തിരുവനന്തപുരം: സി പി എം നേതാവ് കെ ജെ ഷൈനെതിരെ സൈബര് ആക്രമണം നടത്തിയെന്ന പരാതിയില് രണ്ടാം പ്രതി കെ എം ഷാജഹാന്റെ വീട്ടില് പൊലീസ് പരിശോധന നടത്തി. ഉള്ളൂര് ചെറുവയ്ക്കലിലെ വീട്ടിലാണ് പൊലീസ് പരിശോധന നടന്നത്. രാത്രി 9 മണിയോടെ പറവൂര് സിഐയുടെ നേതൃത്വത്തിലുള്ള സംഘം ഷാജഹാന്റെ വീട്ടില് തുടങ്ങിയ പരിശോധന രണ്ട് മണിക്കൂര് നീണ്ടു നിന്നു.
ഷാജഹാന്റെ ഐഫോണ് പൊലീസ് കസ്റ്റഡിയില് എടുത്തു. ഇവ ഉപയോഗിച്ചാണ് ഷാജഹാന് വീഡിയോ അപ്ലോഡ് ചെയ്തിരുന്നത്. യൂട്യൂബ് വീഡിയോ ദൃശ്യങ്ങള് വീട്ടില്വെച്ചാണോ ചിത്രീകരിച്ചതെന്ന് ആരാഞ്ഞ പൊലീസ് ഇവ ചിത്രീകരിക്കാന് ഉപയോഗിച്ച ക്യാമറ, ലാപ്ടോപ്പ് എന്നിവ പരിശോധിച്ചു. ചൊവ്വാഴ്ച ഉച്ചയ്ക്ക് ശേഷം ആലുവ സൈബര് ക്രൈം ഓഫീസില് ചോദ്യം ചെയ്യലിന് ഹാജരാകാന് നിര്ദ്ദേശം നല്കി.
കെ ജെ ഷൈനിന്റെ പരാതിയില് മാത്രമല്ല മറ്റ് മൂന്ന് ഇടത് എംഎല്എമാര് കൂടി നല്കിയ പരാതി കണക്കിലെടുത്താണ് ഷാജഹാനെ കേസില് പ്രതി ചേര്ത്തത്. യൂട്യൂബ് വീഡിയോയിലൂടെ അധിക്ഷേപിക്കുകയും ലൈംഗികപരമായി പരാമര്ശം നടത്തുന്നു എന്നുമുളള പരാതിയിലാണ് ജാമ്യമില്ലാ വകുപ്പ് പ്രകാരം കെ എം ഷാജഹാനെതിരെ കേസ് രജിസ്റ്റര് ചെയ്തത്.
കെ ജെ ഷൈനിനെതിരായ സൈബര് ആക്രമണത്തില് ചോദ്യം ചെയ്യലിന് ഹാജരാകാന് പ്രാദേശിക കോണ്ഗ്രസ് നേതാവ് സി കെ ഗോപാലകൃഷ്ണനും നോട്ടീസ് നല്കിയിട്ടുണ്ട്.
