ബെയ്ജിംഗ് : ചൈനയില് എസ് സിഒ ഉച്ചകോടിക്കിടയില് പ്രധാനമന്ത്രി മോദിയും റഷ്യന് പ്രസിഡന്റ് പുടിനുമായി പ്രത്യേകം കൂടിക്കാഴ്ച നടക്കും. പുടിന്റെ വിദേശകാര്യ ഉപദേഷ്ടാവായ യുറി ഉഷകോവാണ് ഇക്കാര്യം സ്ഥിരീകരിച്ചത്. അമേരിക്കയുമായുള്ള വ്യാപാരതീരുവ വിവാദത്തിന്റെ പശ്ചാത്തലത്തില്, മോദി-പുടിന് കൂടിക്കാഴ്ചയ്ക്ക് ലോകമാധ്യമങ്ങള് വലിയ പ്രാധാന്യം നല്കും. ഇതോടെ മോദി ശക്തനായ ആഗോള നേതാവായി മാറുകയാണ്.
“എസ് സിഒ യോഗത്തിന് ശേഷം പുടിന് മോദിയുമായി കൂടിക്കാഴ്ച നടത്തും. ഈ വര്ഷം ഇരുനേതാക്കളും തമ്മില് നടത്തുന്ന ആദ്യകൂടിക്കാഴ്ചയായിരിക്കും ഇത്. ഇവര് രണ്ടു പേരും പതിവായി ഫോണില് ബന്ധപ്പെടാറുണ്ട്. പ്രസിഡന്റ് പുടിന് ഈ ഡിസംബറില് ഇന്ത്യ സന്ദര്ശിക്കാനിരിക്കുകയാണ്. ഈ സന്ദര്ശനത്തിനുള്ള ഒരുക്കങ്ങളെക്കുറിച്ച് ഇരുവരും ചര്ച്ച നടത്തും. എല്ലാ വര്ഷവും ഇരുനേതാക്കളും തമ്മില് കൂടിക്കാഴ്ച നടത്തണമെന്ന് മുന്പേ പറഞ്ഞിരുന്നതാണ്. എന്തായാലും ഈ വര്ഷം അതിന് കളമൊരുങ്ങുകയാണ്. ” -റഷ്യയുടെ വിദേശകാര്യ ഉപദേഷ്ടാവായ യുറി ഉഷകോവ് പറഞ്ഞു.
ഊര്ജ്ജം, പ്രതിരോധം, തന്ത്രപരമായ സ്വയംപര്യാപ്തത എന്നീ വിഷയങ്ങള് ഇരുനേതാക്കളും തമ്മില് ചര്ച്ച ചെയ്യും. പാശ്ചാത്യ രാജ്യങ്ങള് റഷ്യയെ ഒറ്റപ്പെടുത്തുമ്പോള് റഷ്യയുടെ ഇന്ധം വാങ്ങുന്നത് പ്രധാനമാണെന്ന് യുറി ഉഷകോവ് പറഞ്ഞു. അമേരിക്കയുടെ വ്യാപാരത്തീരുവ യുദ്ധത്തിന്റെ പശ്ചാത്തലത്തില് ഇന്ത്യ- റഷ്യ സൗഹൃദം വലിയൊരു ചെറുത്തുനില്പ്പായി വാര്ത്തകളില് നിറയുകയാണ്.
പുടിന്റെ ഇന്ത്യാ സന്ദര്ശനത്തിനുള്ള ഒരുക്കങ്ങളെക്കുറിച്ച് ദേശീയ സുരക്ഷാ ഉപദേഷ്ഠാവ് അജിത് ഡോവല് റഷ്യയില് പുടിനുമായി കൂടിക്കാഴ്ച നടത്തി വിശദീകരിച്ചിരുന്നു. അതിന് പിന്നാലെ വിദേശകാര്യമന്ത്രി ജയശങ്കറും റഷ്യ സന്ദര്ശിക്കുകയുണ്ടായി. അദ്ദേഹവും പുടിനെ കണ്ടിരുന്നു. മോദിയും പുടിനും തമ്മിലുള്ള കൂടിക്കാഴ്ചയില് വ്യാപാരം വര്ധിപ്പിക്കുന്നതിനെക്കുറിച്ചായിരിക്കും ചര്ച്ചയുണ്ടാവുകയെന്ന് ജയശങ്കര് സൂചിപ്പിച്ചിരുന്നു. അമേരിക്ക നല്കുന്ന വ്യാപാരസമ്മര്ദ്ദത്തെ ജയശങ്കര് തള്ളിക്കളയുകയും ചെയ്തിരുന്നു.റഷ്യയുടെ വിപണിയിലേക്ക് കൂടുതല് പ്രവേശനം വേണമെന്നാണ് ജയശങ്കര് ആവശ്യപ്പെട്ടത്. ഇത് അമേരിക്കയെ വല്ലാതെ പ്രകോപിപ്പിച്ചിരുന്നു. ഇന്ത്യ അമേരിക്കയുടെ ഭീഷണിയെ നിസ്സാരമായി തള്ളുന്നതില് അമര്ഷം പൂണ്ടാണ് ഇന്ത്യയാണ് ഉക്രൈനിലെ യുദ്ധം നടത്തുന്നതെന്ന് അമേരിക്കയുടെ പീറ്റര് നവാരോ ആരോപിച്ചത്.
