പൂവാര്: സിപിഎം ഭരിക്കുന്ന പൂവാര് പഞ്ചായത്തില് കുടുംബശ്രീ സിഡിഎസ് ചെയര്പേഴ്സണും സിഡിഎസ് അംഗങ്ങള്ക്കുമെതിരെ ഗുരുതര ആരോപണങ്ങളുമായി അയല്ക്കൂട്ടം യൂണിറ്റുകള്.
കടല്തീരത്ത് അടിഞ്ഞുകൂടിയ പ്ലാസ്റ്റിക്ക് പെല്ലറ്റുകള് നീക്കം ചെയ്യുന്ന പ്രവര്ത്തികള്ക്ക് സര്ക്കാര് മാനദണ്ഡങ്ങള് മറിക്കടന്ന് വേണ്ടപ്പെട്ട അംഗങ്ങള്ക്ക് 45 ദിവസത്തോളം ജോലി നല്കിയെന്ന പരാതിയുമായാണ് അയല്ക്കൂട്ടാംഗങ്ങള് പരാതിയുമായി പഞ്ചായത്ത് അധികൃതരെ സമീപിച്ചത്.
കേരളാതീരത്ത് അറബിക്കടലില് എംഎസ്സി എല്സ3 കപ്പല് മുങ്ങിയതിനെ തുടര്ന്ന് ജില്ലയിലെ കടല് തീരങ്ങളില് അടിഞ്ഞു കൂടിയ പ്ലാസ്റ്റിക്ക് പെല്ലറ്റുകള് നീക്കം ചെയ്യാന് കുടുംബശ്രീ പ്രവര്ത്തകരെ കൂടി ഉള്പ്പെടുത്തി ക്ലീനിംഗ് നടപടി പൂര്ത്തിയാക്കാന് ദുരന്ത നിവാരണ അതോറിറ്റി ഉത്തരവ് ഇറക്കിയിരുന്നു. ഇതിനായി കുടുംബശ്രീ 40 അംഗങ്ങളെ ഉള്പ്പെടുത്തി ഒരു ടീമിന് രൂപം നല്കി. പരാമാവധി 5 ദിവസത്തെ തൊഴില് ലഭിക്കും.
250 ഓളം അയല്കൂട്ടങ്ങളുള്ള പൂവാര് പഞ്ചായത്തില് നിലവിലെ സിഡിഎസ് അംഗങ്ങളും അവരുടെ സംഘവും 45 ദിവസം ജോലി ചെയ്തതായി പറയുന്നു. എന്നാല് 5 ദിവസത്തിലധികം ജോലി ലഭിക്കാത്ത നിരവധി അയല്ക്കൂട്ടങ്ങളാണ് പരാതിയുമായി പഞ്ചായത്തിനെ സമീപിച്ചത്. രാവിലെ 8 മണിമുതല് വൈകിട്ട് 3 മണിവരെയാണ് പ്രവര്ത്തന സമയം. 1000 രൂപയ്ക്ക് പുറമെ ചായ ഉള്പ്പെടെ രണ്ടു നേരത്തെ ഭക്ഷണവും നല്കിയിരുന്നു. എന്നാല് ഇക്കാര്യത്തില് സുതാര്യത ഉറപ്പ് വരുത്താന് പഞ്ചായത്ത് അധികൃതര് ശ്രമിച്ചില്ലെന്നാണ് ഉയരുന്ന ആരോപണം.
2023-24 വര്ഷത്തെ ഓഡിറ്റ് പൂര്ത്തിയാക്കി അഫിലിയേഷന് നേടിയിട്ടുള്ളതോ, രൂപികരിച്ച് അഫിലിയേഷന് ആയ അയല്ക്കൂട്ട അംഗങ്ങളെ മാത്രം പ്രവര്ത്തനത്തിന് നിയോഗിക്കണമെന്നാണ് ഉത്തരവില് പറയുന്നത്. എന്നാല് അര്ഹതയുള്ള അയല്കൂട്ടം യൂണിറ്റുകളെ ഒഴിവാക്കി ചെയര്പേഴ്സനും സിഡിഎസ് അംഗങ്ങള്ക്കും താല്പര്യമുള്ള യൂണിറ്റ് അംഗങ്ങളെ തിരുകി കയറ്റി ജോലി നേടിയതായി ഒരു വിഭാഗം അംഗങ്ങള് ആരോപിക്കുന്നു. സംഭവം വിവാദമായതോടെ ജോലി ചെയ്തവരുടെ പേരും വിവരവുമടങ്ങിയ രജിസ്ട്രര് ബുക്ക് വലിച്ച് കീറി തെളിവ് നശിപ്പിച്ചതായും പറയുന്നു. രജിസ്റ്റര് നശിപ്പിച്ചതിനെതിരെ പൂവാര് പഞ്ചായത്ത് കുടുംബശ്രീ അസിഡന്റ് സെക്രട്ടറി കുടുംബശ്രീ ജില്ലാ മിഷന് പരാതി നല്കി. എന്നാല് പൂവാര് പഞ്ചായത്തിലെ സിഡിഎസ് ചെയര്പേഴ്സണ് ഉള്പ്പെട്ട 12 അംഗങ്ങളും യുഡിഎഫ് അംഗങ്ങളാണ് എന്നാണ് സിപിഎമ്മിന്റെ വാദം.
