ലഖ്നൗ: യാതൊരു പ്രകോപനവുമില്ലാതെ മനുഷ്യരെ രണ്ട് തവണ കടിക്കുന്ന കടിയന് നായ്ക്കള്ക്ക് ജീവപര്യന്തം തടവ് വിധിച്ചിരിക്കുകയാണ് ഉത്തര്പ്രദേശ് സര്ക്കാര്. ഒരു തവണയാണ് ഇങ്ങിനെ കടിക്കുന്നതെങ്കില് ആ നായയെ പത്ത് ദിവസം തടവില് പാര്പ്പിക്കും. തെരുവ് നായ്ക്കളോടുള്ള ഭീതി മാറ്റാനുള്ള പരീക്ഷണനടപടിയാണ് ഉത്തര്പ്രദേശ് നടപ്പാക്കുന്നത്.
പ്രിന്സിപ്പില് സെക്രട്ടറി അമിത് അഭിജാത് എല്ലാ അര്ബന്, റൂറല് ഭരണസ്ഥാപനങ്ങള്ക്കും ഈ ഉത്തരവ് നല്കിയിരിക്കുകയാണ്. ഇതാദ്യമായാണ് ഇന്ത്യയില് ഒരു സംസ്ഥാനം ഇത്തരമൊരു ഉത്തരവിടുന്നത്. പ്രകോപനമില്ലാതെ കടിക്കുന്ന നായയെ ഉടനെ എബിസി കേന്ദ്രത്തിലേക്ക് കൊണ്ടുപോയി ഇഞ്ചെക്ഷന് നല്കിയ ശേഷം പത്ത് ദിവസം തടവില് പാര്പ്പിച്ച് നിരീക്ഷിക്കും. കുഴപ്പമില്ലെങ്കില് തുറന്നുവിടും. അന്നേരം നായയുടെ വിശദാംശങ്ങള് അടങ്ങിയ മൈക്രോ ചിപ് ഘടിപ്പിച്ച ശേഷമായിരുന്നു നായയെ വീണ്ടും തെരുവില് വിടുക. വീണ്ടും കടിച്ചാല് ജീവപര്യന്തരം തടവ് ശിക്ഷ അനുഭവിക്കേണ്ടിവരും. പിന്നീട് തെരുവിലേക്ക് ഈ നായയെ തുറന്നുവിടില്ല.
പക്ഷെ പ്രകോപനമില്ലാതെയാണ് നായ കടിച്ചതെന്ന് സ്ഥിരീകരിക്കാന് മൂന്നംഗ സമിതിയെ നിയോഗിച്ചിട്ടുണ്ട്. വെറ്ററിനറി ഡോക്ടര് ഉള്പ്പെടെ ഈ സംഘത്തില് ഉണ്ടാകും. അവര്ക്ക് നായയുടെ പെരുമാറ്റം മനസ്സിലാക്കാനുള്ള കഴിവുണ്ട്. നേരെ മറിച്ച്, ഒരാള് കല്ലെടുത്തെറിഞ്ഞതിന്റെ ഭാഗമായാണ് നായ കടിക്കുന്നതെങ്കില് നായ കുറ്റക്കാരനല്ല.
