പത്തനംതിട്ട: ആഗോള അയ്യപ്പ സംഗമത്തെ വിമര്ശിച്ച് പന്തളം കൊട്ടാരം . അയ്യപ്പ സംഗമം കൊണ്ട് സാധാരണ ഭക്തര്ക്ക് എന്തു ഗുണമെന്ന് പന്തളം കൊട്ടാരം നിര്വാഹക സംഘംചോദിച്ചു.
ആഗോള സംഗമം പമ്പയില് വച്ച് നടത്തുമ്പോള് അതുകൊണ്ട് ഭക്തജനങ്ങള്ക്ക് എന്ത് ഗുണമാണ് ഉണ്ടാവുന്നത് എന്നുള്ളത് ജനങ്ങളെ ബോധ്യപ്പെടുത്താന് സര്ക്കാരും ദേവസ്വം ബോര്ഡും തയാറാകണമെന്ന് നിര്വാഹക സംഘം സെക്രട്ടറി എം ആര് എസ് വര്മ്മ ആവശ്യപ്പെട്ടു. 2018ല് യുവതി പ്രവേശനവുമായി ബന്ധപ്പെട്ട് നടന്ന നാമജപ ഘോഷയാത്രയില് പങ്കെടുത്ത ഭക്തജനങ്ങള്ക്കെതിരെ എടുത്തിരിക്കുന്ന കേസുകള് ഉടന്തന്നെ പിന്വലിക്കണം. അന്ന് ഉണ്ടായ നടപടികള് ഇനിയൊരിക്കലും ഉണ്ടാകില്ലെന്ന് സര്ക്കാര് ഭക്തര്ക്ക് ഉറപ്പ് നല്കണം .
പന്തളം കൊട്ടാരത്തിന് ഇക്കാര്യത്തില് രാഷ്ട്രീയമായ നിലപാട് ഇല്ല എന്ന് അദ്ദേഹം വ്യക്തമാക്കി. ആചാര സംരക്ഷണത്തിനായി നിലകൊളളുമെന്നും എം ആര് എസ് വര്മ്മ വ്യക്തമാക്കി.
അതേസമയം, ശബരിമല യുവതി പ്രവേശനത്തെ അനുകൂലിച്ച മുന് നിലപാടില് നിന്ന് ദേവസ്വം ബോര്ഡ് പിന്മാറുമെന്ന സൂചനയാണുളളത്. സുപ്രീംകോടതിയില് നല്കിയ സത്യവാംഗ്മൂലം തിരുത്തുന്നത് നിയമ വിദഗ്ധരുമായി ആലോചിച്ചു തീരുമാനിക്കുമെന്ന് ദേവസ്വം ബോര്ഡ് പ്രസിഡന്റ് അറിയിച്ചു.
