തിരുവല്ല: ആഗോള അയ്യപ്പ സംഗമത്തിന് ആളെത്താതിരുന്നതോടെ മാലിന്യസംസ്കരണ പ്ലാന്റില് തള്ളിയത് അരക്കോടി രൂപയുടെ ഭക്ഷണം. 5000 ആളുകള് ഉച്ചഭക്ഷണത്തിനുണ്ടാകുമെന്ന് പ്രതീക്ഷിച്ച് തയാറാക്കിയ സദ്യയില് മുക്കാല്പ്പങ്കും ബാക്കിയായി. ഇത് അന്നു രാത്രി തന്നെ പ്രത്യേക തൊഴിലാളികളെ നിയോഗിച്ച് പമ്പയിലെ മാലിന്യസംസ്കരണ പ്ലാന്റില് തള്ളുകയായിരുന്നു. അപ്പോഴേക്കും പല വിഭവങ്ങളും വളിച്ചു ദുര്ഗന്ധം വന്നുതുടങ്ങിയിരുന്നതായി തൊഴിലാളികള് പറഞ്ഞു.
ഉദ്ഘാടനസഭയില് കസേരകള് കാലിയായതോടെ അരി കുറച്ചിട്ടാല് മതിയെന്ന് തീരുമാനമായി. എന്നാല്, അപ്പോഴേക്കും 5,500 പേര്ക്ക് സുഭിക്ഷമായി വിളമ്പാനുള്ള കറികള് പാചകപ്പുരയില് തയാറായിരുന്നു. നെയ്യ്, പരിപ്പ്, സാമ്പാര്, കുറുക്കുകാളന്, മോര്, അവിയല്, തീയല്, തോരന് എന്നിവയുള്പ്പെടെ ഒന്പത് കൂട്ടം കറിയും തൊടുകറികളും പാലട പ്രഥമനും ചേര്ന്ന വിഭവ സമൃദ്ധമായ സദ്യയാണ് പഴയിടം മോഹനന് നമ്പൂതിരിയും സംഘവും തയാറാക്കിയത്. ആഗോള സംഗമം അമ്പേ പാളിയതോടെ അന്നദാന പ്രഭുവിന്റെ പേരില് തയാറാക്കിയ അതീവ രുചികരമായ സദ്യ ആകെ പാഴായി. ഉച്ചഭക്ഷണത്തിനു മാത്രം 30 ലക്ഷം രൂപയോളം ചെലവായെന്നാണ് പ്രാഥമിക വിവരം.
ഇഡ്ഡലിയും ദോശയും ഉള്പ്പെട്ടതായിരുന്നു പ്രഭാത ഭക്ഷണം. ഉണ്ടാക്കിയ പ്രാതല് മാത്രമല്ല, ഒടുവില് മാവടക്കം ഉപേക്ഷിക്കേണ്ടി വന്നു. 4000 പേര്ക്കാണ് പ്രഭാത ഭക്ഷണമുണ്ടാക്കിയത്. ചായയും കാപ്പിയും കൂടാതെ പാല് ചേര്ത്ത കോണ്ഫേ്ലക്സുമുണ്ടായിരുന്നു. അതും വെറുതേയായി.
വൈകിട്ടത്തേക്ക് തയാറാക്കിയ 5000 പേര്ക്കുള്ള ചായയും ഉഴുന്നുവടയും കഴിക്കാന് ആളേയുണ്ടായില്ല. ഇതര സംസ്ഥാനങ്ങളില് നിന്നെത്തുന്നവര്ക്ക് തയാറാക്കിയ വെജിറ്റബിള് പുലാവും ചില്ലി ഗോബിയും അതേപടി ഉപേക്ഷിച്ചു. 3000 പേരെ അത്താഴത്തിന് പ്രതീക്ഷിച്ചെങ്കിലും കഴിച്ചവര് 100 കടന്നില്ല. ഫുല്ക്ക റൊട്ടിയും പനീര് ബട്ടറും വെജിറ്റബിള് സാലഡുമായിരുന്നു അത്താഴത്തിന്.
