ന്യൂദല്ഹി: ദല്ഹിയില് ധീരജവാന്മാര്ക്ക് സ്മരണാഞ്ജലിയായി പ്രായത്തിന്റെ അവശതകള് അനുഭവിക്കുന്ന പത്മവിഭൂഷണ് ജേതാവ് ഹരിപ്രസാദ് ചൗരാസ്യയെക്കൊണ്ട് ഓടക്കുഴല് കച്ചേരി നടത്തിച്ചതില് മനംനൊന്ത് എഴുത്തുകാരി തസ്ലിമ നസ്റിന് പങ്കുവെച്ച പോസ്റ്റ് ഏറെ വിവാദമായി.
“സ്റ്റേജില് ഹരിപ്രസാദ് ചൗരാസ്യയുടെ കൈകള് വിറയ്ക്കുന്നുണ്ടായിരുന്നു. കൈകളില് ഫ്ലൂട്ട് അനങ്ങാതെ നില്ക്കുന്നുണ്ടായിരുന്നില്ല. ഏറെ പ്രയാസപ്പെട്ടാണ് അദ്ദേഹം ഫ്ലൂട്ടിലേക്ക് ഊതുന്നത്. പക്ഷെ എത്ര ഊതിയിട്ടും ഓടക്കുഴലില് നാദം വരുന്നുണ്ടായിരുന്നില്ല. ദല്ഹിയിലെ കമാനി ഓഡിറ്റോറിയത്തില് ഹരിപ്രസാദ് ചൗരാസ്യയുടെ കച്ചേരി കേട്ട് എന്റെ ഹൃദയം തകര്ന്നു. സംഘാടകരേയാണ് കുറ്റപ്പെടുത്തേണ്ടത്. ഇത്രയും ശാരീരിക, മാനസിക ക്ലേശം അദ്ദേഹത്തിന് നല്കിയത് ശരിയായില്ല.” – എഴുത്തുകാരി തസ്ലിമ നസ്റീന് പങ്കുവെച്ച സമൂഹമാധ്യമപോസ്റ്റ് വലിയ ചര്ച്ചാവിഷയമായി. കൂടെ ഹരിപ്രസാദ് ചൗരാസ്യയുടെ വീഡിയോയും തസ്ലിമ നസ്റീന് പങ്കുവെച്ചിരുന്നു. ലജ്ജ തുടങ്ങിയ നോവലുകളിലൂടെ ഇസ്ലാമിക മൗലികവാദത്തെ വിമര്ശിച്ച ബംഗ്ലാദേശ് എഴുത്തുകാരിയാണ് തസ്ലിമ നസ്റീന്. ഇവര്ക്കെതിരെ ഇസ്ലാമിക സംഘടനകള് ഫത്വ പുറപ്പെടുവിച്ചതിനെ തുടര്ന്ന് ഇന്ത്യയില് അഭയം തേടുകയായിരുന്നു തസ്ലിമ. ഇപ്പോള് ഇന്ത്യയില് സ്ഥിരതാമസം.
എല്ഡെകോ ഗ്രൂപ്പും ഇന്ത്യന് ഓയില് കോര്പറേഷനും പണ്ഡിറ്റ് ചതുര്ലാല് മെമ്മോറിയല് സൊസൈറ്റിയും ചേര്ന്നാണ് ധീരജവാന്മാര്ക്ക് സ്മരണാഞ്ജലിയായി ഹരിപ്രസാദ് ചൗരാസ്യയുടെ സംഗീതക്കച്ചേരി സംഘടിപ്പിച്ചത്. എന്നാല് ഇതിന് പിന്നാലെ ഹരിപ്രസാദ് ചൗരാസ്യ തന്നെ ഒരു പോസ്റ്റ് പങ്കുവെച്ചു. “സ്വന്തം ഇഷ്ടപ്രകാരമാണ്, ആരും നിര്ബന്ധിച്ചതുകൊണ്ടല്ല, താന് സംഗീതക്കച്ചേരി നടത്താന് ശ്രമിച്ചത്. മറ്റുള്ളവര്ക്ക് സന്തോഷം പകര്ന്ന് നല്കുന്നതിലായിരുന്നു എന്റെ ആഹ്ളാദം.ശ്രോതാക്കളാണ് എനിക്ക് എന്നും പ്രചോദനം നല്കുന്നത്”- ഇതായിരുന്നു 87 കാരനായ ഹരിപ്രസാദ് ചൗരാസ്യയുടെ മറുപടി.
ഇതേക്കുറിച്ച് സമൂഹമാധ്യമങ്ങളില് പല കമന്റുകളും നിറയുകയാണ്. ഹരിപ്രസാദ് ചൗരാസ്യയുടെ വീഡിയോ പരസ്യമാക്കിയത് ശരിയായില്ലെന്ന് പലരും തസ്ലിമ നസ്റീനെ വിമര്ശിച്ചു. കലാകാരന് തന്നെ സ്വന്തം നിലയ്ക്ക് ഇത്തരമൊരു ഉദ്യമത്തിന് തുനിഞ്ഞതിന് സംഘാടകരെ കുറ്റപ്പെടുത്താനാവില്ലെന്നും ചിലര് കുറിച്ചു.
