കണ്ണൂര്: ആഗോള അയ്യപ്പ സംഗമത്തില് പങ്കെടുക്കാന് മലബാറിലെ ക്ഷേത്ര ജീവനക്കാര്ക്കും ഉദ്യോഗസ്ഥര്ക്കും മലബാര് ദേവസ്വം ബോര്ഡ് പ്രസിഡന്റുള്പ്പെടെയുള്ളവര്ക്കും ബോര്ഡ് കമ്മിഷണറുടെ നിര്ദേശം. ക്ഷേത്ര ജീവനക്കാരെയും ഉദ്യോഗസ്ഥരെയും ബോര്ഡ് അംഗങ്ങളെയും വാഹനങ്ങളില് പമ്പയിലെത്തിക്കുന്നതിനും അവരുടെ മൂന്നു ദിവസത്തെ ചെലവും ദേവസ്വവും ക്ഷേത്രങ്ങളും വഹിക്കാനും ഉത്തരവില് പറയുന്നു.
ക്ഷേത്രം ട്രസ്റ്റിമാര്, ബോര്ഡ് ഏരിയ കമ്മിറ്റി അംഗങ്ങള് എന്നിവരുടെ ചെലവ് ദേവസ്വം ബോര്ഡ് ഫണ്ടില് നിന്നും ജീവനക്കാരുടേത് ക്ഷേത്ര ഫണ്ടില് നിന്നുമെടുക്കാന് അനുമതി നല്കാനും ഉത്തരവില് പറയുന്നു.
എ ഗ്രേഡ് ക്ഷേത്രങ്ങളൊഴികെ ബി, സി, ഡി ഗ്രേഡ് കാറ്റഗറികളിലെ മിക്ക ക്ഷേത്രങ്ങളിലും ഒരു വര്ഷത്തിലധികമായി ജീവനക്കാരുടെ ശമ്പളം കുടിശികയാണ്. ഇതിനിടെയാണ് ക്ഷേത്ര ഫണ്ട് ഉപയോഗിച്ച് അയ്യപ്പ സംഗമത്തില് പങ്കെടുക്കണമെന്ന് ബോര്ഡ് തീരുമാന പ്രകാരം കമ്മിഷണര് നിര്ദേശിച്ചിരിക്കുന്നത്.
മലബാര് ദേവസ്വം ബോര്ഡ് പ്രസിഡന്റ്, കമ്മിഷണര്, മെംബര്മാര്, ഉദ്യോഗസ്ഥര് ഉള്പ്പെടെയുള്ള പ്രതിനിധികളെ പങ്കെടുപ്പിക്കുന്നതിന്
അഭ്യര്ത്ഥിച്ച് തിരുവിതാംകൂര് ദേവസ്വം ബോര്ഡ് നല്കിയ കത്തിന്റെയും ദേവസ്വം മന്ത്രി വിളിച്ചുചേര്ത്ത യോഗത്തിലെ നിര്ദേശത്തിന്റെയും അടിസ്ഥാനത്തിലാണ് തീരുമാനമെന്ന് ഉത്തരവില് ചൂണ്ടിക്കാട്ടുന്നു.
മലബാറിലെ ക്ഷേത്രങ്ങളില് ഭക്തര് സമര്പ്പിക്കുന്ന വഴിപാടുകളില് നിന്നും ഭണ്ഡാര സമര്പ്പണങ്ങളില് നിന്നും പണമെടുക്കാനാണ് മലബാര് ദേവസ്വം കമ്മിഷണര്, ബോര്ഡ് ഉദ്യോഗസ്ഥര്ക്കും എക്സിക്യൂട്ടീവ് ഓഫീസര്മാര്ക്കും നിര്ദേശം.
അയ്യപ്പ സംഗമത്തിനു ദേവസ്വം ഫണ്ട് ഉപയോഗിക്കരുതെന്നും അതിനായി പിരിച്ചെടുത്ത തുക ഉപയോഗിക്കണമെന്നും വ്യക്തമായ കണക്കുകള് കാണിക്കണമെന്നും ഹൈക്കോടതി കര്ശനമായി പറഞ്ഞത് അവഗണിച്ചാണ് ഈ നീക്കം.
ജന്മഭൂമി ഓണ്ലൈന്