കൊച്ചി: എംഎല്എ രാഹുല് മാങ്കൂട്ടത്തിലിനെതിരെ ഉയര്ന്നുവന്ന ലൈംഗികാതിക്രമ ആരോപണങ്ങള് കേരളത്തിന്റെ പൊതുമണ്ഡലത്തിന് ആകെ അപമാനകരമെന്ന് ബിജെപി സംസ്ഥാന ജനറല് സെക്രട്ടറി അനൂപ് ആന്റണി. ഒന്നിലധികം സ്ത്രീകള്ക്ക് നേരെ നടത്തിയ ലൈംഗികാതിക്രമങ്ങള്, അശ്ലീല സന്ദേശങ്ങള് അയച്ചത്, ഗര്ഭഛിദ്രത്തിന് നിര്ബന്ധിച്ചത് തുടങ്ങിയ അതീവ ഗുരുതരമായ കുറ്റകൃത്യങ്ങളാണ് പുറത്തുവരുന്നത്. ആരോപണങ്ങള് ഉന്നയിച്ച യുവതി തന്നെ തെളിവുകള് സഹിതം മാധ്യമങ്ങള്ക്ക് മുന്നില് എത്തിയതോടെ വിഷയത്തിന്റെ ഗൗരവം പതിന്മടങ്ങ് വര്ധിച്ചിരിക്കുന്നു.
ഒരു നിയമസഭാ സാമാജികന്റെ ഭാഗത്തുനിന്ന് ഒരിക്കലും ഉണ്ടാകാന് പാടില്ലാത്ത ഹീനമായ പ്രവൃത്തികളാണ് പുറത്തുവരുന്നത്. ഷാഫി പറമ്പിലിന് ഈ വിഷയത്തില് നേരിട്ട് പരാതി ലഭിച്ചിട്ടും അത് ഒതുക്കിത്തീര്ക്കാന് ശ്രമിച്ചു എന്ന വെളിപ്പെടുത്തല് ഞെട്ടിക്കുന്നതാണ്. കുറ്റകൃത്യം മറച്ചുവെക്കാന് ശ്രമിച്ച കോണ്ഗ്രസ് നേതൃത്വവും കേരളത്തിലെ പൊതുസമൂഹത്തോട് മറുപടി പറയാന് ബാധ്യസ്ഥരാണെന്ന് അദ്ദേഹം തുടര്ന്നു.
ഇത്രയധികം തെളിവുകള് പുറത്തുവന്ന സാഹചര്യത്തില് രാഹുല് മാങ്കൂട്ടത്തില് എംഎല്എസ്ഥാനത്ത് തുടരുന്നത് ജനാധിപത്യ ധാര്മ്മികതയ്ക്ക് ചേര്ന്നതല്ല. ഗുരുതരമായ സ്വഭാവദൂഷ്യമുള്ള ഒരു വ്യക്തിയെ തങ്ങളുടെ ജനപ്രതിനിധിയായി ചുമക്കേണ്ട ബാധ്യത പാലക്കാട്ടെ പ്രബുദ്ധരായ ജനങ്ങള്ക്കില്ല. സ്ത്രീസുരക്ഷയെയും ജനാധിപത്യ മൂല്യങ്ങളെയും മാനിച്ചുകൊണ്ട് രാഹുല് മാങ്കൂട്ടത്തില് എംഎല്എ സ്ഥാനം ഉടനടി രാജിവെക്കണം. ഈ ആവശ്യം അംഗീകരിച്ചില്ലെങ്കില് ശക്തമായ ബഹുജന പ്രക്ഷോഭങ്ങളുമായി പാര്ട്ടി മുന്നോട്ടുപോകുമെന്നും അനൂപ് ആന്റണി പറഞ്ഞു.
