ദ്രന്, ബിജെപി സംസ്ഥാന സെക്രട്ടറി എം.വി. ഗോപകുമാര്, ജില്ലാ പ്രസിഡന്റ് അഡ്വ. പി.കെ. ബിനോയ്, ബിഡിജെഎസ് ജില്ലാ പ്രസിഡന്റുമാരായ ടി. അനിയപ്പന്, സന്തോഷ് ശാന്തി, കാര്ഷിക ശാസ്ത്രജ്ഞന് ഡോ. കെ.ജി. പത്മകുമാര് തുടങ്ങിയവര് സംഘത്തെ അനുഗമിച്ചു. രാവിലെ സംഘം ചേര്ത്തല അന്ധകാരനഴി ചെമ്പകശ്ശേരി നെല്ക്കൃഷി മേഖലയും സന്ദര്ശിച്ചിരുന്നു.
ജന്മഭൂമി ഓണ്ലൈന്