പത്തനംതിട്ട: ആഗോള അയ്യപ്പ സംഗമത്തില് പങ്കെടുക്കില്ലെന്ന് പന്തളം കൊട്ടാരം പ്രതിനിധികള് അറിയിച്ചു.കൊട്ടാരം കുടുംബാംഗങ്ങളായ രണ്ടുപേരുടെ മരണം മൂലമുളള അശുദ്ധി നിലനില്ക്കുന്ന സാഹചര്യത്തിലാണ് അയ്യപ്പ സംഗമത്തില് നിന്നും വിട്ടുനില്ക്കുന്നതെന്നാണ് വിശദീകരണം. പന്തളം കൊട്ടാരം നിര്വാഹക സംഘം പുറത്തിറക്കിയ വാര്ത്താക്കുറിപ്പിലാണ് ഇക്കാര്യം അറിയിച്ചത്.
യുവതി പ്രവേശന കാലയളവില് എടുത്ത കേസുകള് പിന്വലിക്കാത്തതിലും സുപ്രീംകോടതിയില് യുവതി പ്രവേശനവുമായി ബന്ധപ്പെട്ട നിലപാട് തിരുത്താത്തതിലും കടുത്ത പ്രതിഷേധമുണ്ടെന്നും പന്തളം കൊട്ടാരം നിര്വാഹക സംഘം വാര്ത്തക്കുറിപ്പില് പറഞ്ഞു. വിശ്വാസം സംരക്ഷിച്ച് സര്ക്കാരും ദേവസ്വം ബോര്ഡും മുന്നോട്ടു പോകണമെന്നും പന്തളം കൊട്ടാരം പ്രതിനിധികള് പറഞ്ഞു.
പന്തളം കൊട്ടാരം നിര്വാഹകസംഘം സെക്രട്ടറിയുടെ സഹോദരീ പുത്രി തൃപ്പൂണിത്തുറ കോവിലകത്തെ മാളവിക കഴിഞ്ഞ ദിവസം അന്തരിച്ചിരുന്നു.സെപ്തംബര് 11ന് രാജകുടുംബാംഗമായ ലക്ഷ്മി തമ്പുരാട്ടിയും അന്തരിച്ചു.ഇവരുടെ മരണം മൂലമുള്ള അശുദ്ധി നിലനില്ക്കുന്നതിനാലാണ് പന്തളം കൊട്ടാരം പ്രതിനിധികള് അയ്യപ്പ സംഗമത്തില് നിന്ന് വിട്ടുനില്ക്കുന്നതെന്നാണ് വാര്ത്തക്കുറിപ്പില് പറയുന്നത്.
അയ്യപ്പ സംഗമത്തില് പന്തളം കൊട്ടാരം പ്രതിനിധികളെ എത്തിക്കാന് തിരുവിതാംകൂര് ദേവസ്വം ബോര്ഡ് ശ്രമിച്ചിരുന്നു.
