ബിജെപി നേതൃത്വം നല്കുന്ന എന്ഡിഎയുടെ സ്ഥാനാര്ഥിയായ സി.പി. രാധാകൃഷ്ണന് ഉപരാഷ്ട്രപതി തെരഞ്ഞെടുപ്പില് നേടിയ ആധികാരികവും തിളക്കവുമാര്ന്ന വിജയം നരേന്ദ്ര മോദി സര്ക്കാരിന്റെ കരുത്തും സ്വീകാര്യതയുമാണ് എടുത്തുകാട്ടുന്നത്. ഉപരാഷ്ട്രപതിയായിരുന്ന ജഗ്ദീപ് ധന്കര് ആരോഗ്യ കാരണങ്ങള് പറഞ്ഞ് രാജിവെച്ചതിനെ തുടര്ന്നാണ് ഉപരാഷ്ട്രപതി തെരഞ്ഞെടുപ്പ് വേണ്ടിവന്നത്. പുതിയ ഉപരാഷ്ട്രപതിയെ കക്ഷിരാഷ്ട്രീയത്തിന് അതീതമായി സമവായത്തിലൂടെ തെരഞ്ഞെടുക്കാമെന്ന നിര്ദ്ദേശം ബിജെപി മുന്നോട്ടു വച്ചതാണ്. പ്രതിരോധ മന്ത്രി രാജ്നാഥ് സിങ് ഇതു സംബന്ധിച്ച് പ്രതിപക്ഷ നേതാക്കളുമായി ചര്ച്ചയും നടത്തിയിരുന്നു. പക്ഷേ വാജ്പേയിയുടെ ഭരണകാലത്ത് എ.പി.
ജെ. അബ്ദുള് കലാമിനെ രാഷ്ട്രപതി സ്ഥാനത്തേയ്ക്ക് സമവായത്തിലൂടെ തെരഞ്ഞെടുക്കാന് തയ്യാറാവാതിരുന്ന കോണ്ഗ്രസ്സും പ്രതിപക്ഷ പാര്ട്ടികളും ഒരിക്കല്ക്കൂടി ദുര്മുഖം കാണിക്കുകയായിരുന്നു.
ജഗ്ദീപ് ധന്കര് അപ്രതീക്ഷിതമായി രാജിവച്ചത് കേന്ദ്ര സര്ക്കാരിനെതിരെ ആയുധമാക്കാന് പ്രതിപക്ഷം ശ്രമിച്ചിരുന്നു. ധന്കറിനെ മുന്നിര്ത്തി ചില രാഷ്ട്രീയ കളികള് പ്രതിപക്ഷം നടത്തിയെന്നത് വസ്തുതയാണ്. ഇത് വിജയിക്കാതിരുന്നതിലുള്ള അമര്ഷം കൂടിയാണ് ഉപരാഷ്ട്രപതി തെരഞ്ഞെടുപ്പില് കോണ്ഗ്രസ്സും മറ്റും പ്രകടിപ്പിച്ചത്. ധന്കര് ഇപ്പോള് എവിടെയാണെന്ന് അറിയില്ലെന്നും, വീട്ടുതടങ്കലില് ആണെന്നും മറ്റുമൊക്കെ പ്രചരിപ്പിച്ച് മോദി സര്ക്കാരിനെ അപകീര്ത്തിപ്പെടുത്താനും, തങ്ങളുടെ ഉപരാഷ്ട്രപതി സ്ഥാനാര്ത്ഥിയായ ബി.സുദര്ശന് റെഡ്ഡിക്ക് അനുകൂലമായ അന്തരീക്ഷം സൃഷ്ടിക്കാനും പ്രതിപക്ഷം ശ്രമിച്ചെങ്കിലും അതൊന്നും വിജയിച്ചില്ലെന്ന് മാത്രമല്ല, കനത്ത പരാജയം ഏറ്റുവാങ്ങേണ്ടിയും വന്നിരിക്കുന്നു എന്നാണ് തെരഞ്ഞെടുപ്പ് ഫലം കാണിക്കുന്നത്. പതിനഞ്ചാമത് ഉപരാഷ്ട്രപതിയാണ് സി. പി. രാധാകൃഷ്ണന്.
