തിരുവനന്തപുരം: അധ്യാപക നിയമനത്തിന് ടീച്ചേഴ്സ് എലിജിബിലിറ്റി ടെസ്റ്റ് (ടെറ്റ്) യോഗ്യത നിര്ബന്ധമാക്കിയ സുപ്രീം കോടതി വിധിയില് സംസ്ഥാന സര്ക്കാര് പുനഃപരിശോധനാ ഹര്ജി നല്കുമെന്ന് പൊതുവിദ്യാഭ്യാസ വകുപ്പ് മന്ത്രി വി. ശിവന്കുട്ടി അറിയിച്ചു. സര്വീസിലുള്ള അധ്യാപകര്ക്കു വിധി ബാധകമാക്കിയ സാഹചര്യത്തില്, ഇത് കേരളത്തിലെ വിദ്യാഭ്യാസ മേഖലയില് വലിയ പ്രത്യാഘാതങ്ങള് സൃഷ്ടിക്കും.
ജസ്റ്റിസുമാരായ ദീപാങ്കര് ദത്ത, മന്മോഹന് എന്നിവരടങ്ങുന്ന സുപ്രീം കോടതി ബഞ്ചാണ് വിവിധ ഹൈക്കോടതികളില് നിന്നുള്ള 28 അപ്പീലുകള് പരിഗണിച്ച് സെപ്റ്റംബര് 14ന് വിധി പ്രഖ്യാപിച്ചത്. അധ്യാപക നിയമനത്തിനും സ്ഥാനക്കയറ്റത്തിനും ടെറ്റ് യോഗ്യത നിര്ബന്ധമാണോ എന്നതായിരുന്നു കോടതി പ്രധാനമായും പരിഗണിച്ചത്.
വിദ്യാഭ്യാസ അവകാശ നിയമം അനുസരിച്ച് ടെറ്റ് യോഗ്യത നിര്ബന്ധമാണ്. ഈ യോഗ്യതയില്ലാത്ത ഇന്-സര്വീസ് അധ്യാപകര്ക്ക് സര്വീസില് തുടരാനുള്ള അവകാശം നഷ്ടപ്പെടും. ആര്.ടി.ഇ. നിയമം നിലവില് വരുന്നതിന് മുമ്പ് നിയമിതരായ അധ്യാപകര്ക്ക് സ്ഥാനക്കയറ്റത്തിന് ടെറ്റ് യോഗ്യത നിര്ബന്ധമാണ്. കോടതിവിധി വരുന്ന തീയതിയില് (സെപ്റ്റംബര് 1, 2025) അഞ്ച് വര്ഷത്തില് താഴെ മാത്രം സര്വീസ് ബാക്കിയുള്ള സീനിയര് അധ്യാപകര്ക്ക് വിരമിക്കല് വരെ സര്വീസില് തുടരാം. എന്നാല്, ഇവര്ക്ക് സ്ഥാനക്കയറ്റത്തിന് ടെറ്റ് യോഗ്യത നിര്ബന്ധമാണ്. അഞ്ച് വര്ഷത്തില് കൂടുതല് സര്വീസുള്ള അധ്യാപകര് ഈ ഉത്തരവ് മുതല് രണ്ട് വര്ഷത്തിനകം ടെറ്റ് യോഗ്യത നേടിയില്ലെങ്കില് നിര്ബന്ധിത വിരമിക്കലിന് വിധേയരാകേണ്ടി വരും. ഇവയാണ് വിധിയിലെ പ്രധാന ഉള്ളടക്കം.
യോഗ്യതയില്ലാത്ത അധ്യാപകരെ സംരക്ഷിക്കാന് പുനഃപരിശോധനാ ഹര്ജി നല്കുമെന്ന് സംസ്ഥാന സര്ക്കാര്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.