കേന്ദ്ര മന്ത്രിയായ ശേഷം 2024 സപ്തംബറിലെ എന്റെ ആദ്യ ‘വേള്ഡ് ഫുഡ് ഇന്ത്യ’ വേറിട്ട അനുഭവമായിരുന്നു. ആ നാലുദിവസങ്ങളില് കൃഷിയിടം മുതല് തീന്മേശ വരെ മുഴുവന് ഭക്ഷ്യശൃംഖലയും ഒത്തുചേരുന്നത് ഞാന് നേരില് കണ്ടു. ആഗോള ഉപഭോക്താക്കളെത്തുന്ന സംസ്ഥാന ഭക്ഷ്യശാലകളും കര്ഷക ഉല്പാദക – സ്വയം സഹായ സംഘങ്ങളുടെ സാങ്കേതികവിദ്യ പ്രദര്ശനങ്ങളും നിക്ഷേപ പ്രഖ്യാപനങ്ങള്ക്കൊപ്പം നടന്ന നയപരമായ ചര്ച്ചകളും ഇതിന്റെ ഭാഗമായിരുന്നു. ഭാരതത്തെ ലോകത്തിന്റെ ഭക്ഷ്യ ശാലയാക്കി മാറ്റുകയെന്ന പ്രധാനമന്ത്രി നരേന്ദ്ര മോദിയുടെ കാഴ്ചപ്പാടിനോട് ചേര്ന്നുനില്ക്കുന്ന സുപ്രധാന വേദിയാണ് വേള്ഡ് ഫുഡ് ഇന്ത്യയെന്ന് ഇത് തെളിയിച്ചു.
ആ അനുഭവമാണ് 2025-ലെ രൂപരേഖയായി മാറിയത്. ഭക്ഷ്യ സംസ്കരണ കേന്ദ്രങ്ങളിലേക്കുള്ള യാത്രകളും വ്യാവസായിക പ്രമുഖരുമായി നടത്തിയ ചര്ച്ചകളും ഗള്ഫ് ഫുഡ്, ലോക സാമ്പത്തിക ഫോറം തുടങ്ങിയ ആഗോള വേദികളിലെ പങ്കാളിത്തവും ഭാരതത്തിന്റെ കാര്ഷിക ഭക്ഷ്യ വൈവിധ്യവും കഴിവുകളും ലോകം കാണേണ്ടതുണ്ടെന്ന എന്റെ വിശ്വാസത്തെ ശക്തിപ്പെടുത്തി. ഇതോടെ അടുത്ത പതിപ്പ് കൂടുതല് മികച്ചതും ഫലപ്രദവുമാക്കാനും അതുവഴി നൂതനാശയങ്ങളെ നിക്ഷേപങ്ങളാക്കി ഭാരതത്തെ വിശ്വസ്ത ആഗോള ഭക്ഷ്യകേന്ദ്രമാക്കി മാറ്റാനും ലക്ഷ്യമിട്ടു.
വരുംതലമുറ ജിഎസ്ടി പരിഷ്കാരങ്ങളടക്കം നയപരമായ പിന്തുണയാണ് ഈ ലക്ഷ്യത്തിന് കൂടുതല് കരുത്തേകുന്നത്. സംസ്കരിച്ച ഭക്ഷ്യ ഉല്പന്നങ്ങളില് മിക്കതും അഞ്ച് ശതമാനം നികുതി വിഭാഗത്തിലോ നികുതി രഹിത വിഭാഗത്തിലോ ഉള്പ്പെടുത്തിയ പരിഷ്കാരങ്ങള് ഈ മേഖലയ്ക്ക് അനുകൂലവും മത്സരാധിഷ്ഠിതവുമായ സാഹചര്യമൊരുക്കി. ഇത്തരം ഒരുക്കങ്ങളോടെ സപ്തംബര് 25 മുതല് 28 വരെ വേള്ഡ് ഫുഡ് ഇന്ത്യ സംഘടിപ്പിക്കാന് സജ്ജീകരണങ്ങള് പൂര്ത്തിയായിരിക്കുകയാണ്. പ്രധാനമന്ത്രി നരേന്ദ്രമോദി ഉദ്ഘാടനം നിര്വഹിക്കുമെന്നത് സര്ക്കാര് ഈ മേഖലയ്ക്ക് നല്കുന്ന ഉയര്ന്ന പ്രാധാന്യം അടിവരയിടുന്നു. ന്യൂസിലാന്റും സൗദി അറേബ്യയും പങ്കാളിത്ത രാജ്യങ്ങളായും ജപ്പാന്, യുഎഇ, വിയറ്റ്നാം, റഷ്യ എന്നിവ പ്രധാന രാജ്യങ്ങളായും ഈ പതിപ്പില് പങ്കെടുക്കും. സഹകരണ ഫെഡറലിസത്തിന്റെ മികച്ച ഉദാഹരണമായി 21 സംസ്ഥാനങ്ങളും കേന്ദ്ര ഭരണപ്രദേശങ്ങളും പവലിയനുകളൊരുക്കി പരിപാടിക്ക് നിറംപകരും. പ്രധാന പ്രദര്ശനങ്ങള്ക്കും ബിസിനസ്-ടു-ബിസിനസ് യോഗങ്ങള്ക്കും പുറമെ ഭക്ഷ്യസുരക്ഷാ അതോറിറ്റി നയിക്കുന്ന ആഗോള ഭക്ഷ്യ റെഗുലേറ്റര്മാരുടെ മൂന്നാമത് ഉച്ചകോടിയും എസ്ഇഎഐ-യുടെ 24-ാമത് ഭാരത-അന്താരാഷ്ട്ര കടല്ഭക്ഷ്യവിഭവ പ്രദര്ശനവും വേള്ഡ് ഫുഡ് ഇന്ത്യ പരിപാടിയുടെ ഭാഗമായി സംഘടിപ്പിക്കും.
