തിരുവനന്തപുരം:പേരൂര്ക്കടയിലെ വീട്ടില് നിന്നും സ്വര്ണമാല മോഷണം പോയെന്ന കേസില് പൊലീസ് തിരക്കഥ തട്ടിക്കൂട്ടിയെന്ന് പ്രത്യേക അന്വേഷണ സംഘത്തിന്റെ റിപ്പോര്ട്ട്.വീട്ടുജോലിക്കാരി ബിന്ദുവിനെ കള്ളക്കേസില് കുടുക്കാന് എസ്ഐ ഉള്പ്പെടെയുള്ള പൊലീസുകാര് ശ്രമിച്ചെന്നാണ് കണ്ടെത്തിയത്.
വീട്ടുടമ ഓമന ഡാനിയലിന്റെ സ്വര്ണമാല കാണാനില്ലെന്ന് പരാതി നല്കിയെങ്കിലും പിന്നീട് മാല സോഫയുടെ അടിയില് നിന്നും കണ്ടെത്തി. ഈ വിവരം ഓമനയും മകളും പേരൂര്ക്കട സ്റ്റേഷനിലെ എസ്ഐയോട് പറഞ്ഞിരുന്നു.എന്നാല് മാല കിട്ടിയെന്നത് പുറത്ത് പറയേണ്ടെന്ന് എസ്ഐ നിര്ദേശിച്ചതിനാലാണ് മാല കിട്ടിയില്ലെന്ന് മാറ്റി പറഞ്ഞതെന്നാണ് ഓമന ഡാനിയേല് അന്വേഷണ സംഘത്തോട് വെളിപ്പെടുത്തിയത്.കേസെടുത്തതിനാല് ഇനി മാറ്റാനാകില്ലെന്നും തന്നെ ബാധിക്കുമെന്നും എസ് ഐ പറഞ്ഞതിനാലാണ് തങ്ങള് പൊലീസ് പറഞ്ഞത് പോലെ മൊഴി നല്കിയതെന്ന് ഓമന ഡാനിയേലും മകളും പറഞ്ഞു.
ചവര്കൂനയില് നിന്നും മാല കിട്ടിയെന്ന് പറയാന് പൊലീസാണ് നിര്ദ്ദേശിച്ചതാണെന്നാണ് പ്രത്യേക അന്വേഷണ സംഘത്തിന്റെ കണ്ടെത്തല്. പേരൂര്ക്കട പൊലീസിന്റെ ഭാഗത്ത് നിന്നുണ്ടായ തിരക്കഥ വ്യക്തമാകുന്നതാണ് പത്തനംതിട്ട ക്രൈംബ്രാഞ്ച് ഡിവൈഎസ്പി തയാറാക്കിയ അന്വേഷണ റിപ്പോര്ട്ട്.
തന്നെ കള്ളക്കേസില് കുടുക്കിയെന്ന് കാട്ടി വീട്ടുജോലിക്കാരി ബിന്ദു സംസ്ഥാന പൊലീസ് മേധാവിക്കും മനുഷ്യാവകാശ കമ്മീഷനും പരാതി നല്കിയത് പ്രകാരാണ് മനുഷ്യാവകാശ കമ്മീഷന് ജില്ലയ്ക്ക് പുറത്തുള്ള അന്വേഷണ ഉദ്യോഗസ്ഥന് അന്വേഷിക്കണമെന്ന് ഉത്തരവിട്ടത്. അതേസമയം തന്നെ കള്ളക്കേസില് കുടുക്കാന് ശ്രമിച്ചവര്ക്കെതിരെ കര്ശന നടപടി വേണമെന്നും തനിക്ക് നീതി കിട്ടണമെന്നാണ് ബിന്ദുവിന്റെ ആവശ്യം.
