ജോധ്പൂര് : ഓപ്പറേഷന് സിന്ദൂറില് അതിര്ത്തി പ്രദേശങ്ങളിലെ ജനങ്ങള് സായുധ സേനയ്ക്ക് പൂര്ണ പിന്തുണ നല്കിയെന്നും രാജ്യസുരക്ഷ സര്ക്കാരിന്റെയോ സൈന്യത്തിന്റെയോ മാത്രം ഉത്തരവാദിത്തമല്ല, മറിച്ച് ഓരോ പൗരന്റെയും ഉത്തരവാദിത്തമാണെന്നതിന്റെ തെളിവാണിതെന്നും പ്രതിരോധ മന്ത്രി രാജ്നാഥ് സിംഗ്.രാജസ്ഥാനിലെ ജോധ്പൂരില് പ്രതിരോധ-കായിക അക്കാദമിയുടെ ഉദ്ഘാടന വേളയില് സംസാരിക്കുകയായിരുന്നു മന്ത്രി.ജനങ്ങള് പ്രത്യേകിച്ച് യുവാക്കള്, തങ്ങളുടെ കടമകളെക്കുറിച്ച് ബോധവാന്മാരും സമര്പ്പണമനോഭാവമുള്ളവരും ആയിരുന്നാല് രാജ്യത്തിന് ഏത് ബുദ്ധിമുട്ടും നേരിടാനും കൂടുതല് ശക്തരാകാനും കഴിയുമെന്നും അദ്ദേഹം പറഞ്ഞു.
പഹല്ഗാമിലെ ഭീകരാക്രമണത്തിന് ഇന്ത്യന് സായുധ സേന ഉചിതമായ മറുപടി നല്കുകയും നിശ്ചയിച്ച ലക്ഷ്യങ്ങള് കൃത്യതയോടെ കൈവരിക്കുകയും ചെയ്ത ഓപ്പറേഷന് സിന്ദൂറില്
യുവാക്കള് പ്രകടിപ്പിച്ച ആവേശത്തെയും ദൃഢനിശ്ചയത്തെയും പ്രതിരോധ മന്ത്രി അഭിനന്ദിച്ചു. ജാതിയുടെയും മതത്തിന്റെയും അടിസ്ഥാനത്തില് ഇന്ത്യ വിവേചനം കാണിക്കുന്നില്ലെന്ന് ഊന്നിപ്പറഞ്ഞ അദ്ദേഹം, പഹല്ഗാമില് ഭീകരവാദികള് അവരുടെ ധര്മ്മത്തിന്റെ അടിസ്ഥാനത്തില് നിരപരാധികളെ കൊന്നപ്പോള്, ഇന്ത്യന് സായുധ സേന, അവരുടെ കര്മ്മത്തിന്റെ അടിസ്ഥാനത്തില് ഭീകരവാദികള്ക്ക് അഭയം നല്കിയവരെ നശിപ്പിച്ചുവെന്ന് പറഞ്ഞു.
പ്രതിരോധ-കായിക അക്കാദമി പോലുള്ള സംരംഭങ്ങളുടെ പ്രാധാന്യം അടിവരയിട്ടുകൊണ്ട്, പ്രതിരോധം, വിദ്യാഭ്യാസം, കായികം എന്നിവയുടെ സംയോജനം സുരക്ഷിതവും ശക്തവുമായ ഒരു രാഷ്ട്രം കെട്ടിപ്പടുക്കുന്നതില് നിര്ണായകമാണെന്ന് രാജ്നാഥ് സിംഗ് എടുത്തു പറഞ്ഞു. ‘വിദ്യാഭ്യാസം അറിവ് നല്കുമ്പോള് പ്രതിരോധം സുരക്ഷ ഉറപ്പാക്കുന്നു. സ്ഥിരോത്സാഹം, അച്ചടക്കം, ക്ഷമ, ദൃഢനിശ്ചയം തുടങ്ങിയ ഗുണങ്ങള് ഒരു സൈനികന് ഒരു കായികതാരത്തെപ്പോലെ പ്രധാനമാണ്.പ്രതിരോധം, വിദ്യാഭ്യാസം, കായികം എന്നിവയുടെ സംഗമത്തിന്റെ ഉല്പ്പന്നങ്ങളായ വിദ്യാര്ത്ഥികള്ക്ക് ദേശീയ, അന്തര്ദേശീയ തലങ്ങളില് രാജ്യത്തിന്റെ അഭിമാനംഉയര്ത്താന് കഴിയുമെന്ന് രാജ്നാഥ് സിംഗ് പറഞ്ഞു. അറിവ്, സംസ്കാരം, ശക്തി എന്നിവയില് ലോകത്തിന്റെ മുന്നില് നില്ക്കുന്ന ഒരു രാഷ്ട്രം കെട്ടിപ്പടുക്കാന് പൗരന്മാരെ അദ്ദേഹം ഉദ്ബോധിപ്പിച്ചു.
രാജ്യത്തെ സംരക്ഷിക്കുന്നതില് സൈനികരുടെ നിര്ണായക സംഭാവനയെ പരാമര്ശിച്ച പ്രതിരോധ മന്ത്രി സൈനികരുടെ അതേ അനുപാതത്തില് ഉദ്യോഗസ്ഥരെ സൃഷ്ടിക്കാന് ഈ മേഖലയ്ക്ക് കഴിയുന്നില്ലെന്ന് ചൂണ്ടിക്കാട്ടി. സായുധ സേനയില് ഉദ്യോഗസ്ഥരായി ചേരാനും ദേശീയ സുരക്ഷ കൂടുതല് ശക്തിപ്പെടുത്തുന്നതില് സംഭാവന നല്കാനും അദ്ദേഹം ജനങ്ങളോട് അഭ്യര്ത്ഥിച്ചു.
കേന്ദ്ര സാംസ്കാരിക, ടൂറിസം മന്ത്രി ഗജേന്ദ്ര സിംഗ് ശെഖാവത്ത് ചടങ്ങില് അധ്യക്ഷത വഹിച്ചു. മറ്റ് വിശിഷ്ട വ്യക്തികളും ചടങ്ങില് പങ്കെടുത്തു.
