കോണ്ഗ്രസിന്റെ പ്രമുഖ നേതാവും പാലക്കാട് എംഎല്എയുമായ രാഹുല് മാങ്കൂട്ടത്തിനെതിരെ ലൈംഗിക പീഡന പരാതികള് പ്രവഹിക്കുകയാണ്. കോണ്ഗ്രസ് പ്രവര്ത്തകയും സിനിമാ നടിയുമായ ഒരു യുവതിയുടെ വെളിപ്പെടുത്തലിനെ തുടര്ന്ന് രാഹുലിന് യൂത്ത് കോണ്ഗ്രസ് സംസ്ഥാന അധ്യക്ഷ സ്ഥാനം രാജിവെക്കേണ്ടി വന്നു. എന്നാല് മറ്റ് ചില യുവതികള് കൂടി ആരോപണങ്ങളുമായി രംഗത്തുവന്നിരിക്കുന്നു. രാഹുല് തങ്ങളോട് വളരെ മോശമായാണ് പെരുമാറിയതെന്ന് സാക്ഷ്യപ്പെടുത്തുന്ന വാട്സ് ആപ്പ് ചാറ്റുകളും മറ്റും ഈ യുവതികള് പരസ്യമാക്കിയിട്ടുണ്ട്. രാഹുല് ഗര്ഭഛിദ്രത്തിന് നിര്ബന്ധിച്ചുവെന്ന് മറ്റൊരു ആരോപണവും ഉയര്ന്നിരിക്കുന്നു. കോണ്ഗ്രസിന്റെ ഒരു മുന് എംപിയുടെ മകളെ പ്രണയിച്ചുവെന്നും, പിന്നീട് ജാതിയുടെ പേരുപറഞ്ഞ് രാഹുല് പിന്വാങ്ങിയെന്നും സമൂഹമാധ്യമങ്ങളില് പ്രചരിക്കുന്നുണ്ട്. ഇതിനു പുറമെയാണ് രാഹുല് തന്നെ ബംഗളൂരുവിലെ ഹോട്ടലിലേക്ക് ക്ഷണിച്ചുവെന്നും, അവിടെവച്ച് ബലാത്സംഗം ചെയ്യണമെന്നു ആവശ്യപ്പെട്ടതായും ഒരു ട്രാന്സ് ജെന്ഡര് യുവതിയുടെ വെളിപ്പെടുത്തല്. ഈ ആരോപണങ്ങള് മഞ്ഞുമലയുടെ മേല് ത്തുമ്പുമാത്രം ആവാനാണ് സാധ്യത. ഇനി എന്തൊക്കെയാണ് പുറത്തുവരാനുള്ളതെന്ന് കാത്തിരുന്നു കാണേണ്ടിയിരിക്കുന്നു.
രാഹുലിനെതിരായി വന്നിരിക്കുന്ന ആരോപണങ്ങളില് കോണ്ഗ്രസ് പാര്ട്ടി തന്നെ പ്രതിക്കൂട്ടിലാണ്. കാരണം അതീവ ഗുരുതരമായ ഈ ആരോപണങ്ങളെക്കുറിച്ച് പ്രതിപക്ഷനേതാവ് വി.ഡി. സതീശന് ഉള്പ്പെടെയുള്ളവര്ക്ക് അറിയാമായിരുന്നു. ഇരയായ ഒരു യുവതി തന്നോട് ഇക്കാര്യം നേരിട്ട് പറഞ്ഞിരുന്നുവെന്ന് സതീശന് സമ്മതിക്കുന്നുണ്ട്. പക്ഷേ ‘പ്രതി’ പാര്ട്ടിയിലെ സ്വപക്ഷക്കാരനായതിനാല് പ്രശ്നം ഒതുക്കി ത്തീര്ക്കുകയായിരുന്നുവത്രേ. രാഹുലുമായി അടുപ്പമുള്ള ഷാഫി പറമ്പിലിനെപ്പോലുള്ള നേതാക്കള്ക്കും കാര്യങ്ങള് അറിയാമായിരുന്നു എന്നുവേണം കരുതാന്. അവരുടെ മൗനം