പ്രധാനമന്ത്രി മോദി മണിപ്പൂർ, മിസോറാം സന്ദർശനത്തിന്

ഐസ്വാൾ: പ്രധാനമന്ത്രി നരേന്ദ്ര മോദി സെപ്റ്റംബർ 13 ന് മിസോറാമും മണിപ്പൂരും സന്ദർശിക്കുന്നുവെന്ന് വാർത്താ ഏജൻസിയായ പിടിഐ.
പുതിയ ബൈറാബി-സൈരാംഗ് റയിൽവേ പാത ഉദ്ഘാടനം ചെയ്യാനാണ് പ്രധാനമന്ത്രി മോദി മിസോറാം സന്ദർശിക്കുന്നത്.

2023 മെയ് മാസത്തിൽ സംസ്ഥാനത്ത് ഉണ്ടായ അനിഷ്ട സംഭവങ്ങൾക്കുശേഷം ആദ്യമായാണ് പ്രധാനമന്ത്രി സംസ്ഥാനം സന്ദർശിക്കുന്നത്. ഐസ്വാളിൽ നിന്ന് പ്രധാനമന്ത്രി മണിപ്പൂരിലേക്ക് വിമാനമാർഗ്ഗം പോകുമെന്നാണ് വിവരം.

എന്നാൽ, പ്രധാനമന്ത്രിയുടെ സന്ദർശനത്തിന്റെ യാത്രാപരിപാടി അന്തിമമായി നിശ്ചയിച്ചിട്ടില്ല എന്നാണ് ഉദ്യോഗസ്ഥർ പറയുന്നത്.
പ്രധാനമന്ത്രിയുടെ സന്ദർശനത്തിനുള്ള തയ്യാറെടുപ്പുകൾ അവലോകനം ചെയ്യുന്നതിനായി മിസോറാം ചീഫ് സെക്രട്ടറി ഖില്ലി റാം മീണ കഴിഞ്ഞ ദിവസം വിവിധ വകുപ്പുകളുമായും നിയമ നിർവ്വഹണ ഏജൻസികളുമായും യോഗം ചേർന്നിരുന്നു.

സുരക്ഷാ നടപടികൾ, ഗതാഗത മാനേജ്‌മെന്റ്, സ്വീകരണം, തെരുവ് അലങ്കാരം എന്നിവയുൾപ്പെടെ വിവിധ വിഷയങ്ങൾ യോഗം ചർച്ചയായി.

ഐസ്വാളിലെ ലാമൗളിൽ നടക്കുന്ന ഉദ്ഘാടന ചടങ്ങിൽ സർക്കാർ ജീവനക്കാർ, കർഷകർ, വിവിധ സ്‌കൂളുകളിൽ നിന്നും കോളേജുകളിൽ നിന്നുമുള്ള വിദ്യാർത്ഥികൾ എന്നിവരെ പങ്കെടുപ്പിക്കുന്നതിനുള്ള ക്രമീകരണങ്ങളെക്കുറിച്ചും യോഗം ചർച്ച ചെയ്തു.

വടക്കുകിഴക്കൻ മേഖലയിലുടനീളം കണക്റ്റിവിറ്റിയും സാമ്പത്തിക സംയോജനവും വർദ്ധിപ്പിക്കുന്നതിന് ലക്ഷ്യമിടുന്ന കേന്ദ്രത്തിന്റെ ആക്ട് ഈസ്റ്റ് പോളിസിയുടെ ഭാഗമാണ് 51.38 കിലോമീറ്റർ നീളമുള്ള റയിൽവേ ലൈൻ.

പുതിയ റെയിൽവേ ലൈൻ അസമിലെ സിൽച്ചാർ പട്ടണം വഴി ഐസ്വാളിനെ രാജ്യത്തിന്റെ മറ്റ് ഭാഗങ്ങളുമായി ബന്ധിപ്പിക്കും.