ഇസ്ലാമബാദ്: ഓപ്പറേഷന് സിന്ദൂറിന് ശേഷം പ്രവര്ത്തിക്കാന് ഫണ്ടില്ല, പാക് ഭീകര സംഘടനയായ ജെയ്ഷ ഇ മുഹമ്മദിന്റെ പേര് അല്- മുറാബിത്തുന് എന്ന് മാറ്റി. ഭാരതത്തിന്റെ സൈനിക നടപടിയില് തകര്ന്ന ആസ്ഥാനം പുനര്നിര്മിക്കണമെങ്കില് പുറത്തുനിന്നും സാമ്പത്തിക സഹായങ്ങള് വേണം.
ഫിനാന്ഷ്യല് ആക്ഷന് ടാസ്ക് ഫോഴ്സും (എഫ്എടിഎഫ്) നടപടി ശക്തമാക്കിയതോടെയാണ് ജെയ്ഷയുടെ പേര് മാറ്റാന് തീരുമാനിച്ചത്.
ഓപ്പറേഷന് സിന്ദൂറിനിടെ തകര്ന്ന ബഹാവല്പൂരിലുള്ള ജാമിയ മസ്ജിദ് സുബ്ഹാന് അള്ളാഹ് എന്ന ജെയ്ഷെ മുഹമ്മദിന്റെ ആസ്ഥാനം പുനര് നിര്മിക്കണമെങ്കില് വന് തോതില് വിദേശത്തു നിന്നും സാമ്പത്തിക സഹായങ്ങള് വേണം. എഫ്എടിഎഫിന്റെ നിരോധനം നിലനില്ക്കുന്നതിനാല് യുപിഐ അടക്കമുള്ള ഡിജിറ്റല് പണമിടപാടുകള് നടത്താനാകില്ല. ഈ പശ്ചാത്തലത്തിലാണ് പേര് മാറ്റാന് നിശ്ചയിച്ചത്.
ഇസ്ലാമിക പോരാളികള് എന്നാണ് അല്- മുറാബിത്തുന്റെ അറബിയിലെ അര്ത്ഥം. ഓപ്പറേഷന് സിന്ദൂറില് കൊല്ലപ്പെട്ട ജെയ്ഷെ മുഹമ്മദ് സ്ഥാപകന് മസൂദ് അസറിന്റെ സഹോദരന് യൂസഫ് അസറിനായി നിര്മിക്കുന്ന സ്മാരകത്തിലും അല്- മുറാബിത്തുന് എന്നാണ് നല്കുന്നത്.
അതേസമയം യൂസഫിന്റെ അനുസമരണ ചടങ്ങുകള് എന്ന പേരില് അല്- മുറാബിത്തുനിലേക്ക് ആളുകളെ റിക്രൂട്ട് ചെയ്യാനും ഫണ്ട് സമാഹരണത്തിനുമായി 25ന് യോഗം സംഘടിപ്പിക്കുന്നുണ്ട്.
പെഷവാറിലെ മര്കസ് ഷഹീദ് മസൂദാബാദിലാണ് യോഗം നടക്കുക. ജെയ്ഷ ഇ മുഹമ്മദിന്റെ മുതിര്ന്ന കമാന്ഡര്മാരും അംഗങ്ങളും പങ്കെടുക്കുന്നുണ്ടെന്നാണ് സൂചന.
