ന്യൂദല്ഹി : കേന്ദ്ര ന്യൂനപക്ഷകാര്യ മന്ത്രാലയം ആഗസ്റ്റ് 26 മുതല് സെപ്തംബര് 4 വരെ കൊച്ചി ഷണ്മുഖം റോഡിലുള്ള മറൈന് ഡ്രൈവ് മൈതാനത്ത് ലോക് സംവര്ദ്ധന് പര്വ് സംഘടിപ്പിക്കുന്നു. ഈ ദിവസങ്ങളില് രാവിലെ 10 മണി മുതല് വൈകുന്നേരം ഏഴ് മണി വരെയാണ് പരിപാടി.പൊതുജനങ്ങള്ക്ക് പ്രവേശനം സൗജന്യം.
ലോക് സംവര്ദ്ധന് പര്വിന്റെ അഞ്ചാം പതിപ്പ് ആണിത്.കേന്ദ്ര സഹമന്ത്രി ജോര്ജ് കുര്യന് പരിപാടി ഉദ്ഘാടനം ചെയ്യും.
ന്യൂനപക്ഷ സമുദായങ്ങളില് നിന്നുള്ള കരകൗശല വിദഗ്ധര്,കരകൗശല തൊഴിലാളികള്,നെയ്ത്തുകാര്, പാചക വിദഗ്ധര്,സംരംഭകര് എന്നിവര്ക്ക് വിപണി ബന്ധങ്ങളും ദേശീയ തലത്തിലുള്ള അവസരങ്ങളും ഒരുക്കിക്കൊടുക്കുന്നതിനായി രൂപകല്പ്പന ചെയ്തിരിക്കുന്ന മന്ത്രാലയത്തിന്റെ മുന്നിര സംരംഭമാണ് ലോക് സംവര്ദ്ധന് പര്വ്. കല, കരകൗശലം, കഴിവുകള് എന്നിവ പ്രദര്ശിപ്പിക്കുന്നതിനുള്ള ഒരു വേദി വാഗ്ദാനം ചെയ്യുന്നതിലൂടെ ഇന്ത്യയുടെ ഊര്ജ്ജസ്വലമായ വൈവിധ്യത്തെ ആഘോഷിക്കുന്നതിനൊപ്പം സാമ്പത്തിക ശാക്തീകരണവും ഇത് ശക്തിപ്പെടുത്തുന്നു.
10 ദിവസത്തെ മേളയില് രാജ്യത്തുടനീളമുള്ള നൂറിലധികം കരകൗശലത്തൊഴിലാളികളും 15 പാചക വിദഗ്ധരും അണിനിരക്കും.ഉത്തര്പ്രദേശിലെ സരി,ചിക്കന്കാരി,പഞ്ചാബിലെ ഫുല്കാരി എംബ്രോയിഡറി,ബീഹാറിലെ മധുബനി പെയിന്റിംഗുകള്,രാജസ്ഥാനിലെ നീല മണ്പാത്രങ്ങള് തുടങ്ങി ലഡാക്കില് നിന്നുള്ള പശ്മിന നെയ്ത്ത്,ഛത്തീസ്ഗഢില് നിന്നുള്ള ബസ്തര് ഇരുമ്പ് കരകൗശല വസ്തുക്കള്,കര്ണാടകയില് നിന്നുള്ള ചന്നപട്ടണ മരത്തടി കൊണ്ടുള്ള കളിപ്പാട്ടങ്ങള്,കേരളത്തിന്റെ സ്വന്തം നെറ്റിപ്പട്ടം നിര്മ്മാണം തുടങ്ങിയ പരമ്പരാഗത കരകൗശലങ്ങള് മേളയില് പ്രദര്ശിപ്പിക്കും.പരമ്പരാഗത ഭക്ഷണങ്ങള്,സുഗന്ധവ്യഞ്ജനങ്ങള്,അച്ചാറുകള്,ബേക്കറി ഉല്പ്പന്നങ്ങള്,ഔഷധസസ്യങ്ങള്,തീരദേശ വിഭവങ്ങള് എന്നിവ ഉള്ക്കൊള്ളുന്ന വിപുലമായ പാചക പ്രദര്ശനവും സന്ദര്ശകര്ക്ക് ആസ്വദിക്കാന് കഴിയും.പ്രദര്ശനത്തോടൊപ്പം ന്യൂനപക്ഷ സമുദായങ്ങളുടെ സമ്പന്നമായ കലാ പൈതൃകത്തെ ഉയര്ത്തിക്കാട്ടുന്ന സാംസ്കാരിക പ്രകടനങ്ങളും തത്സമയ പ്രകടനങ്ങളും മേളയില് നടക്കും.
സംസ്കാരത്തിലൂടെ സമൂഹങ്ങളെ ശാക്തീകരിക്കുന്ന ലോക് സംവര്ദ്ധന് പര്വ് വെറുമൊരു പ്രദര്ശനം മാത്രമല്ല ഇന്ത്യയുടെ വൈവിധ്യമാര്ന്ന സാംസ്കാരിക പൈതൃകത്തിന്റെ ആഘോഷം കൂടിയാണ്.ന്യൂനപക്ഷ സമുദായങ്ങളില് നിന്നുള്ള കരകൗശല തൊഴിലാളികള്ക്കും പാചക വിദഗ്ധര്ക്കും സ്വാശ്രയത്വം,സാമ്പത്തിക ശാക്തീകരണം,സാമുദായിക ഐക്യം എന്നിവ പ്രോത്സാഹിപ്പിക്കുന്ന ഒരു ദേശീയ വേദി ഇത് നല്കുന്നു.
എല്ലാവര്ക്കുമൊപ്പം,എല്ലാവരുടെയും വികസനം,എല്ലാവരുടെയും വിശ്വാസം,എല്ലാവരുടെയും പരിശ്രമം എന്നീ ദര്ശനങ്ങളുമായി പൊരുത്തപ്പെടുന്ന ലോക് സംവര്ദ്ധന് പര്വ്,സാംസ്കാരിക ബന്ധങ്ങള് ശക്തിപ്പെടുത്തുന്നതിനൊപ്പം സുസ്ഥിരമായ ഉപജീവന അവസരങ്ങള് വളര്ത്തിയെടുക്കുന്നതിനുള്ള വേദി കൂടിയാണ്.
