ലക്നൗ : അയോദ്ധ്യയിൽ മസ്ജിദ് നിർമ്മിക്കാനുള്ള നിർമ്മാണ അപേക്ഷ നിരസിച്ച് അയോധ്യ വികസന അതോറിറ്റി . അധികൃതരിൽ നിന്നുള്ള എൻ ഒ സി ലഭിക്കാത്തതിനെ തുടർന്നാണ് അനുമതി നിഷേധിച്ചത്. അയോധ്യ രാമക്ഷേത്ര കേസിലെ സുപ്രീം കോടതി വിധി അനുസരിച്ച് സംസ്ഥാന സുന്നി സെൻട്രൽ വഖഫ് ബോർഡിന് 5 ഏക്കർ ഭൂമിയാണ് മസ്ജിദിനായി അനുവദിച്ചത്.ധന്നിപൂർ ഗ്രാമത്തിലാണ് പള്ളി പണിയാൻ ഭൂമി അനുവദിച്ചത്.
പൊതുമരാമത്ത്, മലിനീകരണ നിയന്ത്രണം, സിവിൽ വ്യോമയാനം, ജലസേചനം, റവന്യൂ, മുനിസിപ്പൽ കോർപ്പറേഷൻ, ഫയർ സർവീസസ് എന്നിവയുൾപ്പെടെയുള്ള വകുപ്പുകളിൽ നിന്നുള്ള അനുമതികൾ ഇല്ലാത്തതിനാൽ 2021 ജൂൺ 23 ന് നിർദ്ദിഷ്ട പള്ളിയുടെ ട്രസ്റ്റ് സമർപ്പിച്ച അപേക്ഷ നിരസിക്കപ്പെട്ടുവെന്ന് എഡിഎ പറഞ്ഞു.
അയോധ്യ പട്ടണത്തിൽ നിന്ന് ഏകദേശം 25 കിലോമീറ്റർ അകലെയുള്ള സൊഹാവൽ തഹസിലിലെ ധന്നിപൂർ ഗ്രാമത്തിൽ സ്ഥിതി ചെയ്യുന്ന ഭൂമിയുടെ ഉടമസ്ഥാവകാശം ജില്ലാ മജിസ്ട്രേറ്റ് അനുജ് കുമാർ ഝാ കൈമാറിയിരുന്നു . നിർദ്ദിഷ്ട പള്ളിക്കായുള്ള അപേക്ഷാ ഫീസായി 4,02,628 രൂപ പള്ളി ട്രസ്റ്റ് അടക്കുകയും ചെയ്തു.സ്ഥല പരിശോധനയ്ക്കിടെ, അപ്രോച്ച് റോഡിനെക്കുറിച്ച് അഗ്നിശമന വകുപ്പ് ആശങ്കകൾ ഉന്നയിച്ചതായി പള്ളി ട്രസ്റ്റ് സെക്രട്ടറി അത്തർ ഹുസൈൻ പറഞ്ഞു. നിർദ്ദിഷ്ട പള്ളിക്കും ആശുപത്രി കെട്ടിടത്തിനും വേണ്ടിയുള്ള മാനദണ്ഡങ്ങൾ അനുസരിച്ച്, റോഡിന് 12 മീറ്റർ വീതി ഉണ്ടായിരിക്കണം, അതേസമയം സ്ഥലത്തെ റോഡിന് ഏകദേശം ആറ് മീറ്റർ വീതിയും പള്ളിയുടെ പ്രധാന കവാടത്തിൽ നാല് മീറ്റർ വീതിയും മാത്രമേയുള്ളൂ.
നിർമ്മാണ മാനദണ്ഡങ്ങൾ പാലിക്കാൻ കഴിയാത്തതിനാൽ, പള്ളിയുടെ നിർമ്മാണം ഇത്രയും വർഷങ്ങളായി നിർത്തിവച്ചിരിക്കുകയാണ്. 2022 നവംബറിൽ, നിർമ്മാണത്തിന് ആവശ്യമായ 15 തരം നോ ഒബ്ജക്ഷൻ സർട്ടിഫിക്കറ്റുകളിൽ (NOC-കൾ) 14 എണ്ണം ADA ലഭ്യമാക്കിയെങ്കിലും ഇടുങ്ങിയ റോഡ് കാരണം അഗ്നിശമന വകുപ്പിൽ നിന്നുള്ള NOC ലഭിച്ചില്ലെന്ന് ഹുസൈൻ അറിയിച്ചു . പള്ളി ട്രസ്റ്റിന് ലഭിച്ച മൊത്തം സംഭാവനയുടെ 40 ശതമാനം ഹിന്ദുക്കളാണ് നൽകിയത്, അതേസമയം മുസ്ലീങ്ങൾ 30 ശതമാനം മാത്രമേ സംഭാവന ചെയ്തിട്ടുള്ളൂ.