കുറ്റസമ്മതമായി കരുതേണ്ടിവരും. രാഹുലിനും ചില കാര്യങ്ങള് വെളിപ്പെടുത്താന് ഉണ്ടാവുമെന്നും, അങ്ങനെ സംഭവിച്ചാല് അര്ദ്ധരാത്രിയില് സൂര്യനുദിച്ചാലുള്ള അവസ്ഥയായിരിക്കുമെന്നും ഈ നേതാക്കള് ഭയപ്പെടുന്നുണ്ട് എന്നുവേണം സംശയിക്കാന്. പല കോണ്ഗ്രസ് നേതാക്കളുടെയും സദാചാരം സംബന്ധിച്ച ട്രാക് റെക്കോര്ഡ് മലയാളികള്ക്ക് നന്നായി അറിയാവുന്നതാണല്ലോ. ഇപ്പോഴത്തെ സാഹചര്യത്തിലും രാഹുലിനെ സംരക്ഷിക്കാനുള്ള നീക്കങ്ങള് ഇക്കൂട്ടര് നടത്തുന്നതായി വേണം കരുതാന്. ഇതിന്റെ ഭാഗമാണ് രാഹുലിനെക്കൊണ്ട് യൂത്ത് കോണ്ഗ്രസ് അധ്യക്ഷ സ്ഥാനം രാജിവപ്പിച്ചതെന്നാണ് മനസ്സിലാക്കേണ്ടത്. ഇരകളുടെ ആരോപണങ്ങള് പരാതികളായി എത്താതിരിക്കാന് ഇവര് ശ്രദ്ധിക്കുന്നുണ്ടാവാം.
രാഹുല് മാങ്കൂട്ടത്തില് യൂത്ത് കോണ്ഗ്രസ് അധ്യക്ഷസ്ഥാനം രാജിവച്ചത് എന്തോ മഹാകാര്യമാണെന്ന മട്ടിലാണ് കോണ്ഗ്രസ് നേതാക്കള് പ്രചരിപ്പിക്കുന്നത്. എന്നാല് ഈ രാജി കോണ്ഗ്രസിന്റെ ആഭ്യന്തരകാര്യം മാത്രമാണ്. ഒരു സെക്സ് മാനിയാക്കാണെന്ന് ആരോപണം ഉയര്ന്നിരിക്കുന്ന വ്യക്തി എംഎല്എയായി തുടരുന്നതിന്റെ ധാര്മികത ചോദ്യം ചെയ്യപ്പെട്ടിരിക്കുകയാണ്. എംഎല്എയായി തുടരാനുള്ള ഒരു യോഗ്യതയും രാഹുലിനില്ല. ഇക്കാര്യത്തില് കോണ്ഗ്രസ് നേതൃത്വവുമായി സര്ക്കാര് ഒത്തുകളിക്കുകയാണ്. തന്നെ ഗര്ഭഛിദ്രത്തിന് പ്രേരിപ്പിച്ചുവെന്ന യുവതിയുടെ വെളിപ്പെടുത്തലില് രാഹുലിനെതിരെ പോലീസില് പരാതി ലഭിച്ചിട്ടുണ്ട്. ഇതില് നടപടിയെടുക്കാന് പോലീസ് നിയമോപദേശം തേടിയിരിക്കുകയാണത്രേ. സിപിഎമ്മുകാര് പ്രതികളാകുന്ന പല കേസുകളിലും പോലീസ് പ്രയോഗിക്കുന്ന അടവുനയമാണിത്. രാഹുലിനെ രക്ഷിക്കാനാണ് ഈ നിയമോപദേശം തേടല്. ഇതിന് വിരുദ്ധമായി ചില സിപിഎം നേതാക്കള് നടത്തുന്ന പ്രസ്താവനകള് ജനങ്ങളെ തെറ്റിദ്ധരിപ്പിക്കാനാണ്. ഇടതുപക്ഷത്തെ മാങ്കൂട്ടത്തിലുമുണ്ടല്ലോ സര്ക്കാര് സംരക്ഷിച്ചുകൊണ്ടിരിക്കുന്ന ഇത്തരക്കാര്.
