തിരുവനന്തപുരം: സ്വര്ണപ്പാളികള് കാണാതായ സംഭവത്തില് ദേവസ്വം മന്ത്രിയുടെ മൗനം കുറ്റകരമെന്ന് ബി ജെ പി ദേശീയ നിര്വാഹക സമിതിയംഗം കുമ്മനം രാജശേഖരന്. തദ്ദേശ – നിയമസഭാ തെരഞ്ഞെടുപ്പ് അടുത്തതിന്റെ ഗിമ്മിക്കാണ് അയ്യപ്പ സംഗമം.ഏഴു കോടി രൂപ ചിലവഴിച്ച് പമ്പയില് അയ്യപ്പ സംഗമം നടത്തണ്ടേ യാതൊരു ആവശ്യമില്ലെന്നും ശബരിമല വികസനത്തിനായി ഇതുവരെ ലഭിച്ചതും ചിലവഴിച്ചതുമായ ഫണ്ടിനെപ്പറ്റി ധവളപത്രം പുറത്തിറക്കാന് സര്ക്കാരും ബോര്ഡും തയ്യാറാവണമെന്നും കുമ്മനം രാജശേഖരന് വാര്ത്താ സമ്മേളനത്തില് ആവശ്യപ്പെട്ടു.
ശബരിമല വികസനത്തിനായി ദേവസ്വം ബോര്ഡിന്റെ കയ്യിലുള്ള മാസ്റ്റര് പ്ലാനെ കുറിച്ച് ദേവസ്വം മന്ത്രിയും സര്ക്കാരും ഒന്നും പറയുന്നില്ല. കേന്ദ്രസര്ക്കാര് അടിസ്ഥാന വികസനങ്ങള്ക്ക് വേണ്ടി 300 കോടി രൂപ ശബരിമലയില് നല്കിയിട്ടുണ്ട്. അതൊന്നും വേണ്ടവിധം കൈകാര്യം ചെയ്തിട്ടില്ല. ശബരിമലയില് ലഭിച്ച പണത്തെപ്പറ്റി വെളിപ്പെടുത്താന് സര്ക്കാര് തയാറുണ്ടോ. സ്വര്ണപ്പാളി കാണാതായ സംഭവം അയ്യപ്പന്മാരുടെ ഹൃദയത്തില് വേദന ഉണ്ടാക്കിയെന്നും കുമ്മനം രാജശേഖരന് പറഞ്ഞു.
ശബരിമല മാസ്റ്റര് പ്ലാന് നടപ്പാക്കാത്തവര് ശബരി റെയില് പദ്ധതി നടപ്പാക്കാനും മുന്കൈയെടുത്തിട്ടില്ല. സ്ഥലം കണ്ടെത്തി കൊടുക്കുക മാത്രമാണ് സംസ്ഥാന സര്ക്കാരിന്റെ ഉത്തരവാദിത്വം. എന്നാല് കേന്ദ്രസര്ക്കാരിനോട് സഹകരിക്കാതെ ശബരീ റയില് പദ്ധതിയില് നിന്നും മാറി ചിന്തിക്കുകയാണ് സംസ്ഥാന സര്ക്കാര്. ശബരിമല തീര്ത്ഥാടകര്ക്കായി ഒരു സമാന്തര റോഡിനെ പറ്റി ചര്ച്ച ചെയ്യാന് പോലും ഇവര്ക്ക് ആയിട്ടില്ല. പുണ്യം പൂങ്കാവനം പദ്ധതി നിര്ത്തിവച്ചവര്ക്ക് ക്ഷേമപ്രവര്ത്തനം നടത്താന് എന്ത് ധാര്മിക അവകാശമാണുള്ളതെന്ന് കുമ്മനം ചോദിച്ചു.
