മുഷ്ടി മെല്ലെ ചുരുട്ടി ചെറിയൊരു ഉള്ഭയത്തോടെ ദേവസ്വം പ്രസിഡന്റ് ഉറക്കെ വിളിച്ചു: ”സ്വാമിയേ ശരണമയ്യപ്പ”. പമ്പയില്നിന്നും പതിവില്ലാത്ത ഒരു മുദ്രാവാക്യം കേട്ട് അയ്യപ്പനും ശ്രദ്ധിച്ചു.
കടലിനും ചെകുത്താനും ഇടയിലെന്ന സ്ഥിതിയിലായി അയ്യപ്പ കോണ്ക്ലേവ്. ഒരുവശത്ത് മഹര്ഷി മാര്ക്സ്. വിപ്ലവം. മറു
വശത്ത് തെരഞ്ഞെടുപ്പ്; അധികാരം. ആര്ക്കും നാവു പിഴച്ചുപോകും. കാലിടറിപ്പോകും. കല്ലും മുള്ളും കാലുക്ക്…
പഠിച്ച പണി പതിനെട്ടും നോക്കിയിട്ടും പതിനെട്ടാം പടി കയറാനാവുന്നില്ല. ഗീതയും ഉപനിഷത്തുമൊക്കെ പണ്ടേ നിഷിദ്ധമാണ്. ശബരിയുടെ ചരിത്രം അധഃസ്ഥിതരുടേതാണെന്ന കാര്യം ഓര്മ്മപ്പെടുത്തി. ഒന്നിനേയും ദ്വേഷിക്കാത്ത, എല്ലാവരിലും ദയയുള്ള, സുഖദുഃഖങ്ങളില് ഭാവഭേദമില്ലാത്ത, എന്തും ക്ഷമിക്കുന്ന വ്യക്തിയാണ് യഥാര്ത്ഥ ഭക്തനെന്ന ഗീതാവചനം പറയുമ്പോള് ഉള്ളൊന്നു കിടുങ്ങി. (സ്വന്തം പാര്ട്ടിക്കാരോടും ദയയുള്ള, സുഖദുഃഖങ്ങളില് നല്ല ഭാവഭേദമുള്ള, തീരെ ക്ഷമയില്ലാത്ത ഒരാളാണിത് പറയുന്നതെന്നത് അയ്യപ്പസ്വാമി ക്ഷമിക്കട്ടെ.) സാക്ഷാല് ഗുരുസ്വാമിയാണ് വെള്ളാപ്പള്ളിയെന്നൊരാള്. സാക്ഷാല് അയ്യപ്പഭക്തന്, പെരിയ സ്വാമിയെന്ന് മറ്റേയാള്. മൊത്തത്തില് ഒരു തത്ത്വമസി! അതു നീതന്നെ!
സദസ്സില് ആയിരക്കണക്കിന് കസേരകള് പ്രസംഗം ആദ്യവസാനം കാത് കൂര്പ്പിച്ച് നിശ്ചലമായി കേട്ടിരുന്നു. അങ്ങനെ കോണ്ക്ലേവ് വന് വിജയമായി. ശബരിമല വികസന ചര്ച്ചകളും പൊടി പൊടിച്ചു!
ഈ വിജയത്തിന്റെ പശ്ചാത്തലത്തില് കേരളത്തിലുടനീളം കോണ്ക്ലേവുകള് സംഭവിക്കാനിടയുണ്ടെന്ന് കേള്ക്കുന്നു. ഉടനെ തന്നെ ഗുരുവായൂര്, ചോറ്റാനിക്കര, പറശ്ശിനിക്കടവ്, മലയാറ്റൂര്, എരുമേലി, അര്ത്തുങ്കല്, കാഞ്ഞിരമറ്റം തുടങ്ങിയ മതേതര കോണ്ക്ലേവുകള് നടന്നേക്കാം. അതോടെ മതാതീത ആത്മീയത ഇവിടെ തഴച്ചുവളരും.
അമ്മേ തല്ലിയാലും രണ്ടുപക്ഷം എന്നപോലെയാണ് പ്രതിപക്ഷത്തിന്റെ കാര്യം എന്നു സമാധാനിക്കാം. ഇരുമുടിക്കെട്ടുമായി മല ചവിട്ടുന്ന സ്വാമിമാരുടെ പേരുവിവരങ്ങള് ചേര്ത്താണ് ലിസ്റ്റ് പെരുപ്പിച്ചതെന്ന് പറയുന്ന ചെന്നിത്തലയേയും കണക്കിലെടുക്കേണ്ട. അതുപോലെയാണോ ഇടതുപക്ഷ മുന്നണിയിലെ രണ്ടാം കക്ഷിയുടെ ഒന്നാമനായ സാംസ്കാരിക നേതാവിന്റെ കണ്ണൂര് പ്രസംഗം. പുനരുദ്ധാന ഫാസിസം എന്ന സാംക്രമികരോഗം പുരോഗമന പ്രസ്ഥാനങ്ങളെ ആകെത്തന്നെ ഗ്രസിച്ചു എന്നൊക്കെ ചങ്കില് കൊള്ളും വിധം പറഞ്ഞാല് ആലങ്കോടല്ല, എത്ര വലിയ സാംസ്കാരിക നേതാവായാലും അത് ശരിയാവില്ല.
ഭരണത്തിനെതിരെ, പോലീസിനെതിരെ, അഴിമതിക്കെതിരെ ഉണര്ന്നിരിക്കുന്നവരെ ഹരിവരാസനം പാടി ഉറക്കുകയേ വഴിയുള്ളൂ. തെരഞ്ഞെടുപ്പ് വന്ന് പടിവാതിലില് മുട്ടുമ്പോള് എല്ലാവരും അയ്യപ്പന് മുഷ്ടി ചുരുട്ടി ശരണം വിളിച്ച്, ചുവപ്പുപട്ടുടുത്ത് പാര്ട്ടികള് സിന്ദാബാദ് വിളിച്ച്, വാര്ഡുതോറും നടക്കാനിരിക്കുന്ന കോണ്ക്ലേവുകളില് പങ്കെടുത്ത് വിജയിപ്പിക്കണേ എന്നാണഭ്യര്ത്ഥന.
ജന്മഭൂമി ഓണ്ലൈന്