ന്യൂദൽഹി: ദേശീയ തലസ്ഥാനത്തെ സ്കൂളുകൾക്ക് തുടർച്ചയായ രണ്ടാം ദിവസവും ബോംബ് ഭീഷണി ലഭിച്ചു. ഇന്ന് 6 സ്കൂളുകൾക്കാണ് ഭീഷണി സന്ദേശം ലഭിച്ചത്. ഇ-മെയിൽ വഴിയാണ് ഭീഷണി.
തുടർന്ന് ദൽഹി പോലീസും മറ്റ് ഏജൻസികളും സ്കൂളുകളിൽ എത്തി അന്വേഷണം നടത്തിവരികയാണ്. മുൻകരുതൽ എന്ന നിലയിൽ സ്കൂളുകൾക്ക് പുറത്ത് അഗ്നിശമന സേനാംഗങ്ങളെയും വിന്യസിച്ചിട്ടുണ്ട്.
ഇന്ന് രാവിലെ 6:35 നും 7:48 നും ഇടയിലാണ് ഭീഷണി സന്ദേശം എത്തിയത്. ഇതിൽ പ്രസാദ് നഗറിൽ സ്ഥിതി ചെയ്യുന്ന ആന്ധ്ര സ്കൂൾ, ബിജിഎസ് ഇന്റർനാഷണൽ സ്കൂൾ, റാവു മാൻ സിംഗ് സ്കൂൾ, കോൺവെന്റ് സ്കൂൾ, മാക്സ് ഫോർട്ട് സ്കൂൾ, ദ്വാരകയിൽ സ്ഥിതി ചെയ്യുന്ന ഇന്ദ്രപ്രസ്ഥ ഇന്റർനാഷണൽ സ്കൂൾ എന്നിവ ഉൾപ്പെടുന്നു.
ഇന്നലെയും ദൽഹിയിലെ 50 ലധികം സ്കൂളുകൾക്ക് ബോംബ് ഭീഷണി ലഭിച്ചിരുന്നു. കഴിഞ്ഞ നാല് ദിവസത്തിനുള്ളിൽ സ്കൂളുകളിൽ ബോംബ് ഭീഷണി മുഴക്കുന്ന മൂന്നാമത്തെ സംഭവമാണിത്. തിങ്കളാഴ്ച ദൽഹിയിലെ 32 സ്കൂളുകൾക്ക് സമാനമായ ഭീഷണികൾ ലഭിച്ചിരുന്നു, അത് പിന്നീട് തെറ്റാണെന്ന് തെളിഞ്ഞു. ബുധനാഴ്ച ദേശീയ തലസ്ഥാനത്തെ 50 ഓളം സ്കൂളുകൾക്ക് വീണ്ടും ഇ-മെയിൽ വഴി വ്യാജ ബോംബ് ഭീഷണി ലഭിച്ചിരുന്നു.
