തിരുവനന്തപുരം: റിപ്പോര്ട്ടര് ടി വിയിയെക്കുറിച്ച് രണ്ടു വനിത മാധ്യമപ്രവര്ത്തകര് സാമൂഹിക മാധ്യമങ്ങളിലൂടെ പുറത്തുവിട്ട വിവരങ്ങള് ഞെട്ടിക്കുന്നതാണെന്ന് കേരള പത്രപ്രവര്ത്തക യൂണിയന്. ജോലി തുടരാന് കഴിയാത്ത വിധം സ്ഥിതി വഷളാവുകയും സുരക്ഷിതമായ തൊഴില് അന്തരീക്ഷം നഷ്ടമാവുകയും ചെയ്യുന്നത് ഒരു സ്ഥാപനത്തിനും ഭൂഷണമല്ല.
ഇത്രയും ഗുരുതരമായ വെളിപ്പെടുത്തലുകളുടെ പശ്ചാത്തലത്തില് പരാതിക്ക് കാത്തുനില്ക്കാതെ നിഷ്പക്ഷമായ അന്വേഷണം നടത്തി നടപടി സ്വീകരിക്കുകയാണ് റിപ്പോര്ട്ടര് ടി.വി അധികാരികള് ചെയ്യേണ്ടത്. ഭാവിയില് ഇത്തരം സാഹചര്യങ്ങള് ഒഴിവാക്കി തൊഴില്സൗഹൃദ പണിയിടം എന്ന പ്രതിച്ഛായ ഉറപ്പ് വരുത്താന് മാനേജ്മെന്റ് അടിയന്തര നടപടി സ്വീകരിക്കണമെന്ന് യൂണിയന് പ്രസിഡന്റ് കെ.പി റജിയും ജനറല് സെക്രട്ടറി സുരേഷ് എടപ്പാളും ആവശ്യപ്പെട്ടു.
രാഷ്ട്രീയ പക തീര്ക്കാന് മാധ്യമ സ്ഥാപനങ്ങള്ക്ക് നേരെ ആക്രമണം നടത്തുന്നത് ജനാധിപത്യ വിരുദ്ധമെന്നും യൂണിയന് അറിയിച്ചു.
