ന്യൂദല്ഹി: ഓപ്പറേഷന് സിന്ദൂറിന് ശേഷം ഭാരതത്തിന്റെ വടക്കുപടിഞ്ഞാറന് അതിര്ത്തികളില് വ്യോമനിരീക്ഷണം ശക്തമാക്കാന് ഭാരതം. അതിനായി നൂതന സംവിധാനങ്ങളുള്ള റഡാറുകള് വാങ്ങാനാണ് സൈന്യം തീരുമാനിച്ചിരിക്കുന്നത്.
ചെറിയ ഡ്രോണ് ആക്രമണങ്ങളെ ചെറുക്കാനുള്ള റഡാറുകളാണ് വാങ്ങുന്നത്.
45 ലോ ലെവല് ലൈറ്റ് വെയ്റ്റ് റഡാര് (എല്എല്എല്ആര്-ഇ), 48 എയര് ഡിഫന്സ് ഫയര് കണ്ട്രോള് റഡാര് (എഡിഎഫ്സിആര്-ഡിഡി) എന്നിവയ്ക്കായി സൈന്യം രണ്ട് റിക്വസ്റ്റ് ഫോര് ഇന്ഫര്മേഷന് (ആര്എഫ്ഐ) സമര്പ്പിച്ചിട്ടുണ്ട്. വ്യോമാതിര്ത്തിയിലെ ഭീഷണി, നിരീക്ഷണം എന്നിവയ്ക്ക് മുന്ഗണന നല്കിക്കൊണ്ടുള്ള 10 ലോ ലെവല് ലൈറ്റ് വെയ്റ്റ് റഡാര് – ഇംപ്രൂവ്ഡ് (എല്എല്എല്ആര്-ഐ) എന്നിവയ്ക്കായി പ്രത്യേക റിക്വസ്റ്റ് ഫോര് പ്രൊപ്പോസലും (ആര്എഫ്പി) പുറപ്പെടുവിച്ചിട്ടുണ്ട്. കരാര് സംബന്ധിച്ച വിവരങ്ങള് പുറത്തുവിട്ടിട്ടില്ല.
പര്വതങ്ങള് മുതല് മരുഭൂമികള്, തീരദേശ മേഖലകള് വരെയുള്ള വൈവിധ്യമാര്ന്ന ഭൂപ്രദേശങ്ങള് നിരീക്ഷിക്കുന്നതിനായി രൂപകല്പന ചെയ്തിരിക്കുന്ന എല്എല്എല്ആര്-ഐ റഡാറുകള് 50 കിലോമീറ്റര് വരെ വ്യോമാതിര്ത്തി സ്കാന് ചെയ്യും. ഒരേസമയം 100ലധികം ലക്ഷ്യങ്ങളെ ട്രാക്ക് ചെയ്യാനും സാധിക്കും.
ഈ സംവിധാനങ്ങള് സൈന്യത്തിന്റെ ആകാശ്തീര് വ്യോമ പ്രതിരോധ ശൃംഖലയുമായി സംയോജിപ്പിക്കും. ആകാശ്തീര് ഭാരതത്തിന്റെ തദ്ദേശീയ ഓട്ടോമേറ്റഡ് എയര് ഡിഫന്സ് കണ്ട്രോള് ആന്ഡ് റിപ്പോര്ട്ടിങ് സംവിധാനമാണ്.
