ന്യൂദല്ഹി : പുതിയ ഇരട്ട നികുതി ഘടനയ്ക്ക് ജിഎസ്ടി കൗണ്സിലിന്റെ അംഗീകാരം.ഇനി മുതല് 5 ശതമാനം, 18ശതമാനം സ്ലാബുകള് മാത്രമാകും ഉണ്ടാകുക.12 ശതമാനം 28 ശതമാനം സ്ലാബുകള് നികുതി ഘടനയില് നിന്ന് ഒഴിവാക്കി.
ബുധനാഴ്ച രാത്രി കേന്ദ്ര ധനമന്ത്രി നിര്മ്മല സീതാരാമന് പത്രസമ്മേളനത്തിലാണ് ഇക്കാര്യം അറിയിച്ചത്. പുതിയ നികുതി ഘടന ഈ മാസം 22 മുതല് പ്രാബല്യത്തില് വരും. 2017 ല് പ്രഖ്യാപിച്ച ജിഎസ്ടി ഘടനയിലാണ് ഇപ്പോള് വലിയ മാറ്റം വരുന്നത്.
സാധാരണക്കാരെ മുന്നിര്ത്തിയുള്ള തീരുമാനമാണ് എടുത്തിരിക്കുന്നത്. എല്ലാ ധനമന്ത്രിമാരും യോഗത്തില് പങ്കെടുത്തുവെന്നും പ്രധാനമന്ത്രിയുടെ വാഗ്ദാനങ്ങള് നടപ്പിലായെന്നും നിര്മ്മല സീതാരാമന് പറഞ്ഞു. സാധാരണ ജനങ്ങള് ഉപയോഗിക്കുന്ന നിത്യോപയോഗ സാധനങ്ങളുടെ വില കുറയും. വ്യവസായങ്ങള്ക്ക് അനുകൂല നിലപാടാണ് എടുത്തത്.
ഷാംപൂ, സോപ്പ് ഹെയര് ഓയില്, ടോയ്ലറ്റ് സോപ്പ്, സൈക്കിള്, മറ്റ് വീട്ടു സാധനങ്ങള്,കാര്ഷികോപകരണങ്ങള് എന്നിവക്ക് 5 ശതമാനം, നിത്യോപയോഗ സാധനങ്ങള്, 2500 രൂപ വരെ വിലയുള്ള വസ്ത്രങ്ങള്, ഗ്ലൂക്കോ മീറ്റര്, കണ്ണാടി, സോളാര് പാനലുകള് എന്നിവ ഈ സ്ലാബില് വരും.
പനീര്, റൊട്ടി, കടല എന്നിവക്ക് ജിഎസ്ടി ഒഴിവാക്കി. ഇന്ത്യന് റോട്ടികള്ക്കും, ചപ്പാത്തികള്ക്കും ജിഎസ്ടി ഇല്ല. ചോക്ലേറ്റ്,കാപ്പി എന്നിവയ്ക്ക് ജിഎസ്ടി അഞ്ചുശതമാനം .
അള്ട്രാ ഹൈ ടെമ്പറേച്ചര് മില്ക്കുകള്ക്ക് ജിഎസ്ടി ഇല്ല. ഇലക്ട്രിക്ക് ഉപകരണങ്ങളായ ടി വി , ഡിഷ് വാഷര് എന്നിവയ്ക്ക് 18 ശതമാനം ജിഎസ്ടി.സോസുകള്, പാസ്ത , ബട്ടര്, ഗീ എന്നിവയുടെ നികുതി നിരക്ക് 28ല് നിന്നും 18 ആക്കി കുറച്ചു.
സിമന്റിന് 18 ശതമാനം ജി എസ് ടി. 33 ജീവന് രക്ഷാമരുന്നുകള്ക്കും ജിഎസ്ടി ഒഴിവാക്കി. ചെറുകാര്, 350 സി സി ക്ക് താഴെ 18 ശതമാനം, ട്രാക്ടറിന് 5 ശതമാനം എന്നിങ്ങനെയാണ് ജി എസ് ടി. ജൈവ കീടനാശിനികള്ക്ക് 5 ശതമാനമായിരിക്കും ജി എസ് ടി. കരകൗശല വസ്തുക്കള്, മാര്ബിള് ,കണ്ണാടി,സോളാര് പാനല് തുടങ്ങിയവയ്ക്കും 5 ശതമാനമായിരിക്കും ജിഎസ്ടി. ഓട്ടോ പാര്ട്സ്, മൂചക്ര വാഹനം 18 ശതമാനം,പാന് മസാല, പുകയില ഉല്പ്പന്നങ്ങള്, ചൂയിങ് ടൊബാക്കോ,കോള എന്നിവയക്ക് 40 ശതമാനം ജിഎസ്ടിയും ഉള്പ്പെടുത്തി.
ആഡംബര കാറുകള്, സ്വകാര്യ വിമാനങ്ങള്, വലിയ കാറുകള്, ഇടത്തരം കാറുകള് എന്നിവയ്ക്ക് 40ശതമാനം ജിഎസ്ടി ചുമത്തും.
വ്യക്തിഗത ലൈഫ് ഇന്ഷുറന്സ്, ആരോഗ്യ ഇന്ഷുറന്സ് എന്നിവയെ ജിഎസ്ടിയില് നിന്ന് ഒഴിവാക്കി. പാന് മസാല, സിഗരറ്റ് എന്നിവയുടെ വില കൂടും. ഇവയ്ക്കുള്ള നഷ്ടപരിഹാര സെസ് തത്കാലം തുടരും.
