ടോക്കിയോ: സ്വതന്ത്രവും തുറന്നതും സമാധാനപരവും സമൃദ്ധവും നിയമാധിഷ്ഠിതവുമായ ഒരു ഇന്തോ-പസഫിക് മേഖലയ്ക്ക് ഭാരതവും ജപ്പാനും പൂര്ണമായും പ്രതിജ്ഞാബദ്ധമാണെന്ന് പ്രധാനമന്ത്രി നരേന്ദ്രമോദി പറഞ്ഞു. ജപ്പാനിലെത്തിയ പ്രധാനമന്ത്രി നരേന്ദ്രമോദി സംയുക്ത വാര്ത്താസമ്മേളനത്തില് സംസാരിക്കുകയായിരുന്നു. ഭീകരതയെയും സൈബര് സുരക്ഷയെയും കുറിച്ചുള്ള ഭാരതത്തിന്റെയും ജപ്പാന്റെയും ആശങ്കകള് ഒന്നുതന്നെയാണ്. പ്രതിരോധവും സമുദ്ര സുരക്ഷയും വര്ദ്ധിപ്പിക്കുന്നതില് ഇരുപക്ഷത്തിനും പൊതുവായ താല്പര്യങ്ങളുണ്ടെന്നും അദ്ദേഹം കൂട്ടിച്ചേര്ത്തു.
ഭാരത – ജപ്പാന് പങ്കാളിത്തം പരസ്പര വിശ്വാസത്തില് വേരൂന്നിയതാണെന്ന് മോദി ചൂണ്ടിക്കാട്ടി. അത് നമ്മുടെ ദേശീയ മുന്ഗണനകളെ പ്രതിഫലിപ്പിക്കുന്നു, നമ്മുടെ പൊതുവായ മൂല്യങ്ങളും വിശ്വാസങ്ങളും അതിനെ രൂപപ്പെടുത്തുന്നു. ഒരു മികച്ച ലോകത്തെ രൂപപ്പെടുത്തുന്നതില് ശക്തമായ ജനാധിപത്യ രാജ്യങ്ങള് സ്വാഭാവിക പങ്കാളികളാണെന്നും മോദി കൂട്ടിച്ചേര്ത്തു. അടുത്ത തലമുറയിലെ വെല്ലുവിളികളെ നേരിടാന് ഇരുപക്ഷവും പരസ്പരം ശക്തി പ്രയോജനപ്പെടുത്തണമെന്ന് ജപ്പാന് പ്രധാനമന്ത്രി ഷിഗെരു ഇഷിബ പ്രസ്താവനയില് പറഞ്ഞു.
പ്രതിരോധ, സുരക്ഷാ സഹകരണം വികസിപ്പിക്കുന്നതിന് ഒരു സമഗ്ര ചട്ടക്കൂട് തയ്യാറാക്കും. ജോയിന്റ് ക്രെഡിറ്റിംഗ് മെക്കാനിസം, ഡിജിറ്റല് പങ്കാളിത്തം, സാംസ്കാരിക വിനിമയം, വികേന്ദ്രീകൃത ഗാര്ഹിക മാലിന്യജല മാനേജ്മെന്റ്, ധാതുവിഭവ മേഖലയിലെ സഹകരണം, സുഷമ സ്വരാജ് ഇന്സ്റ്റിറ്റ്യൂട്ട് ഓഫ് ഫോറിന് സര്വീസും ജപ്പാനിലെ വിദേശകാര്യ മന്ത്രാലയവും തമ്മിലുള്ള സഹകരണം എന്നിവക്കായുള്ള ധാരണാപത്രങ്ങളില് ഇരുരാജ്യങ്ങളും ഒപ്പുവെച്ചു. ഐഎസ്ആര്ഒയും ജപ്പാന് എയ്റോസ്പേസ് പര്യവേഷണ ഏജന്സിയും തമ്മില് ചന്ദ്രയാന് അഞ്ച് ദൗത്യത്തില് സഹകരണം എന്നിവയ്ക്കും ധാരണയായി. ഭാരത – ജപ്പാന് ചെറുകിട, ഇടത്തരം സംരംഭങ്ങളുടെ സഹകരണം ശക്തിപ്പെടുത്തുന്നതിനായി ഭാരത – ജപ്പാന് ചെറുകിട, ഇടത്തരം സംരംഭങ്ങളുടെ ഫോറത്തിനും തുടക്കമായി. ഇന്നലെ രാവിലെ ടോക്കിയോവിലെത്തിയ പ്രധാനമന്ത്രിക്ക് സ്നേഹോഷ്മള സ്വീകരണമാണ് ലഭിച്ചത്. ഭാരത – ജപ്പാന് ഇക്കണോമിക് ഫോറത്തില് സംസാരിച്ച പ്രധാനമന്ത്രി നരേന്ദ്രമോദി, ഇരുരാജ്യങ്ങളും തമ്മിലുള്ള ശക്തമായ വ്യാപാര ബന്ധങ്ങള് നമ്മുടെ സൗഹൃദത്തിന്റെ ഒരു പ്രധാന ഘടകമാണെന്ന് വ്യക്തമാക്കി.