വേള്ഡ് ഫുഡ് ഇന്ത്യ സംരംഭം പൂര്ണമായും സര്ക്കാര് സംവിധാനത്തിലാണ് പ്രവര്ത്തിക്കുന്നത്. ഭക്ഷ്യസംസ്കരണ മന്ത്രാലയമാണ് ഇതിന് നേതൃത്വം നല്കുന്നത്. മൃഗസംരക്ഷണം, ക്ഷീരവികസനം, മത്സ്യബന്ധനം, വാണിജ്യം, വ്യാവസായിക – ആഭ്യന്തര വ്യാപാര പ്രോത്സാഹന വകുപ്പ്, കാര്ഷിക – കര്ഷക ക്ഷേമം, ആരോഗ്യ കുടുംബക്ഷേമം, ആയുഷ്, വടക്കുകിഴക്കന് മേഖല വികസന വകുപ്പ് തുടങ്ങി വിവിധ മന്ത്രാലയങ്ങളും വകുപ്പുകളുമായി തോളോടുതോള് ചേര്ന്നാണ് ഈ സംരംഭത്തിനായി പ്രവര്ത്തിക്കുന്നത്. ഉല്പാദനം, ഗുണനിലവാരം, വ്യാപാരം, നിക്ഷേപം എന്നിവ ഒരുമിച്ച് മുന്നോട്ടു കൊണ്ടുപോകാന് ഇത് സഹായിക്കുന്നു.
സുസ്ഥിരതയിലൂന്നിയ കാര്ബണ് ബഹിര്ഗമന രഹിത ഭക്ഷ്യസംസ്കരണം, ഭാരതത്തെ ആഗോള ഭക്ഷ്യ സംസ്കരണ കേന്ദ്രമാക്കി ഉയര്ത്തല്, ഭക്ഷ്യ സംസ്കരണത്തിലെയും ഉത്പന്നങ്ങളിലെയും പാക്കേജിങ്ങിലെയും നവസാങ്കേതികവിദ്യകള്, പോഷകാഹാരത്തിനും ആരോഗ്യത്തിനും സംസ്കരിച്ച ഭക്ഷണം ഉറപ്പാക്കല്, ഗ്രാമീണ സമ്പദ്വ്യവസ്ഥ മെച്ചപ്പെടുത്താന് മൃഗസംരക്ഷണവും സമുദ്രോത്പന്നങ്ങളും എന്നിങ്ങനെ അഞ്ച് സുപ്രധാന ലക്ഷ്യങ്ങള് അടിസ്ഥാനമാക്കിയാണ് വേള്ഡ് ഫുഡ് ഇന്ത്യ ആവിഷ്കരിച്ചിരിക്കുന്നത്. ഓരോ വിഷയത്തിലും പ്രത്യേക സെഷനുകളും ബിസിനസ്-ടു-ബിസിനസ് യോഗങ്ങളും പദ്ധതിനിര്വഹണ മാര്ഗങ്ങളും അവതരിപ്പിച്ച് പങ്കാളിത്തം കേവലം ചര്ച്ചകളിലൊതുങ്ങാതെ പ്രായോഗിക തലങ്ങളിലേക്ക് നീങ്ങാന് വഴിയൊരുക്കും.
