ഡെൻമാർക്കിലെ ആർഹസ് ഉൾക്കടലിൽ 8,500 വർഷം പഴക്കമുള്ള നഗരം മുങ്ങിക്കിടക്കുന്നതായി ശാസ്ത്രജ്ഞർ കണ്ടെത്തി. ഹിമയുഗം അവസാനിച്ചതിനുശേഷം സമുദ്രനിരപ്പ് ഉയർന്നതിനാലാണ് നഗരം മുങ്ങിയതെന്ന് ഗവേഷകർ പറയുന്നു . ഈ നഗരത്തെ ശിലായുഗ അറ്റ്ലാന്റിസ് എന്ന് വിളിക്കുന്നു. കല്ല് ഉപകരണങ്ങൾ, മൃഗങ്ങളുടെ അസ്ഥികൾ, മരം കൊണ്ട് നിർമ്മിച്ചതായി പറയപ്പെടുന്ന ഉപകരണം എന്നിവ ഈ നഗരത്തിൽ നിന്ന് കണ്ടെത്തിയിട്ടുണ്ട്.
ശിലായുഗത്തിലെ മനുഷ്യരുടെ ജീവിതത്തെ പ്രതിഫലിപ്പിക്കുന്നതാണ് ഈ നഗരം. കടലിനടിയിൽ 430 ചതുരശ്ര അടി വിസ്തൃതിയിൽ പര്യവേക്ഷണം നടത്തിയപ്പോഴാണ് ശാസ്ത്രജ്ഞർ ഈ നഗരം കണ്ടെത്തിയത്. കടലിനടിയിൽ ഓക്സിജന്റെ അഭാവം മൂലം എല്ലാ വസ്തുക്കളും കേടുപാടുകൾ കൂടാതെ സംരക്ഷിക്കപ്പെട്ടിട്ടുണ്ട്. ആ കാലഘട്ടത്തിൽ ജീവിച്ചിരുന്ന ആളുകളുടെ ജീവിതശൈലിയും ആചാരങ്ങളും ഇവ പ്രതിഫലിപ്പിക്കുന്നു.
ആ പ്രദേശത്തെ മത്സ്യബന്ധന ഉപകരണങ്ങൾ, കുന്തങ്ങൾ മുതലായവ ഇപ്പോഴും കടലിനടിയിൽ ഒളിപ്പിച്ചിട്ടുണ്ടെന്ന് ശാസ്ത്രജ്ഞർ വിശ്വസിക്കുന്നു. ഇതുസംബന്ധിച്ച പഠനങ്ങൾ നടന്നുകൊണ്ടിരിക്കുകയാണ്. തീരദേശത്തെ നിയോലിത്തിക്ക് ജനതയുടെ ജീവിതശൈലിയും അവരുടെ മത്സ്യബന്ധന വ്യവസായവും മനസ്സിലാക്കാൻ ഈ പഠനത്തിന്റെ ഫലങ്ങൾ സഹായിക്കുമെന്ന് പ്രതീക്ഷിക്കുന്നുണ്ട്.
വടക്കൻ യൂറോപ്പിന്റെ തീരത്ത് വെള്ളത്തിനടിയിലായ നിയോലിത്തിക്ക് നഗരങ്ങൾ കണ്ടെത്തുന്നതിനുള്ള ആറ് വർഷത്തെ പദ്ധതിയുടെ ഭാഗമായിരുന്നു ഈ കണ്ടെത്തൽ. 15.5 മില്യൺ ഡോളറാണ് ഈ പദ്ധതിക്ക് ധനസഹായം നൽകിയിരിക്കുന്നത്. കഴിഞ്ഞ വേനൽക്കാലത്ത്, 26 അടി താഴ്ചയിൽ പുരാതന പുരാവസ്തുക്കൾ ശേഖരിക്കാൻ ഗവേഷകർ ഒരു പ്രത്യേക അണ്ടർ-വാക്വം ഉപകരണം ഉപയോഗിച്ചു.
