ന്യൂദല്ഹി : അഫ്ഗാനിസ്ഥാനിലെ ഭൂകമ്പത്തില് 800ലധികം പേര് മരിച്ചതിനെ തുടര്ന്ന് ദുരിതമനുഭവിക്കുന്നവരെ സഹായിക്കുന്നതിന് ഇടപെടലുമായി ഇന്ത്യ. അഫ്ഗാന് തലസ്ഥാനമായ കാബൂളിലേക്ക് ഇന്ത്യ ദുരിതശ്വാസ സാമഗ്രികള് അയച്ചു. ഇന്ത്യ അഫ്ഗാനൊപ്പമെന്ന് വിദേശകാര്യ മന്ത്രി അറിയിച്ചു.
വിദേശകാര്യ മന്ത്രി എസ് ജയശങ്കര് താലിബാന് വിദേശകാര്യ മന്ത്രി അമീര് ഖാന് മുത്താക്കിയുമായി സംസാരിച്ച് സ്ഥിതിഗതികള് വിലയിരുത്തി. കൂടുതല് സഹായവും വാഗ്ദാനം ചെയ്തു.
അഫ്ഗാന് ഭൂകമ്പത്തില് നേരത്തെ പ്രധാനമന്ത്രി നരേന്ദ്ര മോദി അനുശോചനം രേഖപ്പെടുത്തി. ദുരിതബാധിതര്ക്ക് എല്ലാ സഹായവും നല്കുമെന്ന് അദ്ദേഹം എക്സില് കുറിച്ചു.
”അഫ്ഗാനിസ്ഥാനിലുണ്ടായ ഭൂകമ്പത്തില് നിരവധി ജീവനുകള് നഷ്ടപ്പെട്ടതില് അതീവ ദുഃഖമുണ്ട്. ഈ ദുരിത സമയത്ത് ഞങ്ങളുടെ ചിന്തകളും പ്രാര്ത്ഥനകളും ദുഃഖിതരായ കുടുംബങ്ങളോടൊപ്പമുണ്ട്. പരിക്കേറ്റവര് എത്രയും വേഗം സുഖം പ്രാപിക്കട്ടെ എന്ന് ആശംസിക്കുന്നു. ദുരിതബാധിതര്ക്ക് സാധ്യമായ എല്ലാ മാനുഷിക സഹായവും നല്കാന് ഇന്ത്യ തയാറാണ്.”- പ്രധാനമന്ത്രി കുറിച്ചു.
അഫ്ഗാനിസ്ഥാനില് കതഴിഞ്ഞ രാത്രിയുണ്ടായ ഭൂകമ്പത്തില് 800-ല് അധികം ആളുകള് മരിക്കുകയും 2,500-ഓളം പേര്ക്ക് പരിക്കേല്ക്കുകയും ചെയ്തതായാണ്റിപ്പോര്ട്ട്.മരണസംഖ്യ ഇനിയും ഉയര്ന്നേക്കാമെന്ന് അധികൃതര് അറിയിച്ചു. ഭൂകമ്പമാപിനിയില് 6 തീവ്രത രേഖപ്പെടുത്തിയ ശക്തമായ ഭൂകമ്പമാണ് ഉണ്ടായത്. അഫ്ഗാനിസ്ഥാനിലെ താലിബാന് സര്ക്കാര് അന്താരാഷ്ട്ര സഹായം അഭ്യര്ത്ഥിച്ചിട്ടുണ്ട്.
