തിരുവനന്തപുരം: ഉപകരണക്ഷാമത്തെ തുടര്ന്ന് ശസ്ത്രക്രിയ മുടങ്ങുന്ന സാഹചര്യം പതിവായതിനാല് മെഡിക്കല് കോളജ് സൂപ്രണ്ടായി തുടരാന് താല്പര്യമില്ലെന്ന് ഡോ. സുനില്കുമാര് വ്യക്തമാക്കി. രോഗികളെക്കൊണ്ട് ഉപകരണങ്ങള് വാങ്ങിപ്പിക്കുന്നതിനെ വിമര്ശിച്ച് മന്ത്രി വീണാ ജോര്ജ് നിയമസഭയില് സംസാരിച്ചതിന്റെ തൊട്ടടുത്ത ദിവസമാണ് സ്ഥാനമൊഴിയാന് താല്പര്യം പ്രകടിപ്പിച്ചതെന്നതും ശ്രദ്ധേയം. സര്ക്കാര് കുടിശിക തീര്ത്ത് നല്കാതെ ഉപകരണങ്ങള് നല്കില്ലെന്ന് വിതരണക്കാര് കടുത്ത നിലപാടെടുത്തതോടെയാണ് മെഡിക്കല് കോളജില് ഉപകരണക്ഷാമം രൂക്ഷമായത്.
യൂറോളജി വിഭാഗത്തിലെ ശസ്ത്രക്രിയാ ഉപകരണക്ഷാമം ചൂണ്ടിക്കാട്ടിയ ഡോ. ഹാരീസിനെതിരെ സര്ക്കാര് പ്രതികാര നടപടിയോടെ നടത്തിയ നീക്കങ്ങളില് ആരോഗ്യവകുപ്പിനൊപ്പം നിന്ന ആളാണ് ഡോ. സുനില്കുമാര്. കഴിഞ്ഞദിവസം മെഡിക്കല് കോളജില് ഉപകരണക്ഷാമത്തെ തുടര്ന്ന് ഹൃദയശസ്ത്രക്രിയകള് നടത്താനാകില്ലെന്നും ഗുരുതര പ്രതിസന്ധിയാണെന്നും കാണിച്ച് കാര്ഡിയോളജി വിഭാഗം മേധാവിയും കത്തു നല്കിയിരുന്നു. ഉപകരണങ്ങള് രോഗികളെക്കൊണ്ട് വാങ്ങിപ്പിച്ച് ശസ്ത്രക്രിയ നടത്തി ജീവന് രക്ഷിക്കുന്നതിനെതിരെ മന്ത്രി പരസ്യമായി രംഗത്തുവരികയും ചെയ്തു. സൂപ്രണ്ട് സ്ഥാനത്ത് തുടരുന്നതിനാല് ന്യൂറോളജി വിഭാഗത്തിലെ ഡോക്ടറായ തനിക്ക് ജോലിയില് ശ്രദ്ധിക്കാന് കഴിയുന്നില്ലെന്ന് കാട്ടിയാണ് പ്രിന്സിപ്പലിന് കത്തു നല്കിയത്. എന്നാല് ഉപകരണങ്ങള് ലഭ്യമാക്കാന് വേണ്ട നടപടികള് സ്വീകരിക്കാതിരിക്കുകയും ചെയ്തതിനാല് സൂപ്രണ്ട് സ്ഥാനത്തുനിന്ന് മാറാന് താല്പര്യം അറിയിച്ച് ഡോ. സുനില്കുമാര് കത്തു നല്കിയതെന്നാണ് സൂചന.
