ന്യൂയോര്ക്ക്: താന് തിരഞ്ഞെടുക്കപ്പെട്ടാല്, നെതന്യാഹു നഗരത്തില് കാലുകുത്തുന്ന നിമിഷംതന്നെ അദ്ദേഹത്തെ അറസ്റ്റ് ചെയ്യാന് ന്യൂയോര്ക്ക് പോലീസ് ഡിപ്പാര്ട്ട്മെന്റിന് ഉത്തരവ് നല്കുമെന്ന് ഡെമോക്രാറ്റിക് പാർട്ടിയുടെ ന്യൂയോര്ക്ക് സിറ്റി മേയര് സ്ഥാനാര്ത്ഥി സൊഹ്റാന് മംദാനി.നെതന്യാഹുവിനെ യുദ്ധക്കുറ്റവാളിയെന്നാണ് സൊഹ്റാന് മംദാനി വിശേഷിപ്പിച്ചത്.
‘ഗാസയിലെ വംശഹത്യയ്ക്ക് ഉത്തരവാദിയായ ഒരു യുദ്ധക്കുറ്റവാളിയാണ് ബെഞ്ചമിന് നെതന്യാഹു. നെതന്യാഹു ന്യൂയോര്ക്ക് സന്ദര്ശിക്കുകയാണെങ്കില്, വിമാനത്താവളത്തില്വെച്ച് അദ്ദേഹത്തെ തടഞ്ഞുവെക്കാന് പോലീസിന് നിര്ദ്ദേശം നല്കും. അത്തരത്തില് അന്താരാഷ്ട്ര ക്രിമിനല് കോടതിയുടെ (ഐസിസി) അറസ്റ്റ് വാറന്റിനെ ബഹുമാനിക്കും.’ മംദാനി പറഞ്ഞു. ന്യൂയോര്ക്ക് ടൈംസിനോട് സംസാരിക്കവെയായിരുന്നു മംദാനിയുടെ പരാമര്ശം.
അതേസമയം, ഇങ്ങനെയൊരു നടപടി പ്രായോഗികമായി നടപ്പിലാക്കാന് കഴിയാത്തതും ഫെഡറല് നിയമത്തിന് വിരുദ്ധവുമാകും എന്നാണ് നിയമ വിദഗ്ധര് വ്യക്തമാക്കുന്നത്. അതേസമയം, സൊഹ്റാന്റെ അഭിപ്രായങ്ങളില് ആശങ്കയില്ലെന്ന് പറഞ്ഞ നെതന്യാഹു ഈ ഭീഷണികളെ തള്ളിക്കളഞ്ഞു. തന്നെ അറസ്റ്റ് ചെയ്യാമെന്ന് വിചാരം ‘എല്ലാതരത്തിലും വിഡ്ഢിത്തമാണ്’ എന്നാണ് ട്രംപുമായുള്ള വൈറ്റ് ഹൗസ് കൂടിക്കാഴ്ചയില് അദ്ദേഹം വിശേഷിപ്പിച്ചത്. ‘ഞാന് പ്രസിഡന്റ് ട്രംപിനൊപ്പം അവിടെ വരും, നമുക്ക് കാണാം’ എന്നും നെതന്യാഹു വെല്ലുവിളിച്ചു. ‘അയാള് (സൊഹ്റാന്) മര്യാദയ്ക്ക് പെരുമാറുന്നതാണ് നല്ലത്. അല്ലെങ്കില്, അയാള്ക്ക് വലിയ പ്രശ്നങ്ങളുണ്ടാകും.’ എന്നാണ് സൊഹ്റാന്റെ പ്രസ്താവനകളെ കുറിച്ച് ട്രംപ് പ്രതികരിച്ചത്.
