ബെയ്ജിംഗ് : നയതന്ത്രത്തിന്റെ ദുര്ഘടവഴികളിലൂടെ മോദിയെ സഞ്ചരിപ്പിക്കുകയാണ് ആധുനിമായ ഭൗമരാഷ്ട്രീയ സങ്കീര്ണ്ണതകള്. ഉക്രൈന്-റഷ്യ യുദ്ധം, ഇറാന്-ഇസ്രയേല് യുദ്ധം, ഇന്ത്യ-പാക് യുദ്ധം എന്നിങ്ങനെ ലോകമാകെ യുദ്ധസാഹചര്യങ്ങളിലൂടെ കടന്നുപോകുമ്പോള് ശത്രുക്കളെ കണ്ടാല് ചിരിക്കേണ്ടിവരും. മിത്രങ്ങളുമായി പിണങ്ങേണ്ടി വരും. അതുകൊണ്ടാണ് നയതന്ത്രത്തില് നിതാന്തമായ ശത്രുക്കളോ മിത്രങ്ങളോ ഇല്ല എന്ന് പറയുന്നത്. .
നോക്കൂ, മോദി കഴിഞ്ഞ ദിവസത്തെ ചൈന സന്ദര്ശനത്തിനിടയില് സാധാരണ ജീവിതസാഹചര്യത്തില് നമുക്ക് മുഖത്ത് നോക്കാന് പോലും കഴിയാത്ത രണ്ടു പേരെ മോദി കണ്ടു. അതില് ഒരാള് പാകിസ്ഥാനിലെ പ്രധാനമന്ത്രി ഷെഹ്ബാസ് ഷെരീഫാണ്. മോദി അദ്ദേഹത്തിന് കൈകൊടുത്തു. ഊഷ്മളമായി സംസാരിച്ചു. രണ്ടാമത്തേയാള് തുര്ക്കി പ്രസിഡന്റ് എര്ദോഗാനാണ്. പാകിസ്ഥാന് ഓപ്പറേഷന് സിന്ദൂര് കാലത്ത് മിസൈലുകളും ഡ്രോണുകളും നല്കി സഹായിച്ച സാക്ഷാല് എര്ദോഗാന്.
ഓപ്പറേഷന് സിന്ദൂറിന് ശേഷം ഇന്ത്യയില് നിന്നും ടൂറിസ്റ്റുകള് തുര്ക്കിയിലേക്ക് പോകുന്നത് കുറച്ചു. തുര്ക്കിയില് നിന്നും ഇറക്കുമതി ചെയ്തിരുന്ന ആപ്പിള്, മാര്ബിള് എന്നിവയുടെ ഇറക്കുമതി നല്ലൊരളവില് ഇന്ത്യ കുറച്ചു. അങ്ങിനെ തുര്ക്കിയുമായി സംഘര്ഷഭരിതമായ നാളുകളാണ് കടന്നുപോയത്.
പക്ഷെ ചൈനയില് എര്ദോഗാനെ കണ്ടപ്പോള് മോദി ചിരിച്ചു. എന്ന് മാത്രമല്ല, അദ്ദേഹത്തിന് കൈകൊടുക്കുകയും ചെയ്തു. ബെലാറൂസ് പ്രധാനമന്ത്രി അലക്സാണ്ടര് ലുകാഷെങ്കോ ആണ് മോദിയും എര്ദോഗാനും കൂടി കണ്ടപ്പോള് കൂടെ ഉണ്ടായിരുന്നത്.
സങ്കീര്ണ്ണമായ നയതന്ത്രസാഹചര്യത്തിന്റെ ഭാഗമായി പ്രിയസുഹൃത്തായി കരുതിയ ട്രംപിനെ തല്ക്കാലത്തേക്ക് മോദിക്ക് അകറ്റിനിര്ത്തേണ്ടി വന്നിരിക്കുന്നു. രാജ്യത്തെ ഊര്ജ്ജ സുരക്ഷ സംരക്ഷിക്കാന്, ജനങ്ങള്ക്ക് അതേ വിലയ്ക്ക് പെട്രോളും ഡീസലും ലഭ്യമാക്കുക വഴി വിലക്കയറ്റവും ഭക്ഷ്യവിലക്കയറ്റവും പിടിച്ചുനിര്ത്താന് റഷ്യയിലെ എണ്ണ അത്യന്താപേക്ഷിതമായതിനാല് എന്ത് വരുംവരായ്കളും നേരിടാന് തയ്യാറായി നിലകൊള്ളുകയാണ് മോദി. അതിന്റെ ഭാഗമായി ഷാങ് ഹായി കോപ്പറേഷന് ഓര്ഗനൈസേഷന്റെ ഉച്ചകോടിയില് ചൈനയുടെ ഷീ ജിന്പിങ്ങിനെയും റഷ്യയുടെ പുടിനെയും കാണേണ്ടിയും വന്നു. യൂറോപ്പും യുഎസും അങ്ങേയറ്റം വെറുക്കുന്ന നടപടിയാണെന്നറിഞ്ഞിട്ടും അത് ചെയ്യേണ്ടി വന്നത് രാജ്യസുരക്ഷ ആലോചിച്ചാണ്. ഒരു രാഷ്ട്രനേതാവിന് ജനങ്ങളുടെ ക്ഷേമം മാത്രമാണ് മുന്ഗണന. മറ്റെല്ലാം രണ്ടാമതാണ്.
ഇപ്പോള് ഓരോ രാഷ്ട്രനേതാവും കടുത്ത മാനസികസമ്മര്ദ്ദത്തിന്റെ നിമിഷങ്ങളിലൂടെയാണ് കടന്നുപോകുന്നത്. നല്ല മനോധൈര്യം ഉള്ളവര്ക്ക് മാത്രമേ ഉറച്ച മനസ്സോടെ തീരുമാനങ്ങള് എടുക്കാനും നടപ്പാക്കാനും കഴിയൂ. എസ് സിഒ ഉച്ചകോടിയില് പങ്കെടുത്ത പുടിനും ഷീ ജിന്പിങ്ങും അങ്ങേയറ്റത്തെ മാനസികസംഘര്ഷങ്ങളിലൂടെയാണ കടന്നുപോകുന്നത്.
