ആലുവ : കേരളത്തിലേക്ക് രാസലഹരി എത്തിക്കുന്ന മുഖ്യ കണ്ണിയെ ബാംഗ്ലൂരിൽ നിന്ന് തടിയിട്ടപറമ്പ് പോലീസ് സാഹസികമായി പിടികൂടി. തൃക്കാക്കര പൈപ്പ് ലൈൻ റോഡിൽ വടക്കപ്പറമ്പിൽ ഹസനുൽ ബന്ന (24) ആണ് പിടിയിലായത്. ഇയാൾ ബാംഗ്ലൂരിൽ ഒളിച്ചു താമസിച്ചിരുന്ന ഫ്ലാറ്റിന് സമീപത്ത് വച്ചാണ് പിടികൂടിയത്.
മൂന്നുമാസം മുൻപ് വാഴക്കുളം സ്വദേശി മുഹമ്മദ് അസ്ലമിനെ 46 ഗ്രാം എം ഡി എം എയുമായി തടിയിട്ടപറമ്പ് പോലീസ് അറസ്റ്റ് ചെയ്തിരുന്നു. ഇയാൾക്ക് രാസലഹരി ലഭിക്കുന്നതിന്റെ ഉറവിടം തേടിയുള്ള അന്വേഷണത്തിനിടയിലാണ് ഹസനുൽ ബന്ന പിടിയിലാകുന്നത്. ആഫ്രിക്കൻ സ്വദേശിയിൽ നിന്ന് മൊത്തമായി വാങ്ങുന്ന രാസലഹരി ബാംഗ്ലൂരിൽ കൊണ്ടുവന്ന് കേരളത്തിലെ ആവശ്യക്കാർക്ക് എത്തിച്ചു നൽകുകയാണ് പ്രതി ചെയ്യുന്നത്.
ഏറ്റവും കുറഞ്ഞ അളവിൽ വരെ ലഹരിവസ്തുക്കൾ തൂക്കി നൽകുന്നതിന് ഉപയോഗിക്കുന്ന വിവിധ തരം മിഷനുകൾ ഇയാളുടെ താമസസ്ഥലത്തു നിന്നും പോലീസ് കണ്ടെടുത്തു. പെരുമ്പാവൂർ എ.എസ്.പി ഹർദ്ദിക്ക് മീണയുടെ നിർദ്ദേശാനുസരണം തടിയിട്ടപറമ്പ് പോലീസ് ഇൻസ്പെക്ടർ പി ജെ കുര്യാക്കോസ്, പോലീസുകാരായ റോബിൻ റോയ്, കെ വിനോദ്, കെ എസ് അനൂപ്, സി.ബി ബെനസിർ എന്നിവർ അടങ്ങുന്ന സംഘമാണ് പ്രതിയെ ബാംഗ്ലൂരിലെത്തി പിടികൂടിയത്.
കേരള രജിസ്ട്രേഷനുള്ള വാഹനം കണ്ട പ്രതി ഫ്ലാറ്റിൽ നിന്ന് ഇറങ്ങി യൂബർ ടാക്സിയിൽ രക്ഷപ്പെടാൻ ശ്രമം നടത്തി. ഇത് തടയാൻ പോലീസ് ശ്രമിച്ചതോടെ ഇയാൾ തൊട്ടടുത്തുള്ള പാടശേഖരത്തിലേക്ക് ഇറങ്ങിയോടി. പിന്തുടർന്ന് എത്തിയ പോലീസ് സംഘം സാഹസികമായി പ്രതിയെ പിടികൂടുകയായിരുന്നു. ഇയാളെ സംബന്ധിച്ച് കൂടുതൽ അന്വേഷണങ്ങൾ നടത്തിവരികയാണെന്ന് തടിയിട്ട് പറമ്പ് പോലീസ് പറഞ്ഞു.
