സമൂഹത്തിൽ ബഹുമാനം ലഭിക്കണമെങ്കിൽ പണം വേണം. അത് സമ്പാദിക്കണമെങ്കിൽ നല്ല വഴികളും വേണം . പണം സമ്പാദിക്കാൻ കഠിനാധ്വാനവും ദൃഢനിശ്ചയവും മാത്രമാണ് പ്രധാനം. 53 വയസിനിടെ താൻ 1 കോടി രൂപ എങ്ങനെ സമ്പാദിച്ചുവെന്ന് വെളിപ്പെടുത്തിയിരിക്കുകയാണ് ബെംഗളൂരു സ്വദേശി . ഇപ്പോൾ ഈ കഥ നിരവധി യുവാക്കൾക്ക് പ്രചോദനമായി മാറിയിരിക്കുകയാണ്. പത്താം ക്ലാസിൽ പഠനം നിർത്തി, 4,200 ശമ്പളത്തിൽ കരിയർ ആരംഭിച്ച്, വായ്പകളോ ക്രെഡിറ്റ് കാർഡുകളോ ആഡംബര ജീവിതശൈലിയോ ഇല്ലാതെ 25 വർഷത്തിനുള്ളിൽ 1 കോടി രൂപ സമ്പാദിച്ച വ്യക്തി എന്ന നിലയിലാണ് ജനങ്ങൾ അദ്ദേഹത്തെ കുറിച്ച് സംസാരിക്കുന്നത് .
‘ ദക്ഷിണേന്ത്യയിലെ ഒരു ചെറിയ ഗ്രാമത്തിൽ നിന്നാണ് ഞാൻ വരുന്നത്. സ്വന്തമായി ഇംഗ്ലീഷ് വ്യാകരണം പഠിച്ചു, പിന്നീട് 2000-ൽ ബാംഗ്ലൂരിൽ എത്തി. എനിക്ക് 27 വയസ്സായിരുന്നു, എന്റെ പോക്കറ്റിൽ 5,000 രൂപ ഉണ്ടായിരുന്നു. ഞാൻ എന്റെ മാതാപിതാക്കളോട് പണമോ സഹായമോ ചോദിച്ചില്ല. ഞങ്ങൾ വളരെ ദരിദ്രരായിരുന്നു. എന്റെ ആദ്യ ശമ്പളം ഏകദേശം 4,200 രൂപയായിരുന്നു. എനിക്ക് അവസാനമായി ലഭിച്ച ശമ്പളം ഏകദേശം 63,000 രൂപയായിരുന്നു . എന്റെ ജീവിതത്തിലെ ഇത്രയും വർഷത്തിനിടയിൽ ഞാൻ ഒരു കാർ വാങ്ങിയിട്ടില്ല. പണത്തിനോ മറ്റ് കാര്യങ്ങൾക്കോ വേണ്ടി ഞാൻ ആരുടെയും നേരെ കൈ നീട്ടിയിട്ടില്ല. ‘ അദ്ദേഹം പറയുന്നു.
25 വർഷത്തെ തുടർച്ചയായ പരിശ്രമത്തിലൂടെയും സമ്പാദ്യത്തിലൂടെയും തന്റെ ബാങ്ക് നിക്ഷേപമായി 1.01 കോടി രൂപയും ഓഹരിയായി 65,000 രൂപയും സമ്പാദിച്ചുവെന്നാണ് അദ്ദേഹം പറയുന്നത് .
