കോഴിക്കോട് : സംസ്ഥാനത്ത് ഒരാള്ക്ക് കൂടി അമീബിക് മസ്തിഷ്ക ജ്വരം സ്ഥിരീകരിച്ചു.രോഗം സ്ഥിരീകരിച്ച 59കാരന് കോഴിക്കോട് മെഡിക്കല് കോളേജ് ആശുപത്രിയില് ചികിത്സയിലാണ്. കോഴിക്കോട് ആകെ 12 പേരാണ് അമീബിക് മസ്തിഷ്ക ജ്വരം ബാധിച്ച് ചികിത്സയിലുള്ളത്.
അതിനിടെ, അമീബിക് മസ്തിഷ്കജ്വരം പടരുന്ന പശ്ചാത്തലത്തില് പൊലീസ് ജലപീരങ്കി ഉപയോഗിക്കുന്നതില് മാര്ഗനിര്ദേശം നല്കണമെന്ന് ആവശ്യപ്പെട്ട് യൂത്ത് കോണ്ഗ്രസ് എറണാകുളം വൈസ് പ്രസിഡന്റ് സല്മാന് മനുഷ്യാവകാശ കമ്മീഷനില് പരാതി നല്കി.ജലപീരങ്കളില് ഉപയോഗിക്കുന്ന വെള്ളം ശുദ്ധജലം ആണോ എന്ന് എന്ന് ഉറപ്പ് വരുത്തണം എന്നാണ് പരാതിയിലെ ആവശ്യം.
സമരങ്ങള്ക്കെതിരെ പ്രയോഗിക്കുന്ന ജലപീരങ്കിയിലെ വെള്ളത്തിനു മഞ്ഞയോ മണ്ണിന്റേയോ നിറമാണ്. ഇത് ഏതെങ്കിലും കുളത്തിലെയോ പൊതുജലാശയത്തിലെയോ വെള്ളമായിരിക്കുമെന്ന് ചൂണ്ടിക്കാട്ടിയാണ് പരാതി നല്കിയിരിക്കുന്നത്.
ഇക്കാര്യത്തില് സംസ്ഥാന പൊലീസ് മേധാവിക്കും പരാതി നല്കിയിരുന്നു. ശക്തമായി വെള്ളം ചീറ്റുമ്പോള് മൂക്കില് ജലം കയറാനുള്ള സാധ്യത കൂടുതലാണ്.സംസ്ഥാനത്തെ കുളങ്ങളും കിണറുകളും ഉള്പ്പെടെ ജലസ്രോതസുകള് ശുദ്ധീകരിക്കാന് സര്ക്കാര് നിര്ദ്ദേശിച്ചിട്ടുളള സാഹചര്യത്തിലാണ് ആശങ്കയുളളത്.
