ന്യൂദല്ഹി: ധര്മസ്ഥലയ്ക്കെതിരായ ഗൂഢാലോചനക്കേസ് എന്ഐഎയ്ക്കു വിടണമെന്നാവശ്യപ്പെട്ട് കര്ണാടകയിലെ സംന്യാസിസംഘം കേന്ദ്ര ആഭ്യന്തര മന്ത്രി അമിത് ഷായ്ക്കു നിവേദനം നല്കി.
ഹരിഹര വീരശൈവ ലിംഗായത്ത് പഞ്ചമശാലി പീഠത്തിലെ വചനാനന്ദ സ്വാമിയുടെ നേതൃത്വത്തിലുള്ള സംന്യാസിസംഘമാണ് അമിത് ഷായെ കണ്ടത്. ശബരിമല, തിരുപ്പതി തീര്ത്ഥാടന കേന്ദ്രങ്ങളെപ്പോലെ ധര്മസ്ഥലയെയും ലക്ഷ്യമിടുന്നെന്നാണ് ഇത്തരം സംഭവങ്ങളിലൂടെ പുറത്തുവരുന്നതെന്ന് സംന്യാസിമാര് നിവേദനത്തില് ചൂണ്ടിക്കാട്ടി. പ്രത്യേക സംഘത്തിന്റെ അന്വേഷണത്തോട് എതിര്പ്പില്ല. എന്നാല്, ക്ഷേത്ര നഗരമായ ധര്മസ്ഥലയ്ക്കെതിരായ ഗൂഢാലോചന പുറത്തുകൊണ്ടുവരണം. അതിനാലാണ് കേസ് എന്ഐഎ ഏറ്റെടുക്കാന് ആവശ്യപ്പെടുന്നതെന്നും സംഘം പറഞ്ഞു.
കേസ് പുരോഗതി സൂക്ഷ്മമായി നിരീക്ഷിക്കുകയാണെന്നും ഉചിത തീരുമാനമെടുക്കുമെന്നും അമിത് ഷാ അറിയിച്ചതായി വചനാനന്ദ സ്വാമി പറഞ്ഞു.
