എറണാകുളം :ഹൃദയം മാറ്റിവയ്ക്കല് ശസ്ത്രക്രിയയ്ക്ക് വിധേയയായ 13 കാരിയുടെ ആരോഗ്യനില തൃപ്തികരം എന്ന് ലിസി ആശുപത്രിയിലെ ഡോക്ടര്മാര് അറിയിച്ചു.കുട്ടിയെ ഞായറാഴ്ച പുലര്ച്ചെ വെന്റിലേറ്ററില് നിന്ന് മാറ്റും.
മസ്തിഷ്കമരണം സംഭവിച്ച അങ്കമാലി സ്വദേശി ബില്ജിത്ത് എന്ന 18 കാരന്റെ ഹൃദയമാണ് കൊല്ലം സ്വദേശിനിയായ പെണ്കുട്ടിക്ക് മാറ്റിവെച്ചത്. ശനിയാഴ്ച പുലര്ച്ചെ 1.25 ന് ആരംഭിച്ച ശസ്ത്രക്രിയ രാവിലെ 6.30 നാണ് പൂര്ത്തിയായത്.
എട്ടാം ക്ലാസ് വിദ്യാര്ഥിനിയാണ് കുട്ടി.മൂന്ന് വര്ഷമായി ഹൃദ്രോഗത്തെ തുടര്ന്ന് ചികിത്സയിലാണ്.തിരുവനന്തപുരം ശ്രീചിത്ര ആശുപത്രിയില് ആയിരുന്നു കുട്ടിയുടെ ചികിത്സ. കഴിഞ്ഞ ദിവസം ആശുപത്രിയില് നിന്ന് വീട്ടിലേക്ക് മടങ്ങി വരുന്നതിനിടെയാണ് കുട്ടിയ്ക്ക് അനുയോജ്യമായ ഹൃദയം ലഭ്യമാണെന്ന വിവരം ലിസി ആശുപത്രിയില് നിന്ന് കുടുംബത്തിന് ലഭിച്ചത്. തുടര്ന്ന് വന്ദേഭാരത് എക്സ്പ്രസില് കുട്ടിയെ എറണാകുളത്തെത്തിച്ചു.
അപകടത്തില് മരിച്ച ബില്ജിത്തിന്റെ കരള്, ചെറുകുടല് എന്നിവ അമൃത ആശുപത്രിയില് ചികിത്സയില് കഴിയുന്ന തിരുവനന്തപുരം സ്വദേശിക്ക് മാറ്റിവെച്ചു.
