സൈബര്‍ തട്ടിപ്പില്‍ 11 ലക്ഷം രൂപ നഷ്ടമായി, മനോവിഷമത്തില്‍ വീടുവിട്ട പ്രേമ പിന്നെ എങ്ങുപോയി?

പാലക്കാട്: സൈബര്‍ തട്ടിപ്പിലൂടെ 11 ലക്ഷം രൂപ നഷ്ടമായ വീട്ടമ്മയെ കാണാതായി. കടമ്പഴിപ്പുറം ആലങ്ങാട്ട് ചല്ലിയില്‍ ബാലസുബ്രഹ്‌മണ്യന്റെ ഭാര്യ പ്രേമ(61)യെയാണ് കാണാതായത്. 15 കോടി രൂപയുടെ സമ്മാനം ലഭിച്ചിട്ടുണ്ടെന്നു വിശ്വസിപ്പിച്ചാണ് സര്‍വീസ് ചാര്‍ജായി 11 ലക്ഷം രൂപ തട്ടിപ്പുകാര്‍ പ്രേമയില്‍ നിന്ന് ബാങ്ക് ട്രാന്‍സ്ഫര്‍ ചെയ്യിച്ചത്. ഈ സംഭവത്തില്‍ അന്വേഷണം നടന്നുവരികയാണ്. വന്‍തുക നഷ്ടപ്പെട്ടതോടെ പ്രേമ ഡിപ്രഷനിലായിരുന്നു. 13-ന് രാത്രി വീട്ടില്‍ നിന്നിറങ്ങി നടന്നു പോകുന്നത് സമീപത്തെ സിസിടിവിയില്‍ പതിഞ്ഞിട്ടുണ്ട്. പിറ്റേന്ന് പുലര്‍ച്ചെ ഗുരുവായൂര്‍ക്കുള്ള ബസില്‍ കയറിയതിനും ദൃക്‌സാക്ഷികളുണ്ട്.
ഇളംപച്ചയും വെള്ളയും കലര്‍ന്ന നിറത്തിലുള്ള ചുരിദാറാണ് വീടുവിട്ടിറങ്ങുമ്പാ ഇവര്‍ ധരിച്ചിരുന്നത്. എന്തെങ്കിലും വിവരം ലഭിക്കുന്നവര്‍ അടുത്തുള്ള പോലീസ് സ്റ്റേഷനിലോ 9048412976 എന്ന നമ്പറിലോ അറിയിക്കണമെന്ന് പൊലീസ് അഭ്യര്‍ത്ഥിച്ചു.