നാഗ്പൂര്: ആര്എസ്എസ് ശതാബ്ദി പരിപാടികള്ക്കു വിജയദശമിയോടെ തുടക്കം. വിജയദശമി ദിനം ഒക്ടോബര് രണ്ടിനു രാവിലെ 7.40നു നാഗ്പൂര് രേശിംഭാഗ് മൈതാനത്തെ പൊതുപരിപാടിയില് മുന് രാഷ്ട്രപതി രാംനാഥ് കോവിന്ദ് വിശിഷ്ടാതിഥിയാകുമെന്ന് ആര്എസ്എസ് അഖില ഭാരതീയ പ്രചാര് പ്രമുഖ് സുനില് ആംബേക്കര് വാര്ത്താ സമ്മേളനത്തില് അറിയിച്ചു. സര്സംഘചാലക് ഡോ. മോഹന് ഭാഗവത് വിജയദശമി സന്ദേശം നല്കും.
അതിഥികളായി രാജ്യത്തിനകത്തും പുറത്തുമുള്ള നിരവധി പ്രമുഖര് പങ്കെടുക്കും. ഘാന, ദക്ഷിണാഫ്രിക്ക, ഇന്തോനേഷ്യ, തായ്ലന്ഡ്, യുകെ, യുഎസ്എ തുടങ്ങിയ രാജ്യങ്ങളില് നിന്നു പ്രതിനിധികളെത്തും. റിട്ട. ലഫ്. ജനറല് റാണ പ്രതാപ് കലിത, ഡക്കാണ് ഇന്ഡസ്ട്രീസ് എംഡി കെ.വി. കാര്ത്തിക്, ബജാജ് ഫിന്സര്വ് ചെയര്മാന് സഞ്ജീവ് ബജാജ് തുടങ്ങിയവരും പങ്കെടുക്കും.
നൂറു വര്ഷത്തെ പ്രവര്ത്തനത്തിലൂടെ സംഘം ജനഹൃദയ ഭാഗമായെന്ന് ആംബേക്കര് പറഞ്ഞു. വ്യക്തി നിര്മാണത്തിലൂന്നിയാണ് ഡോ. കേശവ് ബലിറാം ഹെഡ്ഗേവാര് ശാഖാ പ്രവര്ത്തനത്തിനു തുടക്കം കുറിച്ചത്. ഇന്നു രാജ്യമൊട്ടാകെ സംഘ ശാഖകള് വ്യാപിച്ചു. നാഗ്പൂരിലെ ഡോക്ടര്ജിയുടെ വീട്ടില് സംഘത്തിനു തുടക്കം കുറിച്ചു ചേര്ന്ന ആദ്യയോഗത്തില് 17 പേരാണ് പങ്കെടുത്തത്. അവിടെ നിന്ന് ആരംഭിച്ച പ്രവര്ത്തനം ഇന്നു സമൂഹത്തിന്റെ പിന്തുണയും പ്രവര്ത്തകരുടെ പരിശ്രമവും കൊണ്ടു വിശാല രൂപം കൈവരിച്ചെന്ന് ആംബേക്കര് ചൂണ്ടിക്കാട്ടി.
1926 ഏപ്രില് 17ലെ യോഗത്തിലാണ് രാഷ്ട്രീയ സ്വയംസേവക സംഘമെന്ന പേരു സ്വീകരിച്ചത്. 1926 മേയ് 28നു മഹല് മോഹിതേബാഡയില് ആദ്യശാഖ തുടങ്ങി. ഇന്നു രാജ്യത്താകെ 83,000ത്തിലധികം ശാഖകളും 32,000ത്തിലധികം പ്രതിവാര പ്രവര്ത്തനങ്ങളുമുണ്ട്. 1926ലാണ് പൂര്ണ ഗണവേഷത്തിലുള്ള ആദ്യ പഥ സഞ്ചലനം. അതു മോഹിതേബാഡയില് നിന്നാരംഭിച്ചു ഹനുമാന് നഗര് രാജാബക്ഷാ ക്ഷേത്രത്തിലേക്കായിരുന്നു. ആദ്യകാലത്തു വിജയദശമി ഉത്സവം മോഹിതേബാഡയിലായിരുന്നു. പിന്നീട് യശ്വന്ത് സ്റ്റേഡിയത്തിലും അതിനു ശേഷം കസ്തൂരിചന്ദ് പാര്ക്കിലുമായി. 1995 മുതല് രേശിംഭാഗാണ് വിജയദശമി ഉത്സവ വേദി.
2026 വിജയദശമി വരെയാണ് ശതാബ്ദി പരിപാടികള്. സമാജ പരിവര്ത്തനം ലക്ഷ്യമിട്ടു കുടുംബ മൂല്യ, പരിസ്ഥിതി സംരക്ഷണം, സാമാജിക സമരസത, സ്വദേശി, പൗരബോധം എന്നീ അഞ്ചു വിഷയങ്ങളില് ജനജാഗരണം നടത്തും. ഗൃഹ സമ്പര്ക്കം, ഹിന്ദുസമ്മേളനങ്ങള്, പ്രബുദ്ധ പൗര പ്രമുഖ സമ്മേളനം, സദ്ഭാവനാ യോഗങ്ങള്, യുവാക്കളുടെ ഒത്തുചേരലുകള് എന്നിവയാണ് മറ്റു ശതാബ്ദി കാര്യക്രമങ്ങളെന്ന് ആംബേക്കര് പറഞ്ഞു.
വിദര്ഭ പ്രാന്ത സംഘചാലക് ദീപക് താംശേട്ടിവാര്, നാഗ്പൂര് മഹാനഗര് സംഘചാലക് രാജേഷ് ലോയ എന്നിവരും വാര്ത്താ സമ്മേളനത്തില് പങ്കെടുത്തു.
