രാജ്ഗിര്: ഏഷ്യാകപ്പ് ഹോക്കി രണ്ടാം ഘട്ടമായ സൂപ്പര് ഫോറില് ഭാരതത്തിന് സമനില. രണ്ടാം ഘട്ട പോരാട്ടത്തിലെ ആദ്യ മത്സരത്തില് ദക്ഷിണ കൊറിയയോട് ഏറ്റുമുട്ടിയ ഭാരതം അവസാന ക്വാര്ട്ടറില് സമനില പിടിച്ചെടുക്കുകയായിരുന്നു.
തുടക്കത്തിലേ തന്നെ ലീഡ് നേടി മികച്ച പോരാട്ടം കാഴ്ച്ചവച്ച ഭാരതത്തിനെതിരെ കൊറിയ രണ്ട് ഗോള് തിരിച്ചടിച്ച് കരുത്തുകാട്ടി. രണ്ടും മൂന്നും ക്വാര്ട്ടറുകള് ഗോളില്ലാതെ കഴിഞ്ഞുപോയി. അവസാന ക്വാര്ട്ടറില് മത്സരം 52-ാം മിനിറ്റിലെത്തിയപ്പോഴാണ് ഭാരതത്തിനായി മന്ദീപ് സിങ് സമനില ഗോള് നേടിയത്.
നേരത്തെ മത്സരം തുടങ്ങി എട്ടാമത്തെ മിനിറ്റില് ഹാര്ദിക് സിങ് ഭാരതത്തെ മുന്നിലെത്തിച്ചതാണ്. ഇതിനെതിരെ 11, 13 മിനിറ്റുകളില് കൊറിയ തിരിച്ചടിച്ച് ഭാരതത്തെ മറികടന്നു. ജിഹുന് യാങ് ഇരട്ടഗോള് നേടി.രണ്ടാം ഘട്ടത്തില് ഭാരത്തിന് രണ്ട് മത്സരങ്ങള് കൂടി ബാക്കിയുണ്ട്.
നേരത്തെ പ്രാഥമിക റൗണ്ടില് കളിച്ച മൂന്ന് മത്സരങ്ങളും വിജയിച്ചാണ് ഭാരതം മുന്നേറിയത്. ആദ്യ മത്സരത്തില് ചൈനയെ 3-2ന് കീഴടക്കിയ ഭാരതം രണ്ടാം മത്സരത്തില് ജപ്പാനെതിരെയും അതേ മാര്ജിനില് വിജയിച്ചു. മൂന്നാം പോരില് കസാഖ്സ്ഥാനെ 15-0ന് നിഷ്പ്രഭരാക്കി ഗ്രൂപ്പിലെ ഒന്നാം സ്ഥാനക്കാരായി. ഭാരതത്തിന്റെ അടുത്ത മത്സരം ഇന്ന് മലേഷ്യയ്ക്കെതിരെയാണ്.