പരാജയം ഉറപ്പായിരുന്നിട്ടും സ്വന്തം സ്ഥാനാര്ത്ഥിയെ നിര്ത്തിയത് പ്രതിപക്ഷം കുറേക്കാലമായി തുടരുന്ന രാജ്യതാല്പ്പര്യത്തിന് നിരക്കാത്ത രാഷ്ട്രീയ സമീപനത്തിന്റെ ഭാഗമായിരുന്നു. സുപ്രീംകോടതി ജഡ്ജിയായിരുന്ന സുദര്ശന് റെഡ്ഡി മാവോയിസ്റ്റുകള്ക്ക് അനുകൂലമായി വിധി പ്രസ്താവിച്ച ബെഞ്ചിലെ അംഗമായിരുന്നു. ലോകം കണ്ടിട്ടുള്ളതില് ഏറ്റവും വലിയ വിഷവാതക ദുരന്തങ്ങളില് ഒന്നായ ഭോപ്പാല് വാതക ദുരന്തം സിബിഐ അന്വേഷിക്കണമെന്ന ഹര്ജി നിരസിച്ചയാളുമാണ്. അന്ന് കേന്ദ്രവും ദുരന്തം നടന്ന മധ്യപ്രദേശും ഭരിച്ചിരുന്ന കോണ്ഗ്രസിനെ രക്ഷിക്കാന് വേണ്ടിയായിരുന്നു ഇങ്ങനെ ചെയ്തത് എന്ന ആരോപണം അന്നേ ഉണ്ടായിരുന്നു. ആന്ധ്രയില് നിന്നുള്ള റെഡ്ഡിയെ സ്ഥാനാര്ത്ഥിയാക്കിയാല് കേന്ദ്രസര്ക്കാരിന്റെ ഭാഗമായ ടിഡിപിയുടെ പിന്തുണ ലഭിക്കുമെന്ന വ്യാമോഹം പ്രതിപക്ഷത്തിന് ഉണ്ടായിരുന്നു. അതൊന്നും നടന്നില്ല. എന്ഡിഎ സഖ്യത്തിന് തങ്ങളുടെ പക്ഷത്തെ മുഴുവന് വോട്ടുകളും സമാഹരിക്കാന് കഴിഞ്ഞു. മാത്രമല്ല ‘ഇന്ഡി’ സഖ്യത്തിന്റെ 19 വോട്ടുകള് പിടിച്ചെടുക്കാനും കഴിഞ്ഞു.
തമിഴ്നാട്ടില് നിന്നുള്ള ബിജെപി നേതാവും മഹാരാഷ്ട്ര ഗവര്ണറുമായ സി.പി. രാധാകൃഷ്ണന് ആര്എസ്എസിന്റെ ശാഖയിലൂടെ വളര്ന്നുവന്നയാളാണ്. ഈ ബന്ധം ചൂണ്ടിക്കാട്ടിയും പ്രതിപക്ഷം പ്രചാരണം നടത്തിയിരുന്നു. അതൊന്നും വിലപ്പോയില്ലെന്ന് വ്യക്തം. പ്രധാനമന്ത്രിയേയും പ്രതിരോധ മന്ത്രിയേയും ആഭ്യന്തരമന്ത്രിയേയും പോലെ രാജ്യത്തിന്റെ ഉപരാഷ്ട്രപതിയും രാഷ്ട്രീയ സ്വയംസേവക സംഘത്തില് അഭിമാനിക്കുന്നയാളാവുന്നത് ശ്രദ്ധേയമാണ്. ഭാരതത്തിന്റെ കരുത്ത് ജനാധിപത്യമാണ്. മൂന്ന് ലോക്സഭാ തെരഞ്ഞെടുപ്പുകളില് വിജയിച്ച് അധികാരത്തിലേറിയ മോദി സര്ക്കാരിനെതിരെ ജനാധിപത്യത്തിന് നിരക്കാത്ത രീതിയില് പ്രവര്ത്തിച്ചുകൊണ്ടിരിക്കുന്ന കോണ്ഗ്രസിനും മറ്റ് പ്രതിപക്ഷ കക്ഷികള്ക്കും മുഖമടച്ച് കിട്ടിയ അടിയാണ് ഉപരാഷ്ട്രപതി തെരഞ്ഞെടുപ്പിലെ എന്ഡിഎ വിജയം
