ചേര്ത്തല: എസ്എന്ഡിപി യോഗം ജനറല് സെക്രട്ടറി വെളളാപ്പള്ളി നടേശന് പിറന്നാള് ദിനത്തില് ആശംസാ പ്രവാഹം. 89-ാം പിറന്നാള് ദിനമായിരുന്ന ഇന്നലെ രാവിലെ മുതല് വെള്ളാപ്പള്ളിക്ക് ഫോണിലൂടെയും നേരിട്ടും ആശംസകള് നേര്ന്നത് അനവധി പേരാണ്. മുഖ്യമന്ത്രിയും വിവിധ സംസ്ഥാനങ്ങളിലെ ഗവര്ണര്മാരും കേന്ദ്രമന്ത്രിമാരും സംസ്ഥാന മന്ത്രിമാരും എംഎല്എമാരും ഉള്പ്പെടെയുള്ളവര് ഫോണില് ആശംസകള് നേര്ന്നു.
സംസ്ഥാനത്തിന്റെ വിവിധ ഭാഗങ്ങളില് നിന്നുള്ള എസ്എന്ഡിപി യോഗം, എസ്എന് ട്രസ്റ്റ് നേതാക്കളും ആശംസകളുമായി വെള്ളാപ്പള്ളിയുടെ കണിച്ചുകുളങ്ങരയിലെ വസതിയിലെത്തി. പിറന്നാളിനോടനുബന്ധിച്ച് മൂന്നു ദിവസമായി നടന്നുവന്ന പൂജകള് ഇന്നലെ ഉച്ചയോടെ സമാപിച്ചു. ലളിതമായ ചടങ്ങില് വെള്ളാപ്പള്ളി പിറന്നാള് കേക്ക് മുറിച്ചു. ഭാര്യ പ്രീതി നടേശന്, മകള് വന്ദന, മരുമക്കളായ ശ്രീകുമാര്, ആശ തുഷാര്, പേരക്കുട്ടികളായ ദേവ് തുഷാര്, ജീവന് തുടങ്ങിയ കുടുംബാംഗങ്ങളും യോഗം, ട്രസ്റ്റ് നേതാക്കളും പങ്കെടുത്തു. പിറന്നാള് സദ്യയുമൊരുക്കിയിരുന്നു. ആരേയും പ്രത്യേകം ക്ഷണിച്ചിരുന്നില്ല.
മൂന്നു പതിറ്റാണ്ടായി പതിവു തെറ്റിക്കാതെ, തൃശൂര് പൊയ്യ സിഎഫ്ഐ കോളജ് ഓഫ് ലോ ആന്ഡ് സിഎഫ്ഐ കോളജ് ഓഫ് എഡ്യുക്കേഷന് ഡയറക്ടര് പി.ജെ. മാത്യു ഇത്തവണയും പിറന്നാള് കേക്കുമായി എത്തി. വെള്ളാപ്പള്ളി ആറുപതിറ്റാണ്ടിലധികമായി പ്രസിഡന്റായി തുടരുന്ന കണിച്ചുകുളങ്ങര ദേവീ ക്ഷേത്രത്തില് പൂജയും പ്രത്യേക വഴിപാ
ടുകളും നടത്തി. ചുറ്റു വിളക്കും തെളിയിച്ചു.
