പത്തനംതിട്ട: കേരളത്തിലെ രൂക്ഷമായ കാര്ഷിക പ്രതിസന്ധി പഠിക്കാന് കേന്ദ്രസര്ക്കാര് നിയോഗിച്ച രണ്ടാമത്തെ വിദഗ്ധസംഘം നാളെയെത്തും. നാല് ദിവസം സംസ്ഥാനത്തു ചെലവഴിക്കുന്ന സംഘം ആലപ്പുഴ, തൃശൂര്, പാലക്കാട് എന്നീ ജില്ലകളില് പര്യടനം നടത്തും. നാളെ ഉച്ചയ്ക്ക് 2ന് കൊച്ചി സിഎംഎഫ്ആര്ഐയില് ബിജെപി സംസ്ഥാനാധ്യക്ഷന് രാജീവ് ചന്ദ്രശേഖറിന്റെ സാന്നിധ്യത്തില് സംയുക്ത കര്ഷക വേദി ഭാരവാഹികളും കാര്ഷിക രംഗത്തെ വിദഗ്ധരുമായി കൂടിക്കാഴ്ച നടത്തും.
24ന് രാവിലെ 8ന് കുട്ടനാട് മങ്കൊമ്പിലേയും പരിസര പ്രദേശങ്ങളിലെ പാടശേഖരങ്ങളും അപ്പര് കുട്ടനാട്ടിലെ പെരിങ്ങര, തിരുവല്ല, കരിപ്പുഴ പ്രദേശങ്ങളിലെ പാടശേഖരങ്ങളും സന്ദര്ശിക്കും. കര്ഷക കൂട്ടായ്മകള് സംഘടിപ്പിക്കുന്ന യോഗത്തിലും വിദഗ്ധസംഘം പങ്കെടുക്കും. കുട്ടനാടിന്റെ സമഗ്ര വികസനത്തിന് ‘ഗ്രേറ്റര് കുട്ടനാട് വികസന അതോറിറ്റി’ എന്ന ആശയം കേന്ദ്ര പഠന സംഘത്തിന് മുമ്പില് സമര്പ്പിക്കുമെന്ന് കേരള സംയുക്ത കര്ഷക വേദി ജനറല് കണ്വീനര് ഷാജി രാഘവന് പറഞ്ഞു.
25-ന് ഉച്ചക്ക് തൃശൂര് ജില്ലയിലെ വിവിധ സ്ഥലങ്ങള് സന്ദര്ശിക്കുന്ന സംഘം മണ്ണുത്തി അഗ്രികള്ച്ചര് യൂണിവേഴ്സിറ്റിയില് കര്ഷക പ്രതിനിധികളുമായി കൂടിക്കാഴ്ച നടത്തും. 26ന് രാവിലെ മുതല് പാലക്കാട് ജില്ലയിലെ വിവിധ കാര്ഷിക മേഖലകള് സന്ദര്ശിച്ച് കര്ഷകരുമായി ആശയവിനി
മയം നടത്തും.
കേരളത്തിലെ തകര്ന്നടിഞ്ഞ കാര്ഷിക മേഖലയെ കുറിച്ച് ബിജെപി ദേശീയ നിര്വാഹക സമിതി അംഗം കുമ്മനം രാജശേഖരനും സംസ്ഥാന ഉപാധ്യക്ഷന് സി. കൃഷ്ണകുമാറും കര്ഷക മോര്ച്ച സംസ്ഥാന അധ്യക്ഷന് ഷാജിരാഘവനെയും പഠനം നടത്തി കേന്ദ്രകൃഷി മന്ത്രി അടക്കം അഞ്ച് കേന്ദ്രമന്ത്രിമാര്ക്ക് വിശദമായ റിപ്പോര്ട്ട് സമര്പ്പിച്ചതിന്റെ അടിസ്ഥാനത്തിലാണ് കേന്ദ്ര പഠനസംഘം കേരളത്തില് രണ്ടാംവട്ട പര്യടനം നടത്തുന്നത്.
നാഷണല് ഫിഷറീസ് വികസന ബോര്ഡ് ചെയര്മാന് ഡോ. മുഹമ്മദ് കോയ, കേന്ദ്ര മത്സ്യ ഗവേഷണ കേന്ദ്രത്തിന്റെ പ്രിന്സിപ്പല് ഡോ. ഇമല്ഡ ജോസഫിന്റെയും നേതൃത്വത്തില് കേന്ദ്രസര്ക്കാര് നിയോഗിച്ച പഠന സംഘം കഴിഞ്ഞ മാസം കേരളം സന്ദര്ശിച്ചിരുന്നു. ‘ഒരു നെല്ലും ഒരു മീനും’ പദ്ധതിക്ക് ആവശ്യമായ സഹായം ചെയ്യാനുള്ള തീരുമാനമെടുത്താണ് വിദഗ്ധസംഘം അന്ന് മടങ്ങിയത്.
രണ്ടാമത്തെ വിദഗ്ധ സംഘത്തിന്റെ പര്യടനവും പഠനവും പൂര്ത്തിയായാല് വൈകാതെ കേന്ദ്ര കൃഷി, കര്ഷകക്ഷേമ മന്ത്രി ശിവരാജ് സിങ് ചൗഹാന് കേരളം സന്ദര്ശിക്കുമെന്ന് കേരള സംയുക്ത കര്ഷവേദി സംസ്ഥാന ജനറല് സെക്രട്ടറിയും കര്ഷകമോര്ച്ച സംസ്ഥാന പ്രസിഡന്റുമായ ഷാജി രാഘവന്, സി. കൃഷ്ണകുമാര്, ചെയര്മാന് എന്.പി. കൃഷ്ണപ്രസാദ് എന്നിവര് അറിയിച്ചു.
