മുഖ്യമന്ത്രി കേരളത്തിലെ ജനങ്ങളെ വിഡ്ഢികളാക്കരുത്: രാജീവ് ചന്ദ്രശേഖര്‍

കോട്ടയം: മുഖ്യമന്ത്രി കേരളത്തിലെ ജനങ്ങളെ വിഡ്ഢികളാക്കരുതെന്ന് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍.

ബിജെപിക്ക് വോട്ടുചെയ്യുന്നത് സാംസ്‌കാരിക കേരളത്തിന് അപമാനമെന്നാണ് മുഖ്യമന്ത്രി പറഞ്ഞത്. മുഖ്യമന്ത്രി സ്വപ്‌നലോകത്താണ് ജീവിക്കുന്നത്. ബിജെപി ഭരിക്കുന്ന സംസ്ഥാനങ്ങളും കേരളവുമായി താരതമ്യം ചെയ്യുമ്പോള്‍ ഇക്കാര്യം ബോദ്ധ്യമാകുമെന്ന് അദ്ദേഹം പറഞ്ഞു.

2014 മുതല്‍ 2025ല്‍ ഇതുവരെയുള്ള ഭാരതത്തിന്റെ വികസനത്തെക്കുറിച്ച് കാണണം. ഇപ്പോള്‍ ലോകത്തിലെ നാലാമത്തെ സാമ്പത്തിക ശക്തിയാണ് ഭാരതം. അതിവേഗം വികസനം കൊണ്ടുവരികയാണ്. പ്രധാനമന്ത്രി നരേന്ദ്ര മോദി കേരളത്തിലെ ജനങ്ങള്‍ക്കു നല്കിയ ഓണസമ്മാനമാണ് ജിഎസ്ടി പരിഷ്‌കരണമെന്നും അദ്ദേഹം കൂട്ടിച്ചേര്‍ത്തു.

കേരളത്തില്‍ ഇടതുവലതു മുന്നണികള്‍ മാറിമാറി ഭരിച്ചു. സിപിഎം പത്തു കൊല്ലം തുടര്‍ച്ചയായി ഭരിച്ചു. എന്തു വികസനമാണ് കൊണ്ടുവന്നത്. അഞ്ചര ലക്ഷം കോടിയുടെ കടം പുതുതലമുറയുടെ തലയില്‍ കെട്ടിവെച്ചു. രാജ്യത്ത് വിലക്കയറ്റം ഏറ്റവും കൂടുതല്‍ കേരളത്തിലാണ്. പോലീസ് അതിക്രമങ്ങള്‍ വര്‍ദ്ധിച്ചു. പോലീസില്‍ 744 ഉദ്യോഗസ്ഥര്‍ ക്രിമിനലുകളാണെന്നാണ് റിപ്പോര്‍ട്ട്. ഇതില്‍ 18 പേരെ മാത്രമാണ് പിരിച്ചുവിട്ടിട്ടുള്ളത്. സര്‍ക്കാര്‍ ജീവനക്കാര്‍ക്ക് ശമ്പളവും പെന്‍ഷനും കൊടുക്കാന്‍ കടമെടുക്കല്‍ തുടരുകയാണ്. ആശാ പ്രവര്‍ത്തകര്‍ക്ക് ശമ്പളം നല്കാന്‍ കഴിയുന്നില്ല. ഇതാണ് കേരള മോഡല്‍.

2016ല്‍ ജിഎസ്ടിക്കെതിരെ കോണ്‍ഗ്രസും സിപിഎമ്മും കടുത്ത വിമര്‍ശനങ്ങള്‍ ഉന്നയിച്ചു. ഇത് ജനങ്ങള്‍ക്ക് വലിയ ബാദ്ധ്യത ഉണ്ടാക്കുമെന്നു പറഞ്ഞ് പ്രക്ഷോഭങ്ങള്‍ നടത്തി. എന്നാല്‍ എന്താണ് സംഭവിച്ചത്. രാജ്യത്ത് നികുതിയിലൂടെ വരുമാനം വര്‍ദ്ധിച്ചു. ഇപ്പോള്‍ ജിഎസ്ടി നിരക്കുകള്‍ പരിഷ്‌കരിച്ചു. നിത്യോപയോഗ സാധനങ്ങള്‍ക്ക് നികുതി വേണ്ടെന്നുവച്ചു. മരുന്നുകളുടെ ജിഎസ്ടി അഞ്ച് ശതമാനമാക്കി കുറച്ചു. ഇതിന്റെ ഗുണം ജനങ്ങള്‍ക്കു ലഭിക്കും. ഇതെക്കുറിച്ചു ചര്‍ച്ച ചെയ്യാന്‍ തയാറുണ്ടോ. ജിഎസ്ടി കുറയുമ്പോള്‍ വില കുറയും, എന്നാല്‍ കേരളത്തില്‍ കൂടുന്നു. മുഖ്യമന്ത്രി കേരളത്തിലെ ജനങ്ങളെ വിഡ്ഢികളാക്കുന്നു. ഇത് കഴിവില്ലായ്‌മയാണ്.

ഭരണപരാജയത്തില്‍ നിന്ന് ശ്രദ്ധതിരിക്കാനാണ് ആഗോള അയ്യപ്പസംഗമം. ശബരിമലയിലെ ദ്വാരപാലക ശില്പങ്ങളില്‍ നിന്ന് സ്വര്‍ണം അടര്‍ത്തിമാറ്റി തമിഴ്‌നാട്ടില്‍ കൊണ്ടുപോയി ഉരുക്കിയെന്ന് ഹൈക്കോടതിയില്‍ പറഞ്ഞിരിക്കുന്നു. ഇതെല്ലാം ഒരു നാടകമാണെന്ന് നേരത്തെ തന്നെ ബിജെപി പറഞ്ഞതാണ്. വികസിത കേരളം എന്നതാണ് ബിജെപിയുടെ ലക്ഷ്യം. അതിനുള്ള കര്‍മപദ്ധതികള്‍ ആവിഷ്‌കരിച്ചു നടപ്പാക്കിവരികയാണ്.

പോലീസിലെ ക്രിമിനലിസത്തിനെതിരെ 15ന് രാവിലെ 10ന് കേരളത്തില്‍ എല്ലാ ജില്ലാ പോലീസ് മേധാവിമാരുടെയും ഓഫീസിലേക്ക് ബിജെപി പ്രതിഷേധ സമരം നടത്തുമെന്നും അദ്ദേഹം പറഞ്ഞു. ബിജെപി സംസ്ഥാന വൈസ് പ്രസിഡന്റ് അഡ്വ. ഷോണ്‍ ജോര്‍ജ്, സംസ്ഥാന ജനറല്‍ സെക്രട്ടറി അനൂപ് ആന്റണി, കോട്ടയം വെസ്റ്റ് ജില്ലാ പ്രസിഡന്റ് ലിജിന്‍ ലാല്‍ എന്നിവരും വാര്‍ത്താസമ്മേളനത്തില്‍ പങ്കെടുത്തു.