കൊച്ചി: സംസ്ഥാനത്ത് എഐ ക്യാമറകള് സ്ഥാപിച്ചതില് അഴിമതി ആരോപിച്ച് കോണ്ഗ്രസ് നേതാക്കള് നല്കിയ ഹര്ജി ഹൈക്കോടതി തള്ളി. എഐ ക്യാമറ അഴിമതിയില് ഹൈക്കോടതി മേല്നോട്ടത്തില് അന്വേഷണം വേണമെന്ന പ്രതിപക്ഷ നേതാവ് വി ഡി സതീശന്റെയും രമേശ് ചെന്നിത്തലയുടെയും പൊതുതാല്പ്പര്യ ഹര്ജിയാണ് ഹൈക്കോടതി തള്ളിയത്.
ചീഫ് ജസ്റ്റിസ് നിതിന് ജാംദാര്, ജസ്റ്റിസ് ബസന്ത് ബാലാജി എന്നിവരുള്പ്പെട്ട ഡിവിഷന് ബെഞ്ചാണ് വാദം കേട്ട ശേഷം ഹര്ജി തള്ളിയത്. കരാറില് അഴിമതി നേരിട്ട് വ്യക്തമാക്കുന്ന തെളിവുകളൊന്നും ഹര്ജിക്കാര് നല്കിയിട്ടില്ലെന്ന് നിരീക്ഷിച്ചാണ് കോടതി ഹര്ജി തള്ളിയത്.
ആരോപണങ്ങളില് വസ്തുതാപരമായ തെളിവുകളില്ലെന്ന് കോടതി പറഞ്ഞു. കരാര് ഏറ്റെടുത്ത കമ്പനികള് ഉപകരാര് നല്കിയതും ഈ കമ്പനികളുടെ സാങ്കേതിക മികവിലടക്കം ചോദ്യങ്ങള് ഉയര്ത്തിയുമായിരുന്നു ഹര്ജി.