സിഇഒ വട്ടമേശസമ്മേളനമാണ് പ്രധാന ആകര്ഷണങ്ങളിലൊന്ന്. അതില്, വ്യവസായപ്രമുഖരും നിക്ഷേപകരും നയരൂപകര്ത്താക്കളും തന്ത്രപ്രധാന സംവാദങ്ങളിലൂടെ സഹകരണം പ്രോത്സാഹിപ്പിക്കുകയും മേഖലയിലെ വെല്ലുവിളികള് പരിഹരിക്കാനും
ശ്രമിക്കും. 2024-ല് ഇവിടെ ഉയര്ന്ന ജിഎസ്ടിയുമായി ബന്ധപ്പെട്ട പ്രശ്നങ്ങള് അടുത്ത തലമുറ ജിഎസ്ടി പരിഷ്കാരങ്ങള്ക്കു കാരണമായി. ഇതു നമ്മുടെ സര്ക്കാരിന്റെ കൂടിയാലോചന-പ്രതികരണാത്മക സമീപനത്തെ പ്രതിഫലിപ്പിക്കുന്നു. ജൈവ-സുസ്ഥിര ഉത്പന്നങ്ങളാല് സമ്പന്നമായ നമ്മുടെ വടക്കുകിഴക്കന് മേഖലയ്ക്കും പ്രത്യേക പ്രാധാന്യമേകുന്നു. അസം തേയില മുതല് മേഘാലയയിലെ മഞ്ഞള്വരെ പ്രദര്ശിപ്പിക്കുന്ന പ്രത്യേക പവലിയന് ഇവിടെയുണ്ടാകും. വടക്കുകിഴക്കന് സംസ്ഥാനങ്ങളെ ആഗോളതലത്തില് ഇന്ത്യന് ജൈവ ബ്രാന്ഡുകളുടെ കുതിപ്പിന്റെ കേന്ദ്രമാക്കുക എന്ന പ്രധാനമന്ത്രിയുടെ കാഴ്ചപ്പാടാണ് ഇതുയര്ത്തിക്കാട്ടുന്നത്.
ഫലപ്രദമായ പ്രവര്ത്തനങ്ങളിലാണ് വേള്ഡ് ഫുഡ് ഇന്ത്യയുടെ വിശ്വാസ്യത നിലകൊള്ളുന്നത്. 2017-മുതല്, ഇത് 38,000 കോടിയിലധികം രൂപയുടെ നിക്ഷേപം യാഥാര്ഥ്യമാക്കി. 2024 ലെ പതിപ്പില് 1500-ലധികം പ്രദര്ശകരും 20 രാജ്യങ്ങളുടെ പവലിയനു
മുണ്ടായിരുന്നു. ഇത് 93 ദശലക്ഷം അമേരിക്കന് ഡോളറിന്റെ വ്യാപാര ഓര്ഡറുകള് നേടി. അമ്പതിലധികം പുതിയ സംസ്കരണ യൂണിറ്റുകള് ഉദ്ഘാടനം ചെയ്തു. 25,000 സൂക്ഷ്മസംരംഭങ്ങള്ക്കു സബ്സിഡി ലഭിച്ചു. കൂടാതെ, സ്വയംസഹായസംഘങ്ങളിലെ 70,000 വനിതകള്ക്ക് 245 കോടി രൂപയുടെ സീഡ് മൂലധന സഹായം ലഭിച്ചു. 1100-ലധികം അച്ചാറുകള് ക്യൂആര് കോഡുകളോടെ പ്രദര്ശിപ്പിച്ച പ്രത്യേക ചുവര്, ചെറുകിട ഉല്പ്പാദകര്ക്കു നേരിട്ടുള്ള വിപണിപ്രവേശം സാധ്യമാക്കി.
‘വേള്ഡ് ഫുഡ് ഇന്ത്യ 2025’ ലളിതമായ ആശയത്തെയാണു പ്രതിനിധാനം ചെയ്യുന്നത്. നവീകരണവും നിക്ഷേപവും നിലവാരവും ഒന്നിക്കുമ്പോള് അവിടെ സമൃദ്ധിയുണ്ടാകും. സ്റ്റാര്ട്ടപ്പിന് ആഗോള നിക്ഷേപകനെ സമീപിക്കാന് കഴിയുന്ന ഇടമാണിത്. സ്വയംസഹായസംഘത്തിന് അവരുടെ ജൈവ അച്ചാറുകള്ക്ക് ആവശ്യക്കാരെ കണ്ടെത്താനും സംസ്ഥാനങ്ങള്ക്കു ബഹുരാഷ്ട്ര നിര്മാണശാലകളെ ആകര്ഷിക്കാനും കഴിയുന്ന വേദിയാണിത്. പ്രധാനമന്ത്രി വ്യക്തമാക്കിയതുപോലെ, രാജ്യത്തിന്റെ ഭക്ഷ്യവൈവിധ്യം ഓരോ ആഗോള നിക്ഷേപകന്റെയും സാധ്യതയാണ്. ഈ സാധ്യതകളെ തൊഴിലവസരങ്ങളിലേക്കും, കര്ഷകരുടെ വരുമാനം മെച്ചപ്പെടുത്തുന്നതിലേക്കും, മൂല്യവര്ധിത ഉത്പന്നങ്ങളുടെ കയറ്റുമതി വര്ധിപ്പിക്കുന്നതിലേക്കും പരിവര്ത്തനം ചെയ്യുന്ന കണ്ണിയാണു ഭക്ഷ്യസംസ്കരണം.
ജന്മഭൂമി ഓണ്ലൈന്